Oceans North-kut hivulliqpaami havaktut hitamauyuni Inuit nunataarutingit nunangit piliuqtaa Inuit Nunangat: Nunatsiavut, Nunavik, Nunavut unalu Inuvialuit Nunangat. Havaqatigiliqtavullu ukuat ukiuqtaqtumi Allait katimayiingit.

Havaktut Nunallaanginnut

Oceans North-kut iliuraqpaktuq quulitqiamik nunallaanut pipkaidjutiyuq ihivriuqniq unalu nunamikni munariniq. Imaatut ittuq qilamiungittumik piliuriami nunamikni havaqatigiikniq unalu ilitarilugit Nunaqaqqaarhimayut aliagiyanganik uumani pitquhinginnik, inunginnik, ukpiriyanginnik, timimitigut unalu maniliurniqmut nakurudjutinga. Pinahuaqtugut qanuriliurutininnga ikayuqtut tamarmik avatinga hivitutqiangalu ihariagininnga ukunanik Ukiuqtaqtumi inungit.

 Hunaukmat Nunangat?

 Inuit Nunangat Inuktitut taininnga imaatut ittuq “nunagiyanga.” Atuqtauyuq naunaiyariami hitamauyut Inuit nunataarutingit nunangit ilaliutiyuqlu nunainnaungittuq kihimi imangalu hikulu. Inuit Nunangat ittuq avatqumayuq pingahuanit Kaanataup nunannganik nampanganiklu hinaanganik.

Nunatsiavut

Nunatsiavut ittuq kivataanit Kaanata, himaanit tununnganit Labrador-mi, nunagiyauyuqlu tallimanit nunallaanut, tahapkuat apqutikkuulimaitait.

Tamna nunataarutingit uqaqatigiiliqtut Nunasiavunmi 1977mi taimaa Labrador Inuit Katimayiit (LIA) ihuarhaliqmagu naunaitkutamik nunataarutikhamik ukununnga Kaanataup Kavamanga. Uqaqatigiikhimmaaqtut 1980mi uumanilu 1990 taimaa Inuit ukunanit Nunatsiavut, Qablunaat nunagiyangit Newfoundlandmi uumanilu Labrador ukuatlu Kaanataup Kavamanga sainiqtait Labrador Inuit Nunataarutit Angirutinginnit January 2005mi.

Pipkaidjutininnga Labrador Inuit Nunannga Nayugaa (LISA) ilaliutihimayuq angiyunik ilangit nunamik imaqlu:

  • 73,000 kikkariktuq kilamiitamik nunamik hinaanit tununngavyaani kivataanit Labradorimi
  • 49,000 kikkariktuq kilamiitamik tariunga hiamitiqtuq avataanut hinaanut
  • Labrador Inuit Nunanga, atauttimut ittuq 16,000 kikkariktuq kilamiitamik (Labrador Inuit nanminiqaqtut hapkununnga)
  • Torngat Kingingniq Kaanatami Pulaarviuyut, piliurhimayut ukununnga LIA, ukiuqtaqtumi quuliqpiangani Labrador

Taimaa Nunataarutit Angirutinginnit unalu Labrador Inuit Tunngavinga pilihaaliqmat December 2005mi, Nunatsiavut hivulliqpaanguqtut Inuit nunangat pigiami inmikkut-kavamanga. Ublumi, Nunatsiavut kavamanga munariyait ikayuutikhaq munariniq tuniqhaininngalu aaniaqtailiniqmut, ilihaidjutikhamut, pitquhiliriniqmullu ikayuutikhanginnik. Havakvinga ukuat Nunanga unalu Nunamiingaqhimayut Maniliurahuarutit ilauvaktut qaffiuyuni tuglia-munariniq katimayiit ihumagilluaqtaat ukunanik avatinga, munariniq unalu ihumaliurninnganut. Una ilaliutihimayuq tamna Torngat Kingingniq Kaanatami Pulaarviuyut Tuglia-Munariniq Katimayiingit, uqainnarialik munarininnganut ukunanik Kaanatami Pulaarviuyut.

Nunavik

Nunavik ittuq tununngani 55mi nunauyami napayut qablunaat nunagiyangani Quebec. Nunagiyait avatqumayunut 12,000 inuit 14ni nunallaangit. Malruuk Nunataarutit Angirutinginnit ilaliutiyaa nunannganik unalu tariunga nunap, ukuatlu nunamikni timiqutigiyangit’ munariniq inungnnik, kavamaliqinirmut maligaliriniqmullu ikayuutit.

Tamna Siqinirmiut unalu Ukiuqtaqtumi Quebec Nunataarutit Angirutinginnit (JBNQA) sainiqtauyuq 1975mi hivulliqpaanguyuqlu nutaaq iluittuq nunataarutingit angirut sainiqhimayuq Kaanataup Tununnga. Tamna JBNQA naunaiqtaa nunaqaqqaarhimayut avikturhimayut pilaarutingit tamarmik tununngani hivuraanilu 55mi nunauyami napayut, piliuqtut nunanga katimayut, angunahuarniqmut pilaarutingit unalu ikayuutikhaq munariniq ihumaliurutit ukununnga Inuit, Allait ukuatlu Naskapi.

Nunavik Inuit Nunataarutit Angirutinginnit (NILCA) pilihaaliqtuq 2007mi piliurhimayut tariuqmi pilaarutingit taiyauliqtuq Nunavik Tariup Nunanga (NMR). Una ilaliutihimayuq qaanga unalu uyaqqangillu pilaarutingit uumunnga qikiqtanga uumani NMR.

Nunataarutit Angirutinginnit piliuqtaallu Avikturhimayuni Nunavimmi Umajulivijiit Katujiqatigininga (RNUK), avikturhimayuq katimayiit ukunanik angunahuayuktut, iqalukhiuqtut naniriaqtiuyullu piliurhimayut havaktunit uumannga tamaita nunallaat Nunamikni Nunavimmi Umajulivijiit Katujiqatigininga (LNUK). Una katimayiit munariyut tamainnik huradjanut piyut NMR-mut.

Nunataarutit Angirutinginnit piliuqtaalu qaffiuyut munariniq unalu ihumaliurninnganut katimayiit.

Nunavut

Nunavut piyaa atauhiqmit-tallimanit Kaanataup nunannganit, uumannga 60mi aadjikuktariyaani tununngani 82mut. Tamna Nunavut Nunataarutit Angirutinginnit (NLCA), angitqiyauyuq nunataarutingit uumani Kaanataup qangaraaluknitani, angiqtauyuq 1993mi, talvangani ukiungani Nunavut Maliganga sainiqtauyuq. Hapkuat angirutautit ihuarhaqtaa apqutinga piliurninnganut nutaaq nuna Nunavunmik uumani April 1, 1999mi.

Nunataarutit Angirutinginnit piyaa Nunavut Nunannga Nayugaa (NSA), talvani ilaliutihimayuq imaq, hiamitiqhimayuq 12 miles-mik hinaanit, nunanganillu. Nunavut Tunngavikkut (NTI), piliurhimayut 1993mi, naunaiqtaa maningit uqariiyaqhimayangit angirutingani tuniqhaiyut tamaitalu ilauyut piyait uqariiyaqtamiknik, ukuatlu munariyait NSA-kut kiklinga.

Nunavut piqaqtuq avikturhimayuni munariniq timiqutigiyagit, tuglia-avikturhimayuq katimayut nunamiknilu hivuliqtiuyut:

Katimayunik havakviuyut Nunavunmi havaariyaa munariniqmut. Piqaqtuq tallimat Havakviuyut Kavamatkunni (IPG) atauhiqtauq kavamaungittuq timiqutigiyanga piliurhimayuq havaktinik tamainnit IPG-mit.

Nunavut avvakhimayuq pingahunik mikkitqiat nunanganit, tamarmik nanminiqaqtut Inuit katimayiinik:

  • Kitikmeot Inuit Katimayiit
  • Qikiqtani Inuit Katimayiit
  • Kivalliq Inuit Katimayiit

Kingulliqpaami, nunamikni ittummik, piqaqtut Anguhiqiitkut Timiqutigiyangit/Katimayiit tamaita nunallaat.

Inuvialuit Nunangat

Inuvialuit Nunangat (ISR) uataanitqianguyuq Inuit nunanga nunagiyaillu 6nut nunallaangit takunnaqtut tamarmikmi nunangani uumani Banks unalu Victoria qikiqtanga uumani Kaanataup Ukiuqtaqtumi Qikiqtaqaqtuq.

Inuvialuit Kingulliqpaaq Angirut (IFA) iniqtiqtauyuq 1984mi, tuniyuq Inuvialuit qaangani uyaramilu pilaarutingit nunanganut. Tamna IFA piliurhimayut Inuvialuit Avikturhimayunut Kuapuriisingat munarigiami nunanga maniillu tuniyauyut angirutingani maligatigullu pigiami Inuvialuit ISR-mut. Tamaita nunallaat piqaqtuq nanminiriyanganik inmikkut kuapuriisimik.

Tamna IFA piliuqtaalu tuglia-munariniq aturninnga piliurhimayuq Inuvialuit timiqutigiyangit tuglia-munariniq katimayiit. Tamna tuglia-munariniq katimayiit ilaliutihimayuq havaktunit tamarmiknit Inuvialuit Huradjamut Katimayiingit, piqaqtuq atauhiqmik ilauyuq tamainni tnunallaat Anguhiqiitkut Katimayiingit (HTC), atan’nguyaniklu kaanatamit qablunaat nunagiyanganit kavamanga timiqutigiyangit.