Ungava Bay angiyuq, ikattunnuaq imanga piyuq 50,000 kikkariktuq kilamiitamik Nunavikmi, tamna Inuit nunanga ukiuqtaqtumi Quebec nayuganga amigaittunut huradjat, iqaluit tingmianullu. Ittuq hivuraani Qikiqtaaluup Kupaillu Tarrangata ikirasanga uataanit Torngat Kingingniq uumani Labrador, Ungava Bay ittuq 150 miitanik itinnak hiamitiqhimayuqlu mikkaqnit qikiqtanik kangirhunginniklu.
Ukiumi, kangirhua tatatpaktuq hiliktunik, ahiruqtiqtumik, hivulliqpaami-ukiungani hikumik. Auyanguraangat, kangirhua hikuiqpaktuq ilangit maliit uumani Nunaryuaptikni, ukuatlu 17-miitanik malik uumani Bay of Leaves-mi (Baie aux Feuilles).
Akhuurutauyut Ukiuqtaqtumi Avatiliriniqmut
Taimaatut ilanganit Ukiuqtaqtumi, kangirhua piqaqpiarninnga avatiliriniqmut mihigivaktuq akhuurutauyuq maliknik pipkaidjutiyuq uumannga hilaup aadlangurninnga. Unalu, avikturhimayuq imaup hukanninganit aulapkaiyuq piliurninnga pauwamik angiyuq North America-mi city-ngit pipkaidjutiyuq nunamikni hikunganik imanganiklu.
Ungava Bay nunagiyauyuq 6nit Nunavik 14 nunallaangit, ukuatlu Kuujjuaq, angitqiyauyuq nuna Nunavikmi, hiamitiqtuq tamainnut hivuraap nunguvinga kangirhup haniani Koksoak Kuuganganit. Inuit nunaqarhimayut talvani ihariagiyait ukuninnga amigaittulik hapkuat imanga, angunahuarniqmut qilalukkanik, nanuit, Iqalukpik, nattit, amuumayunik, uvilunik amigaittullu aadlat tariuqmi uumayut uumani mikitqiangani kangirhua Ungava Bay. Qaffiuyut pulaaqtunut havaktut, iqalukhiulluaqtut, ilitariyait pinniqninnga Ungava Bay, aliagiyauyuq pulaarvikhaq pulaaqtunut.
Tamna kangirhunga pipkaidjutiyuq angitqiamik nampanik akpanik Kaanatami, unalu akhuurutauyut tariuqmi tingmiat amihuaryuit, mitiq pikiutaqmi ittut ilanga angunahuaqtut nayugangit. Iqalukpik niriyut hapkuat imanga auyami, nanuillu nanuliuqtut munariplugillu nanunnuanginnik. Nungutpallialiqtut qilalukkanik amihuaryuit, itqurnarutauyuq ikitqiaq 1 hannanik qilalukkat, itpaktut Ungava Bay-mi hikuiraangat. Tamna kangirhunga ihumagiyauyuq akhuurutauyut Ukiuqtaqtumi avatiliriniqmut aadlatqiimi Kaanatamutup unalu Inuit munariniq ihumaliurninnganut havaangit.
Qayangnarutauyut Kangirhungaut
Hilaup aadlangurninnga, unalu imaup hukanninganit aulapkaiyuq havauhikhat kuugaqtailiyaa angiyuq kuukkat, ayurhautiyaa kangirhup tariup hikua unalu avatiliriniqmut. Tamna qilalukkanik amihuaryungit tadja naunaiqhimayuq ikiklivallialiqtuq ukunannga Katimayiingit Qanuriliurninnganit Ikiklivallialiqtut Huradjat Kaanatami (COSEWIC). Mikhilaaqtuq amihuaryungit pilihaaliqtuq nunguvingani 19nit ukiunganit aullaqtiqtuq 20nit ukiunganit talvuuna maniliurutinganik qilalukkanik. Nampangit ihuarhangittuq aadlangurmat nayugangit, ukuatlu angiyut kuukat nutqaqvingit, umiat nipiqquqtuninnga, qinirhiayut unalu pipkaidjutininnga hulilukaarutit. Unalu, pulaarniq iron ore-miklu uyarakhiurniqmut angikliyuumiutiniaqtaa umiakkuuqpiarahuarniqmik uumani nunami, qayangnarutipkaiyuq tariup avatinganut. Tamarmik hapkuat qayangnarutauyut ayurhaqtitauniaqtaa Inuinnait inuuhinginnik, pitquhingit, ilitquhingit unalu inuudjutikhaq angunahuarniqmut uumani kangirhuk.
Havauhikhat Hapummiutiyakhamut
Oceans North-kut ikayuqtut Nunavik Inuit aliagiyanga tammaqtailigiami una nuna ilanganik una kaanataup kavamamaup uqariiyaqhimayuq hapummigiami 10 pusantmik Kaanatamutup tariungit ukiungani 2020. Havaqatigiyaqqut Nunavik Inuit nunataarutingit timiqutigiyangit piliuriami uqaqatigiikniq ukununnga kaanataup kavamanga piniaruknaqhiumut tariup tammaqtailiyauyut ilanga iliuraqtauyukhaq hanianut uumani Nunavik Tariup Nunangani.
Ungava Bay-mi, Oceans North-kut titiraliqtait nunamikni ayuittiaqtut ilihimaninnga qanuqtut huradjat maamaktittiyut, iqaluit qitiittullu aturiami tariup avatinga ihumaalutigiyauyuni pipkaidjutiyut ukunanik ihumaliurhimayuq uyarakhiurniqmut unalu umiakkuurniq hulilukaarutit. Tamna havauhikhaq ihivriuqtaa qanuqtut huradjat iqatigiiyut nayuganganit tamainni inuutillugit aadlatqiinilu ukiumi, uumanilluaq ilangani akhuurutauyuq inuudjutikhaq angunahuarniqmut. Katitiqtaukpata, una naunaitkutanga atuqtauniaqtuq ikayuriami tariup munariniq akhuurutingit. Unalu, Oceans North-kut ikayuqtut hivuniqtirininnga una Inuit-pipkaiyut tariup munariniq kitut piumayangit tamainni Nunavik Tariup Nunangani.