ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐱᓕᕆᐊᖃᓪᓗᐊᑕᓲᑦ ᑎᓴᒪᐅᔪᓂ ᐃᓄᐃᑦ ᓄᓇᑖᖅᓯᒪᔪᓂ ᐊᕕᒃᑐᖅᓯᒪᓂᐅᔪᓂᑦ ᐃᓄᐃᑦ ᓄᓇᖓᓐᓂ ᓴᓇᓯᒪᔪᓂ: ᓄᓇᑦᓯᐊᕗᑦ, ᓄᓇᕕᒃ, ᓄᓇᕗᑦ ᐊᒻᒪᓗ ᐃᓄᕕᐊᓗᐃᑦ ᐊᖏᖃᑎᒌᒍᑎᑖᕐᓂᕐᒧᑦ ᐊᕕᒃᑐᖅᓯᒪᔪᓄᑦ. ᐱᓕᕆᓯᒪᓕᕐᒥᔪᒍᑦᑕᐅᖅ ᐅᑭᐅᖅᑕᖅᑐᒥ ᐊᓪᓚᐃᑦ ᑲᑐᔾᔨᖃᑎᒌᖑᔪᓂ.

ᓄᓇᓕᖕᓂ ᐱᓕᕆᖃᑎᖃᕐᓂᕐᒥᑦ

ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐃᑲᔪᕐᓂᖃᓲᖑᒻᒪᑕ ᓄᓇᓕᖕᓄᑦ−ᐱᓕᕆᐊᕆᔭᐅᔪᓂ ᖃᐅᔨᓴᕈᑕᐅᔪᓂ ᐊᒻᒪ ᓄᓇᓕᖕᓂ ᐊᐅᓚᑦᑎᓂᕐᒥᑦ. ᑕᒪᓐᓇ ᑐᑭᖃᖅᐳᖅ ᐱᕕᖃᖅᑎᑦᑎᓗᑎ ᐋᖅᑭᒃᓱᐃᓂᕐᒥ ᓄᓇᓕᐅᔪᓂ ᑲᑐᔾᔨᖃᑎᖃᕐᓂᕐᒥᑦ ᐊᒻᒪ ᐃᓕᓴᖅᓯᓂᕐᒥ ᓄᓇᖃᖅᑳᖅᓯᒪᔪᑦ ᐱᒻᒪᕆᐅᒋᔭᖏᓐᓂ ᐃᓕᖅᑯᓯᕐᒥᒍᑦ, ᐃᓅᖃᑎᖃᕐᓂᒃᑯᑦ, ᐅᑉᐱᕐᓂᒃᑯᑦ, ᑎᒥᒃᑯᑦ ᐊᒻᒪ ᑮᓇᐅᔾᔭᒃᓴᓂᕐᒧᑦ ᖃᓄᐃᙱᑦᑎᐊᕆᐊᕐᓂᕐᒥᑦ. ᑐᕌᖅᐳᒍᑦ ᓴᖅᑭᓂᕐᒥᑦ ᐱᔨᑦᑎᖅᐸᒃᑐᓂ ᑕᒪᕐᒥᒃ ᐊᕙᑎᒥ ᐊᒻᒪ ᐅᑭᐅᖅᑕᖅᑑᑉ ᐃᓄᖏᑦ ᐊᒥᒐᕆᔭᖏᓐᓂᒃ.

ᓄᓇᖓᑦ ᑭᓲᖕᒪ?

ᐃᓄᐃᑦ ᓄᓇᖓᑦ ᐃᓄᒃᑎᑐᑦ ᑕᐃᒎᓯᐅᕗᖅ ᑐᑭᖃᖅᖢᓂ “ᓄᓇᒋᔭᕗᑦ.” ᐊᑐᖅᑕᐅᓲᖅ ᓇᓗᓇᐃᕆᓂᕐᒥᑦ ᑎᓴᒪᐅᔪᓂ ᐃᓄᐃᑦ ᓄᓇᑖᖅᓯᒪᔪᑦ ᐊᖏᕈᑎᒃᑯᑦ ᐃᓚᖃᖅᑐᖅ ᐃᒪᖏᓐᓂ ᓯᑯᖏᓐᓂᒡᓗ ᓄᓇᑐᐊᖑᖏᑦᑐᒥ. ᐃᓄᐃᑦ ᓄᓇᖓᑦ ᐊᖏᓂᖃᖅᐳᖅ ᐅᖓᑖᓄᑦ ᐊᑕᐅᓯᕐᒥᑦ ᐱᖓᓲᔪᓂᑦ ᑲᓇᑕᐅᑉ ᓄᓇᖁᑎᓕᒫᖓᓂ ᐊᒻᒪ ᐊᕝᕙᓪᓕᐊᖓᓐᓂ ᓯᒡᔭᖅᐸᓯᖓᓂ.

ᓄᓇᑦᓯᐊᕗᑦ

ᓄᓇᑦᓯᐊᕗᑦ ᑲᓇᑕᐅᑉ ᑲᓇᖕᓇᖓᓃᑦᑐᖅ, ᓛᐸᑐᐅᑉ ᓯᒡᔭᖅᐸᓯᖓᓂ, ᐊᖏᕐᕋᕆᔭᐅᓪᓗᓂ ᑕᓪᓕᒪᓄᑦ ᓄᓇᓕᖕᓄᑦ, ᑕᒪᕐᒥ ᐊᖅᑯᑎᒃᑯᑦ ᐅᐸᒐᒃᓴᐅᙱᑦᑐᑦ.

ᓄᓇᑖᓂᕐᒧᑦ ᐋᔩᖃᑎᒌᓂᑦ ᐱᒋᐊᓚᐅᖅᑐᑦ ᓄᓇᑦᓯᐊᕗᖕᒥᑦ 1977-ᒥ ᓛᐸᑐᐊ ᐃᓄᐃᑦ ᑲᑐᔾᔨᖃᑎᒌᖏᑦ (LIA) ᓄᓇᑖᕈᑎᓂ ᓇᓗᓇᐃᒃᑯᑕᕐᒥ ᑐᓂᓯᑎᓪᓗᒋᑦ ᑲᓇᑕᐅᑉ ᒐᕙᒪᖓᓄᑦ. ᐋᔩᖃᑎᒌᓂᑦ ᑲᔪᓯᓚᐅᖅᑐᑦ 1980-ᖏᓐᓂ ᐊᒻᒪ 1990-ᖏᓐᓂ ᑕᐃᒃᑯᐊ ᐃᓅᔪᑦ ᓄᓇᑦᓯᐊᕗᖕᒥᑦ, ᐊᕕᒃᑐᖅᓯᒪᓂᐅᔪᖅ ᓂᐅᕙᓐᓛᓐ ᐊᒻᒪ ᓛᐸᑐᐊ ᐊᒻᒪ ᑲᓇᑕᐅᑉ ᒐᕙᒪᖓ ᐊᑎᓕᐅᓚᐅᖅᑎᓪᓗᒋᑦ ᐃᓄᖕᓄᑦ ᓄᓇᑖᓂᕐᒧᑦ ᐊᖏᕈᑎᒥ ᔮᓐᓄᐊᓕ 2005-ᒥ.

ᓴᖅᑭᓚᐅᖅᑐᑦ ᓛᐸᑐᐊᒥ ᐃᓄᖕᓄᑦ ᐊᖏᖃᑎᒌᒍᑎᑖᒧᑦ ᓄᓇᖁᑎᒋᔭᐅᔪᓄᑦ (LISA) ᐃᓚᖃᖅᐳᖅ ᐅᖓᓯᖕᓂᓕᖕᓂ ᓄᓇᒥ ᐃᒪᓂᓪᓗ:

  • 73,000 ᑭᑉᐹᕆᒃᑐᑦ ᑭᓛᒥᑕᐸᓗᑦ ᓄᓇᒥ ᑲᓇᓐᓇᖅᐸᓯᖕᒥᑦ ᓛᐸᑐᐊᑉ ᓯᒡᔭᖅᐸᓯᖓᓂ
  • 49,000 ᑭᑉᐹᕆᒃᑐᑦ ᑭᓛᒥᑕᐸᓗᑦ ᐃᒪᕐᒥᐅᑕᓂᑦ ᐃᓂᐅᔪᓂ ᓯᒡᔭᖅᐸᓯᖓᑕ ᐅᖓᑖᓄᑦ
  • ᓛᐸᑐᐊᑉ ᐃᓄᖏᑕ ᓄᓇᖏᑦ, ᑲᑎᓪᓗᒋᑦ 16,000 ᑭᑉᐹᕆᒃᑐᑦ ᑭᓛᒥᑕᐸᓗᑦ (ᓛᐸᑐᐊᑉ ᐃᓄᖏᑦ ᐱᔪᓐᓇᐅᑎᓖᑦ ᑖᒃᑯᓄᖓ)
  • ᑑᕐᖓᑦ ᐃᓐᓈᕈᐃᑦ ᒥᕐᖑᐃᖅᓯᕐᕕᖓ, ᓴᖅᑭᑕᐅᓂᑯᑦ ᓛᐸᑐᐊᑉ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ, ᓛᐸᑐᐊᑉ ᖁᑦᑎᖕᓂᖅᐹᖓᓂ

ᓄᓇᑖᓂᕐᒧᑦ ᐊᖏᕈᑎᐅᔪᖅ ᐊᒻᒪ ᓛᐸᑐᐊᑉ ᐃᓄᖏᑕ ᐊᖏᕈᑎ ᐊᑐᓕᖅᑎᓪᓗᒋᑦ ᑎᓯᐱᕆ 2005-ᒥ, ᓄᓇᑦᓯᐊᕗᑦ ᓯᕗᓪᓕᖅᐹᖑᓚᐅᖅᑐᑦ ᐃᓄᖕᓄᑦ ᓄᓇᒋᔭᐅᔪᓂ ᑲᔪᓯᓂᖃᑦᑎᐊᓂᕐᒧᑦ ᓇᒻᒥᓂᖅᓱᖅᑐᒥ-ᒐᕙᒪᑖᕐᓂᕐᒥᑦ. ᐅᓪᓗᒥᐅᔪᖅ, ᓄᓇᑦᓯᐊᕗᑦ ᒐᕙᒪᖓ ᑲᒪᒋᔭᖃᖅᑐᑦ ᓄᓇᒥᙶᖅᑐᓂᒃ ᐱᔾᔪᑎᒃᓴᓂᑦ ᐊᐅᓚᑦᑎᓂᕐᒥ ᐊᒻᒪ ᑲᔪᓯᑎᑦᑎᓂᕐᒥ ᐋᓐᓂᐊᖃᖅᑕᐃᓕᒪᓂᕐᒥᑦ, ᐃᓕᓐᓂᐊᕐᓂᓕᕆᓂᕐᒥ ᐊᒻᒪ ᐃᓕᖅᑯᓯᕐᒨᓕᖓᔪᓂᑦ. ᐱᓕᕆᕝᕕᖓ ᓄᓇᓕᕆᓂᕐᒧᑦ ᓄᓇᒥᙶᖅᑐᓂᒡᓗ ᐱᔾᔪᑎᒃᓴᓂ ᐃᓚᐅᖃᑦᑕᖅᑐᑦ ᐊᑕᐅᓯᐅᙱᑦᑐᒥ ᐊᐅᓚᑦᑎᖃᑎᒌᒃᑐᓄᑦ ᑲᑎᒪᔨᐅᔪᓄᑦ ᑐᕌᒐᖃᖅᑐᓂ ᐊᕙᑎᓕᕆᓂᕐᒥ, ᐱᐅᖅᓱᐊᓂᕐᒥ ᐊᒻᒪ ᐸᕐᓇᐃᓂᕐᒥ. ᑕᒪᓐᓇ ᐃᓚᖃᖅᑐᖅ ᑑᕐᖓᖅ ᐃᓂᓈᕈᖏᓐᓂ ᒥᕐᖑᐃᖅᓯᕐᕕᖕᒥ ᐊᐅᓚᑦᑎᖃᑎᒌᒃᑐᓄᑦ ᑲᑎᒪᔨᓂᑦ, ᐅᖃᐅᔾᔨᒋᐊᕈᓐᓇᖅᑐᑦ ᒥᕐᖑᐃᖅᓯᕐᕕᐅᑉ ᐊᐅᓚᑕᐅᓂᕆᔭᖓᓂ.

ᓄᓇᕕᒃ

ᓄᓇᕕᒃ 55−ᖓᓃᑦᑐᖅ ᓴᓂᒧᖔᖅ ᑭᒡᓕᓕᐅᙳᐊᖅᓯᒪᔪᒃᑯᑦ ᑯᐊᐸᒃᒥ. ᐊᖏᕐᕋᕆᔭᐅᔪᖅ 12,000 ᐅᖓᑖᓄᑦ ᐃᓄᖕᓄᑦ 14-ᓂᒃ ᓄᓇᓕᐅᔪᓂ. ᒪᕐᕉᖕᓂᒃ ᓄᓇᑖᓂᕐᒧᑦ ᐊᖏᕈᑎᖃᖅᑐᑦ ᓄᓇᐅᔪᑦ ᐃᒪᕐᒥᐅᑕᓂᓪᓗ ᓄᓇᒋᔭᐅᔪᒥ, ᐃᓚᖃᖅᑐᖅ ᓄᓇᓕᖕᒥᐅᑦ ᑭᒡᒐᖅᑐᐃᔨᖏᑦ ᐊᐅᓚᑦᑎᔪᑦ ᐃᓅᓯᕐᒨᖓᔪᓂᒃ, ᒐᕙᒪᓕᕆᓂᕐᒨᖓᔪᓂ ᐊᒻᒪ ᒪᓕᒐᓕᕆᓂᕐᒨᖓᔪᓂ.

ᓯᕿᓂᕐᒥᐅᓄᑦ ᐊᒻᒪ ᑯᐊᐸᒃ ᑕᕐᕋᖓᓂ ᐊᖏᕈᑎ (JBNQA) ᐊᑎᓕᐅᖅᑕᐅᔪᔪᖅ 1975-ᒥ ᐊᒻᒪ ᓯᕗᓪᓕᖅᐹᖑᓚᐅᖅᑐᖅ ᐃᓗᓕᖃᐅᑦᑎᐊᖅᖢᓂ ᓄᓇᑖᓂᕐᒧᑦ ᐊᖏᕈᑕᐅᓪᓗᓂ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᓯᕿᓂᕐᒥᐅᓄᑦ ᐊᒻᒪ ᑯᐊᐸᒃ ᑕᕐᕋᖓᓂ ᐊᖏᕈᑎ ᑐᑭᑖᖅᑎᑦᑎᕗᖅ ᓄᓇᖃᖅᑳᖅᓯᒪᔪᑦ ᓄᓇᒥᓂ ᐱᔪᓐᓇᐅᑎᓖᑦ ᐅᐊᖕᓇᖓᓂ ᓂᒋᐊᓂᓪᓗ 55-ᖓᓐᓂ ᓴᓂᒧᖔᖅ ᑭᒡᓕᓕᐅᙳᐊᖅᓯᒪᔪᒥ, ᐋᖅᑭᒃᓱᐃᓪᓗᓂ ᓄᓇᓕᕆᓂᕐᒨᖓᔪᓂ, ᐊᖑᓇᓱᒍᓐᓇᐅᑏᑦ ᐊᒻᒪ ᐊᑐᖅᑕᐅᕙᓪᓕᐊᔪᓂ ᐊᐅᓚᑦᑎᓂᕐᒧᑦ ᐸᕐᓇᐅᑎᓂ ᐃᓄᖕᓄ, ᑯᕇᓄᑦ ᐊᒻᒪ ᓇᔅᑲᐱᓄᑦ.

ᓄᓇᕕᒻᒥ ᐃᓄᐃᑦ ᓄᓇᑖᓂᕐᒧᑦ ᐊᖏᕈᑎᖓ (NILCA) ᐊᑐᓕᔪᔪᖅ 2007-ᒥ ᐊᒻᒪ ᓴᖅᑭᓚᐅᖅᑐᖅ ᓯᒡᔭᒦᙱᑦᑐᓂ ᐱᔪᓐᓇᐅᑎᓂ ᑕᐃᔭᐅᕙᒃᑐᖅ ᓄᓇᕕᒻᒥ ᐃᒪᕐᒥᐅᑕᓂᑦ ᐃᓂᐅᔪᒥ (NMR). ᑕᒪᓐᓇ ᐃᓚᖃᖅᐳᖅ ᓄᓇᐅᑉ ᖄᖓᓂ ᐊᑖᓂᓗ ᐱᔪᓐᓇᐅᑎᖃᖅᑐᑦ ᕿᑭᖅᑕᐅᔪᓂ ᓄᓇᕗᒻᒥ ᐃᒪᕐᒥᐅᑕᓂᑦ ᐃᓂᐅᔪᒥ.

ᓄᓇᑖᓂᕐᒧᑦ ᐊᖏᕈᑎ ᐋᖅᑭᒃᓱᐃᓚᐅᕐᒥᔪᖅ ᐊᕕᒃᑐᖅᓯᒪᓂᐅᔪᓂ ᓄᓇᕕᒻᒥ ᐅᒪᔪᓕᕕᔩᑦ ᑲᑐᔨᖃᑎᒋᓂᖓ (RNUK), ᐊᕕᒃᑐᖅᓯᒪᓂᐅᔪᓂ ᑲᑐᔾᔨᖃᑎᒌᑦ ᐊᖑᓇᓱᒃᑎᓄᑦ, ᐃᖃᓪᓕᐊᖅᑎᓄᑦ ᐊᒻᒪ ᒥᑭᒋᐊᕐᓂᐊᖅᑎᓄᑦ ᑭᒡᒐᖅᑐᐃᔨᖃᖅᖢᑎᒃ ᐊᑐᓂ ᓄᓇᓕᐅᔪᓂ ᓄᓇᕕᒻᒥ ᐅᒪᔪᓕᕕᔩᑦ ᑲᑐᔨᖃᑎᒋᓂᖓ (LNUK). ᑕᒃᑯᐊ ᑲᑐᔾᔨᖃᑎᒌᑦ ᑲᒪᒋᔭᖃᖅᑐᑦ ᑕᒪᐃᓐᓂᒃ ᐆᒪᔪᓕᒫᓅᖓᔪᓂᒃ ᑐᕌᖓᔪᓂ ᓄᓇᕕᒻᒥ ᐃᒪᕐᒥᐅᑕᓂᑦ ᐃᓂᐅᔪᒥ.

ᓄᓇᑖᓂᕐᒧᑦ ᐊᖏᕈᑎ ᓴᖅᑮᓚᐅᕐᒥᔪᖅ ᐊᒥᓱᓂᑦ ᐊᐅᓚᑦᑎᓂᕐᒧᑦ ᐸᕐᓇᐃᓂᕐᒧᓪᓗ ᑲᑎᒪᔨᓂᑦ.

ᓄᓇᕗᑦ

 ᓄᓇᕗᑦ ᐊᖏᓂᖓ ᐊᑕᐅᓯᕐᒥᑦ−ᑕᓪᓕᒪᐅᔪᓂ ᑲᓇᑕᐅᑉ ᓄᓇᓕᒫᖓᓂ, 60-ᖓᓃᑦᑐᖅ ᓴᓂᒧᖔᖅ ᑭᒡᓕᓕᐅᙳᐊᖅᓯᒪᔪᒃᑯᑦ ᐅᐊᖕᓇᖓᓂ 82-ᖓᓃᑦᑐᒧᑦ. ᑖᓐᓇ ᓄᓇᕗᒻᒥ ᓄᓇᑖᕐᓂᒃᑯᑦ ᐊᖏᕈᑎ (NLCA), ᐊᖏᓂᖅᐹᖑᔪᖅ ᓄᓇᑖᓂᕐᒧᑦ ᐊᖏᕈᑎ ᑲᓇᑕᓕᒫᒥ ᐊᑐᖅᑕᐅᓂᑰᔪᓂ, ᐊᑎᓕᐅᖅᑕᐅᔪᔪᖅ 1993-ᒥ, ᑕᐃᑲᓂᔅᓴᐃᓐᓇᖅ ᐊᕐᕌᒍᒥ ᑖᓐᓇ ᓄᓇᕗᒻᒥ ᒪᓕᒐᕐᒥ ᐊᑎᓕᐅᖅᑎᓪᓗᒋᑦ. ᑖᒃᑯᐊ ᐊᖏᕈᑎᑦ ᐊᖅᑯᓯᐅᓚᐅᖅᑐᑦ ᓴᖅᑮᓂᕐᒥᑦ ᓄᑖᒥ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᒥ ᓄᓇᕗᒻᒥ ᐊᐃᕐᕆᓕ 1, 1999-ᒥ.

ᓄᑕᑖᓂᕐᒧᑦ ᐊᖏᕈᑎ ᑐᕌᖓᕗᖅ ᓄᓇᕗᒻᒥ ᐊᖏᖃᑎᒌᒍᑎᑖᒧᑦ ᓄᓇᖁᑎᒋᔭᐅᔪᓄᑦ (NSA), ᐃᓚᖃᖅᐳᖅ ᐃᒪᕐᒥ, 12 ᒪᐃᔪᓪᓂᒃ ᐅᖓᓯᖕᓂᓪᓕᖕᒥᑦ ᓯᒡᔭᖅᐸᓯᖓᓂ, ᓄᓇᒥᓪᓗ. ᓄᓇᕗᑦ ᑐᖖᒐᕕᒃᑯᑦ (NTI), ᓴᖅᑭᑕᐅᔪᔪᑦ 1993-ᒥ, ᑲᒪᒋᔭᖃᓲᑦ ᑮᓇᐅᔭᕐᓂᒃ ᐊᖏᕈᑕᐅᓯᒪᔪᓂᒃ ᑐᓐᓂᖅᓴᖅᑕᐅᕙᒡᓗᑎᑦ ᐊᒻᒪ ᐊᑎᓕᐅᓚᐅᖅᑐᓕᒫᑦ ᑲᔪᓯᑦᑎᐊᑎᑦᑎᓗᑎ ᐱᓕᕆᔭᕆᐊᖃᖅᑕᒥᓂᒃ, ᐃᓚᒋᓪᓗᓂᐅᒃ ᑲᒪᑦᑎᐊᓂᕐᒥᑦ ᓄᓇᕗᒻᒥ ᐊᖏᖃᑎᒌᒍᑎᑖᒧᑦ ᓄᓇᖁᑎᒋᔭᐅᔪᓄᑦ ᑭᒡᓕᓕᐅᖅᑕᐅᓯᒪᔪᓂ.

ᓄᓇᕗᒻᒥ ᐊᕕᒃᑐᖅᓯᒪᓂᐅᔪᓂ ᐱᐅᖅᓱᐊᓂᕐᒧᑦ ᑲᑎᒪᔨᖃᖅᑐᑦ, ᐊᕕᒃᑐᖅᓯᒪᓂᐅᔪᓂ ᐊᕕᒃᑐᖅᓯᒪᒃᑲᓐᓂᖅᑐᓂ ᐊᒻᒪ ᓄᓇᓕᖕᓂ ᓯᕗᓕᖅᑎᓂ:

ᐱᓕᕆᔨᓄᑦ ᑐᓴᐅᒪᖃᑦᑕᐅᑎᒌᒍᑎᓂᑦ ᐱᓕᕆᕝᕕᓂᑦ ᓄᓇᕗᒻᒥ ᐱᐅᖅᓱᐊᖃᑎᒌᒃᐸᒃᑐᑦ. ᑕᓪᓕᒪᓂ ᐱᓕᕆᕕᐅᔪᓂᑦ ᐃᓄᓕᒫᓄᑦ ᒐᕙᒪᐅᔪᓂᑦ (IPG) ᐊᑕᐅᓯᕐᒥᒡᓗ ᒐᕙᒪᐅᙱᑦᑐᒥ ᑲᑐᔾᔨᖃᑎᒌᖑᔪᑦ ᑭᒡᒐᖅᑐᐃᔨᖃᖅᖢᑎᒃ ᐊᑐᓂ ᐱᓕᕆᕕᐅᔪᓂᑦ ᐃᓄᓕᒫᓄᑦ ᒐᕙᒪᐅᔪᓂᑦ.

ᓄᓇᕗᑦ ᐊᒡᒍᖅᓯᒪᔪᖅ ᐱᖓᓱᓄᑦ ᒥᑭᓐᓂᖅᓴᓄᑦ ᐊᕕᒃᑐᖅᓯᒪᓂᐅᔪᓂᑦ ᐊᑐᓂ ᐃᓄᖕᓄᑦ ᑲᑐᔾᔨᖃᑎᖃᖅᖢᑎᒃ:

  • ᕿᑎᕐᒥᐅᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ
  • ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ
  • ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ

ᑭᖑᓪᓕᕐᒥ, ᓄᓇᓕᐅᔪᓂ, ᐊᖑᓇᓱᒃᑎᑦ ᒥᑭᒋᐊᕐᓂᐊᖅᑏᓪᓗ ᑲᑐᔾᔨᖃᑎᒌᖑᔪᓂ ᐱᑕᖃᐅᖅᑐᑦ ᐊᑐᓂ ᓄᓇᓕᐅᔪᓂ.

ᐃᓄᕕᐊᓗᐃᑦ ᐊᖏᖃᑎᒌᒍᑎᑖᕐᓂᕐᒧᑦ ᐊᕕᒃᑐᖅᓯᒪᔪᓄᑦ

ᐃᓄᕕᐊᓗᐃᑦ ᐊᖏᖃᑎᒌᒍᑎᑖᕐᓂᕐᒧᑦ ᐊᕕᒃᑐᖅᓯᒪᔪᓄᑦ (ISR) ᐅᐊᓕᓂᖅᐸᓯᖓᓃᑦᑐᖅ ᐃᓄᐃᑦ ᓄᓇᖁᑎᖏᓐᓂ ᐊᖏᕐᕋᕆᔭᐅᓪᓗᓂ ᐱᖓᓲᔪᖅᑐᓄᑦ ᓄᓇᓕᖕᓄᑦ ᓄᓇᒦᑦᑐᓂ ᐊᒻᒪ ᐃᒃᑲHᐆᒃ ᐊᒻᒪ ᑮᓕᓂᖅ ᕿᑭᖅᑕᖏᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᕿᑭᖅᑕᖁᑎᖏᓐᓂ.

ᐃᓄᕕᐊᓗᐃᑦ ᑭᖑᓪᓕᖅᐹᒥ ᐊᖏᕈᑎᖓ (IFA) ᐊᑎᓕᐅᖅᑕᐅᔪᔪᖅ 1984-ᒥ, ᐃᓄᕕᐊᓗᖕᒥᐅᑦ ᐱᔪᓐᓇᐅᑎᖃᖅᑐᑦ ᓄᓇᐅᑉ ᖄᖓᓄᑦ ᐊᑖᓄᓗ ᐊᕕᒃᑐᖅᓯᒪᓂᐅᔪᒥ. ᐃᓄᕕᐊᓗᐃᑦ ᑭᖑᓪᓕᖅᐹᒥ ᐊᖏᕈᑎᖓ ᓴᖅᑮᓚᐅᖅᑐᑦ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᐅᔪᓂ ᑯᐊᐳᕇᓴᓐᒥ ᐊᐅᓚᑦᑎᓂᕐᒧᑦ ᓄᓇᒥ ᑮᓇᐅᔭᕐᓂᓪᓗ ᓴᓂᕐᕙᒃᑕᐅᔪᓂ ᐊᖏᕈᑎᒥ ᐊᒻᒪ ᒪᓕᒐᖅᑎᒍᑦ ᑭᒡᒐᖅᑐᐃᓂᕐᒥᑦ ᐃᓄᕕᐊᓗᖕᒥᐅᓂᑦ ᐃᓄᕕᐊᓗᐃᑦ ᐊᖏᖃᑎᒌᒍᑎᑖᕐᓂᕐᒧᑦ ᐊᕕᒃᑐᖅᓯᒪᔪᓄᑦ. ᐊᑐᓂ ᓄᓇᓕᐅᔪᑦ ᐃᓛᒃᑯᖓᔪᓂᒃ ᑯᐊᐳᕇᓴᖁᑎᖃᐅᖅᑐᑦ.

ᐃᓄᕕᐊᓗᐃᑦ ᑭᖑᓪᓕᖅᐹᒥ ᐊᖏᕈᑎᖓ ᐋᖅᑭᒃᓱᐃᓚᐅᕐᒥᔪᑦ ᑲᑐᔾᔨᖃᑎᒌᒃᑐᓂᑦ ᐃᓄᕕᐊᓗᐃᑦ ᑲᑐᔾᔨᖃᑎᒌᒃᑯᖏᓐᓂᒃ ᐊᒻᒪ ᐊᐅᓚᑦᑎᖃᑎᒌᒃᑐᓂᑦ ᑲᑎᒪᔨᓂᑦ. ᐊᐅᓚᑦᑎᖃᑎᒌᒃᑐᑦ ᑲᑎᒪᔩᑦ ᐃᓚᖃᖅᑐᑦ ᑭᒡᒐᖅᑐᐃᔨᐅᔪᓂᒃ ᑕᒪᒃᑮᓐᓂ ᐃᓄᕕᐊᓗᐃᑦ ᐊᖑᓇᓱᒃᑎᒃᑯᑦ ᑲᑐᔾᔨᖃᑎᒌᒃᑯᖏᓐᓂ, ᐃᓚᖃᖅᖢᑎᒃ ᐊᑕᐅᓯᕐᒥ ᐃᓚᒋᔭᐅᔪᒥ ᓄᓇᓕᐅᔪᓂ ᐆᒪᔪᕐᓂᐊᖅᑎᒃᑯᑦ ᒥᑭᒋᐊᖅᑎᐅᔪᓪᓗ ᑲᑎᒪᔨᕋᓛᖏᓐᓂ (HTC), ᑭᒡᒐᖅᑐᐃᔨᓂᒡᓗ ᑲᓇᑕᒥ ᐊᕕᒃᑐᖅᓯᒪᓂᐅᔪᓄᑦ ᒐᕙᒪᒃᑯᖏᓐᓂᓪᓗ.