ᐅᖓᕙᐅᑉ ᐃᒪᖓ ᐊᖏᔫᓪᓗᓂ, ᐃᒃᑲᒃᑐᖅ ᐃᒪᖅ 50,000 ᑭᑉᐹᕆᒃᑐᓂ ᑭᓛᒥᑕᓂ ᐊᖏᓂᓕᒃ ᓄᓇᕕᖕᒥ, ᐃᓄᐃᑦ ᓄᓇᖁᑎᖓ ᑯᐊᐸᒃ ᑕᕐᕋᖓᓂ ᐊᖏᕐᕋᕆᔭᐅᓪᓗᓂ ᐊᒥᓱᓄᑦ ᐆᒪᔪᐃᑦ ᐊᔾᔨᒌᖕᓂᖏᓐᓄᑦ ᓂᕐᔪᑎᓂ, ᐃᖃᓗᖕᓂ ᑎᖕᒥᐊᓂᒡᓗ. ᓂᒋᐊᓃᑦᑐᖅ ᕿᑭᖅᑖᓘᑉ ᓄᓇᕕᐅᓪᓗ ᐃᑭᕋᓴᖓᓂ ᐊᒻᒪ ᐱᖓᓐᓇᖅᐸᓯᐊᓂ ᑑᕐᖓᐃᑦ ᐃᓐᓈᕈᖏᓐᓂ ᓛᐸᑐᐊᒥ, ᐅᖓᕙᐅᑉ ᐃᒪᖓ 150-ᓂᒃ ᐆᒃᑑᑎᓂ ᐃᑎᓂᓕ ᐊᒥᓱᓂᓪᓗ ᕿᑭᖅᑕᕋᓛᖃᖅᑐᓂ ᑲᖏᖅᖢᓂᒡᓗ.

ᐅᑭᐅᒃᑯᑦ, ᐃᒪᖓ ᐅᑭᐅᑉ ᓯᕗᓪᓕᖓᓂ ᓯᑯᖃᓲᖅ ᐃᔾᔪᔪᓂ ᓱᕋᒃᑎᖅᓯᒪᔪᓂ. ᐊᐅᔭᒃᑯᑦ, ᐃᒪᖓ ᓯᑯᐃᓲᖅ ᐃᑎᓂᖅᐹᓂᒡᓗ ᐅᓕᓲᖑᓪᓗᑎ ᓯᓚᕐᔪᐊᓕᒫᒥ, ᐃᓚᒋᓪᓗᓂᐅᒃ 17-ᐆᒃᑑᑎᓂ ᐅᓕᓐᓂᐅᔪᒥ ᑕᓯᐅᔭᕐᒥ (ᐸᐃ ᐆ ᕕᐅᔅ).

ᐱᒻᒪᕆᐅᔪᖅ ᐅᑭᐅᖅᑕᖅᑐᒥ ᐆᒪᔪᐃᑦ ᓇᔪᒐᖃᕐᕕᖏᑦ ᖃᓄᐃᙱᑦᑎᐊᕐᓂᖏᓐᓄᑦ

ᐅᑭᐅᖅᑕᖅᑐᓕᒫᒥ ᑕᐃᒪᐃᒻᒪᑦ, ᐃᒪᐅᑉ ᐆᒪᔪᐃᑦ ᓇᔪᒐᖃᕐᕕᖏᑦ ᖃᓄᐃᙱᑦᑎᐊᕐᓂᖏᓐᓄᑦ ᐱᑕᖃᐅᓐᓂᖓ ᐊᒃᓱᕈᕈᑕᐅᓕᕐᒥᔪᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᕆᔭᖓᓄᑦ. ᖄᒃᑲᓐᓂᐊᒍᑦ, ᐊᕕᒃᑐᖅᓯᒪᓂᐅᔪᓂ ᐃᒥᕐᒥᒃ ᐊᑯᑐᕐᓗᓂ ᐆᒻᒪᖅᑯᑎᓕᐅᕐᓂᕐᒧᑦ ᐱᕙᓪᓕᐊᓂᐅᔪᑦ ᐆᒻᒪᖅᑯᑎᓕᐅᖅᐸᒃᑐᖅ ᑲᓇᑕᒥ ᒥᐊᓕᒐᓂᓪᓗ ᓄᓇᓕᐸᐅᔭᖕᓂ ᐊᓯᔾᔩᓕᖅᑐᖅ ᑕᐅᕙᓂ ᓯᑰᓪᓗ ᐃᒪᐅᓪᓗ ᖃᓄᐃᓐᓂᐅᔪᓂ.

ᐅᖓᕙᐅᑉ ᐃᒪᖓ ᐊᖏᕐᕋᕆᔭᐅᔪᖅ 14-ᓄᑦ ᓄᓇᓕᖕᓄᑦ, ᐃᓚᒋᔭᐅᓪᓗᓂ ᑰᔾᔪᐊᖅ, ᐊᖏᓂᖅᐹᖅ ᓄᓇᓕᐅᔪᖅ ᓄᓇᕕᖕᒥ, ᑯᒃᓱᐊᖅ ᑰᖓᓄᑦ ᑎᑭᐅᒪᔪᖅ ᐃᒪᐃᑉ ᓂᒋᐊᓂ. ᐃᓄᐃᑦ ᑕᐅᕙᓂᕐᒥᐅᑦ ᐃᒪᕐᒥᐅᑕᓂ ᐱᕙᒃᑐᑦ, ᐊᖑᓇᓱᒃᐸᒃᑐᑦ ᖃᑯᖅᑕᓂ ᕿᓚᓗᒐᕐᓂ, ᓇᓄᕐᓂ, ᑕᕆᐅᕐᒥᐅᑕᓂ ᐃᖃᓗᖕᓂ, ᓇᑦᑎᕐᓂ, ᐊᒻᒨᒪᔪᓂ, ᐅᕕᓗᓂ ᐊᓯᖏᓪᓗ ᐃᒪᕐᒥᐅᑕᓂᑦ ᐆᒪᔪᓂ ᒥᑭᓐᓂᖅᓴᓂ ᐃᒫᓃᑦᑐᓂ ᐅᖓᕙᐅᑉ ᐃᒪᖓᓂ. ᐊᓯᓱᑦ ᐳᓚᕋᖅᑐᓕᕆᔩᑦ, ᐱᓗᐊᖅᑐᒥ ᐃᖃᓗᒐᓱᒃᑏᑦ, ᐃᓕᓴᖅᓯᓯᒪᔪᑦ ᐱᐅᓂᕆᔭᖓᓂ ᐅᖓᕙᐅᑉ ᐃᒪᖓ, ᐅᐸᒃᑕᐅᒐᔪᖕᓂᖓᓗ.

ᐃᒪᖓ ᐊᒥᓲᓂᖅᐹᓂ ᐊᒃᐸᖕᓂ ᑲᓇᑕᒥ, ᐊᒻᒪ ᐱᒻᒪᕆᐅᔪᓂ ᑕᕆᐅᕐᒥᐅᑕᓂ ᑎᖕᒥᐊᓂ, ᒥᑎᕐᓄᑦ ᐃᕙᕕᖕᓂ ᓇᔪᖅᑕᐅᔪᓄᑦ ᐆᒪᔪᓄᑦ. ᑕᕆᐅᕐᒥᐅᑕᐃ ᐃᖃᓗᐃᑦ ᑕᐅᕙᓂ ᓂᕆᕙᒃᑐᑦ ᐊᐅᔭᒃᑯᑦ, ᓇᓄᐃᓪᓗ ᐊᑎᖅᑕᓛᖏᓐᓂ ᑕᐅᕙᓂ ᐃᕐᓂᐅᕙᒃᖢᑎ. ᐅᓗᕆᐊᓇᖅᑐᒦᑦ ᖃᑯᖅᑕᑦ ᕿᓚᓗᒐᑦ, 100 ᑐᖔᓃᓐᓇᓱᒋᔭᐅᔪᑦ, ᐅᖓᕙᐅᑉ ᐃᒪᖓᓃᑉᐸᑦᑐᑦ ᓯᑯᓯᒪᙱᑎᓪᓗᒍ. ᐃᒪᐅᔪᖅ ᐱᒻᒪᕆᐅᔪᖅ ᐅᑭᐅᖅᑕᖅᑐᒥ ᐆᒪᔪᐃᑦ ᓇᔪᒐᖃᕐᕕᖏᑦ ᖃᓄᐃᙱᑦᑎᐊᕐᓂᖏᓐᓄᑦ ᐅᓄᖅᑐᓄᑦ ᐊᔾᔨᒌᙱᑦᑐᓄᑦ ᒐᕙᒪᑐᖃᒃᑯᓐᓂ ᐃᓄᓐᓄᓪᓗ ᐱᐅᖅᓱᐊᓂᕐᒧᑦ ᐸᕐᓇᐃᓂᕐᒧᑦ ᐱᓕᕆᔾᔪᓯᓂ.

ᐅᓗᕆᐊᓇᕈᑏᑦ ᐃᒪᖓᓄᑦ

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᒻᒪ ᐃᒥᕐᒥᒃ ᐊᑯᑐᕐᓗᓂ ᐆᒻᒪᖅᑯᑎᓕᐅᕐᓂᕐᒧᑦ ᐱᓕᕆᐊᒃᓴᑦ ᑰᒃᑕᐃᓕᒪᑎᑦᑎᓂᑰᔪᓂ ᐊᖏᔪᓂ ᑰᖕᓂ, ᐊᒃᑐᐃᓂᖃᓲᖅ ᐃᒪᐅᑉ ᓯᑲᖓᓂ ᐊᒻᒪ ᐆᒪᔪᐃᑦ ᓇᔪᒐᖃᕐᕕᖏᑦ ᖃᓄᐃᙱᑦᑎᐊᕐᓂᖏᓐᓄᑦ. ᖃᑯᖅᑕᑦ ᕿᓚᓗᒐᑦ ᖃᔅᓯᐅᓂᖏᑦ ᒫᓐᓇᐅᔪᖅ ᑎᑎᖅᑕᐅᓯᒪᔪᖅ ᐅᓗᕆᐊᓇᖅᑐᒦᓐᓂᕋᖅᑕᐅᓪᓗᑎ ᑖᒃᑯᓄᖓ ᑲᑎᒪᔨᕋᓛᑦ ᖃᓄᐃᓕᖓᓕᕐᓂᖏᓐᓄᑦ ᐅᓗᕆᐊᓇᖅᑐᓃᑦᑐᓂᒃ ᐆᒪᔪᓂᑦ ᑲᓇᑕᒥ (COSEWIC). ᐊᒥᓲᓗᐊᕈᓐᓃᓚᐅᖅᑐᑦ ᑖᒃᑯᐊ ᑲᑎᙵᔪᑦ ᐱᒋᐊᓚᐅᖅᑐᑦ 19 ᐊᒻᒪ 20 ᓴᓐᑐᕆᔅᓂ ᓂᐅᕐᕈᑎᖃᕐᓂᕐᒧᑦ ᕿᓚᓗᒃᑭᐊᖃᑦᑕᖅᑎᓪᓗᒋᑦ. ᖃᔅᓯᐅᓂᖏᑦ ᐅᓂᖅᓯᕚᓪᓕᖅᓯᒪᙱᑦ ᓇᔪᖅᑕᐅᔪᓄᑦ ᐆᒪᔪᓄᑦ ᐱᔾᔪᑎᒋᓪᓗᒍ, ᐃᓚᒋᓪᓗᓂᒋᑦ ᐊᖏᔪᐊᓗᑦ ᑰᒃᑎᑕᐅᑦᑕᐃᓕᒪᓂᖏᑦ ᑰᖑᔪᓂ, ᐅᒥᐊᕐᔪᐊᑦ ᓂᐱᐊᓗᖏᑦ, ᓂᐅᖅᑐᐃᓃᑦ ᐊᒻᒪ ᓴᓇᕕᐊᓗᑦ ᐱᓕᕆᓂᕆᔭᖏᓐᓄᑦ. ᐊᒻᒪᓗᑦᑕᐅᖅ, ᐳᓚᕋᖅᑐᓕᕆᓂᖅ ᐊᒻᒪ ᐅᔭᕋᖕᓂᐊᕐᓂᖅ ᐊᒥᓱᕈᖅᐸᓪᓕᐊᑎᑦᑎᖕᒪᑕ ᐅᒥᐊᕐᔪᐊᑦ ᐃᖏᕐᕋᓂᕆᔭᖏᓐᓂᒃ ᑕᐅᕙᓂ, ᐅᓗᕆᐊᓇᖅᑐᖅ ᐃᒪᕐᒥᐅᑕᓂᑦ ᐆᒪᔪᐃᑦ ᓇᔪᒐᖃᕐᕕᖏᑦ ᖃᓄᐃᙱᑦᑎᐊᕐᓂᖏᓐᓄᑦ. ᐊᑐᓂ ᐅᓗᕆᐊᓇᖅᑐᑦ ᐊᒃᑐᐃᓂᖃᕈᓐᓇᖅᑐᑦ ᐃᓄᐃᑦ ᐃᓅᓯᖏᓐᓂ, ᐃᓕᖅᑯᓯᖓᓂ, ᐱᖅᑯᓯᖓᓂ ᐊᒻᒪ ᓈᒻᒪᒃᑐᒥ ᐊᖑᓇᓱᓐᓂᐅᕙᒃᑐᒥ ᐃᒪᖓᓂ.

ᐱᒋᐊᕈᑕᐅᔪᑦ ᓴᐳᔾᔨᓯᒪᓂᕐᒧᑦ

ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐃᑲᔪᖅᓱᖅᑐᑦ ᓄᓇᕕᒻᒥ ᐃᓄᐃᑦ ᐱᐅᖅᓱᐊᕐᓂᕆᔪᒪᔭᖏᓐᓂᒃ ᒐᕙᒪᑐᖃᒃᑯᑦ ᐱᓕᕆᐊᖃᕈᒪᓂᖓᓂ ᓴᐳᔾᔨᓂᕐᒥᑦ 10 ᐳᓴᓐᑎᒥ ᐃᒪᖁᑎᖏᓐᓂᒃ ᑎᑭᓪᓗᒍ 2020. ᐱᓕᕆᖃᑎᖃᖅᑐᒍᑦ ᓄᓇᕕᒻᒥ ᐃᓄᐃᑦ ᓄᓇᑖᓂᕐᒧᑦ ᑲᑐᔾᔨᖃᑎᒌᒃᑯᖏᓐᓂ ᓴᖅᑮᓂᕐᒥ ᐅᖃᖃᑎᖃᕐᓂᐅᔪᓂ ᒐᕙᒪᑐᖃᒃᑯᓐᓂ ᐃᒪᕐᒥᐅᑕᓂ ᓴᐳᔾᔭᐅᓯᒪᓂᐅᔪᓂ ᐃᓂᐅᔪᓂᑦ ᓴᓂᕐᕙᒃᑕᐅᔭᕆᐊᓕᖕᓂ ᓄᓇᕕᖕᒥ ᐃᒪᕐᒥᐅᑕᓂ ᐃᓂᐅᔪᓂ.

ᐅᖓᕙᐅᑉ ᐃᒪᖓᓂ, ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᑎᑎᖅᓯᕙᓪᓕᐊᔪᑦ ᓄᓇᓕᖕᓂ ᖃᐅᔨᒪᔭᐅᔪᓂ ᐳᐃᔩᑦ, ᐃᖃᓗᐃᑦ ᐊᒻᒪ ᕿᒥᕐᓗᖃᙱᑦᑐᓄᑦ ᐆᒪᔪᑦ ᐊᑕᓲᖑᒻᒪᖔᑦ ᐃᒪᕐᒥᐅᑕᓂᑦ ᐊᕙᑎᒥ ᐃᓱᒫᓘᑎᖃᖅᑎᓪᓗᒋᑦ ᓂᕆᐅᒋᔭᐅᔪᓂ ᐅᔭᕋᖕᓂᐊᕐᓂᕐᒧᑦ ᐊᒻᒪ ᐅᒥᐊᕐᔪᐊᒃᑰᖅᑎᑦᑎᓂᐅᔪᓄᑦ. ᐱᓕᕆᐊᒃᓴᖅ ᖃᐅᔨᓴᖅᐳᖅ ᐆᒪᔪᐃᑦ ᐊᔾᔨᒌᖕᓂᖏᑦ ᖃᓄᖅ ᐊᒃᑐᐃᖃᑎᒌᒻᒪᖔᑦ ᓇᔪᖅᑕᐅᔪᓄᑦ ᐆᒪᔪᓄᑦ ᐃᓅᓯᓕᒫᖏᓐᓂ ᐊᕐᕌᒍᑉ ᐃᓗᐊᓂ ᐊᔾᔨᐅᙱᑦᑐᒃᑯᑦ, ᐱᓗᐊᖅᑐᒥ ᐊᖑᓇᓱᒡᕕᐅᕙᒃᑐᓂ. ᓄᐊᑕᐅᓯᒪᓕᖅᑎᓪᓗᒋᑦ, ᑖᒃᑯᐊ ᑐᑭᓯᒋᐊᕈᑎᑦ ᐊᑐᖅᑕᐅᔪᓐᓇᑐᐃᓐᓇᕆᐊᓖᑦ ᐃᒪᕐᒥᐅᑕᓂᑦ ᐱᐅᖅᓱᐊᕈᑎᒃᓴᓄᑦ. ᖄᒃᑲᓐᓂᐊᒍᑦ, ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐃᑲᔪᖅᓱᖅᑐᑦ ᖁᑦᑎᓂᖅᓴᒨᕐᓂᖓ ᐃᓄᖕᓄᑦ−ᓯᕗᓕᖅᑎᖃᖅᖢᑎᒃ ᐱᐅᖅᓱᐊᕐᓂᕐᒧᑦ ᓇᓖᕌᕈᑎᐅᔪᑦ ᓄᓇᕕᖕᒥ ᐃᒪᕐᒥᐅᑕᓂᑦ ᐃᓂᐅᔪᒥ.