ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓃᑦᑐᖅ ᑲᓇᖕᓇᒃᐸᓯᐊᓂ, ᑕᓪᓗᕈᑎᐅᑉ ᐃᒪᖓ, ᖃᐅᔨᒪᔭᐅᖕᒥᔪᖅ ᑕᓪᓗᕈᑎᐅᑉ ᐃᒪᖓᓐᓂ, ᐃᓂᒋᔭᐅᕗᖅ ᐱᐅᔪᒻᒪᕆᐊᓗᖕᓂᒃ ᑲᖏᖅᖢᒃᑎᐊᕙᖕᓂᒃ, ᐃᓐᓈᕈᖕᓂᒃ ᐊᒻᒪ ᓯᕐᒥᐊᓗᖕᓂᒃ ᐊᖏᕐᕋᕆᔭᐅᔪᖅ ᐃᓄᖕᓄᑦ ᐃᓅᓯᒪᓪᓗᑎ ᐆᒪᔪᖁᑎᖃᑦᑎᐊᕐᓂᖏᓐᓄᑦ. ᐃᓕᑕᕆᔭᐅᓯᒪᔪᖅ ᐊᕙᑎᓕᕆᓂᕐᒧᑦ ᐊᒻᒪᓗ ᐱᖅᑐᓯᑐᖃᑦ ᐱᒻᒪᕆᐅᓂᖏᓐᓂᒃ, ᑕᓪᓗᕈᑎᐅᑉ ᐃᒪᖓ ᐃᓂ ᒪᑯᓄᖓ ᐳᐃᔨᓄᑦ ᓴᐳᒻᒥᓂᕐᒥᑦ ᐊᒻᒪᓗ ᑲᓇᑕᓕᒫᒥ ᐳᐃᔨᓄᑦ ᓴᐳᒻᒥᕕᑦ ᐃᓚᐃᑦ ᐃᒪᓐᓇ ᓴᐳᔾᔨᖃᑦᑕᖅᑐᑦ ᓇᖕᒥᓂᖅ ᐃᒪᖏᓐᓂᒃ ᒪᑯᓄᖓ ᓯᕗᓂᒃᓴᒃᑎᓄᑦ ᓄᑕᖅᑲᑦᑎᓐᓄᑦ ᐱᓪᓗᒋᑦ.
ᐱᑕᖃᐅᑦᑎᐊᖅᑐᖅ ᐃᒪᕐᒥᐅᑕᓂᑦ ᐆᒪᔪᐃᑦ ᓇᔪᒐᖃᕐᕕᖏᑦ ᖃᓄᐃᙱᑦᑎᐊᕐᓂᖏᓐᓂ
ᐅᐱᕐᖓᒃᓵᑕᒫᑦ ᐊᒻᒪ ᐅᑭᐊᒃᓵᒃᑯᑦ, ᐊᒥᓱᐊᓗᐃᑦ ᑑᒑᓖᑦ ᐊᒻᒪ ᐊᕐᕖᑦ ᐃᖏᕐᕋᕙᒃᑐᑦ ᑕᓪᓗᕈᑎᐅᑉ ᐃᒪᖓᒍᑦ. ᕿᓚᓗᒐᐃᑦ ᐅᑎᕐᓂᖏᑦ ᓇᓗᓇᐃᕆᕗᖅ ᐊᖑᓇᓱᖕᓂᕐᒧᑦ ᒪᒃᐱᖓᓂᖓᓂ ᑕᓪᓕᒪᐅᔪᓄᑦ ᓄᓇᓕᖕᓄᑦ ᑕᓪᓗᕈᑎᐅᑉ ᐃᒪᖓᑕ ᖃᓂᒋᔭᖓᓃᑦᑐᓄᑦ: ᒥᑦᑎᒪᑕᓕᒃ, ᐊᐅᓱᐃᑦᑐᖅ, ᑲᖏᖅᑐᒑᐱᒃ, ᖃᐅᓱᐃᑦᑐᖅ ᐊᒻᒪ ᐃᒃᐱᐊᕐᔪᒃ. ᕿᓚᓗᒐᕋᓱᐊᕐᓂᖅ, ᓇᑦᑎᕋᓱᐊᕐᓂᖅ ᐊᓯᖏᓪᓗ ᐃᒪᕐᒥᐅᑕᓂᑦ ᐳᐃᔨᓂ ᐱᒻᒪᕆᐅᖃᑕᐅᕗᖅ ᐃᓄᐃᑦ ᐃᓕᖅᑯᓯᓄᑦ “ᓂᕿᓕᖅᑕᖁᑎᖏᓐᓄᑦ” ᑎᒥᒧᑦ ᐃᑲᔫᑎᖃᒻᒪᕆᒃᑐᖅ ᐅᑭᐅᖅᑕᖅᑐᕐᒥᐅᓄᑦ.
ᑕᓪᓗᕈᑎᐅᑉ ᐃᒪᖓᓂ, ᓴᕐᕙᐃᑦ, ᐅᕝᕙᓘᓐᓃᑦ ᓯᑯᓱᐃᑦᑐᑦ ᐃᓂᐅᔪᑦ ᓯᑯᓄ ᐊᕙᓗᓯᒪᔪᑦ, ᐃᓂᒃᓴᑦᑎᐊᕙᐅᔪᖅ ᐆᒪᔪᓄᑦ ᓂᕆᓂᐊᕐᒪᑕ, ᓄᓕᐊᕐᓗᑎ ᐊᒻᒪ ᐅᑭᐅᕐᓗᑎ ᑕᐅᕙᓂ. ᓴᕐᕙᓂ, ᐆᓇᔪᒃᑐᓂ ᐃᒪᓂ ᐊᒻᒪ ᓯᕿᓐᓂᖃᑦᑕᕐᓂᖓ ᐆᒪᒃᑎᑦᑎᒻᒪᕆᖕᒪᑦ ᐃᒪᕐᒥᐅᑕᑦ ᓅᒍᓐᓇᖏᑦᑐᑦ ᐃᒻᒥᓂᒃ ᐆᒪᑎᑦᑎᓲᑦ ᐅᑭᐅᖅᑕᖅᑐᒥ ᐆᒐᕐᓂᒃ, ᓂᕆᔭᐅᕙᒃᑐᑦ ᐃᒪᕐᒥᐅᑕᓂᑦ ᐳᐃᔨᓄᑦ. ᐊᑕᐅᓯᕐᒥᑦ ᐱᖓᓱᓂᒃ ᑲᓇᑕᒥ ᒥᐊᓕᒐᐅᓪᓗ ᐊᕐᕕᖁᑎᖏᑦ, ᐊᑦᑕᕐᓇᖅᑐᒦᓕᕐᓂᕋᖅᑕᐅᓚᐅᖅᓯᒪᔪᑦ ᐊᕐᕕᐅᔪᑦ, ᓇᑦᑏᑦ ᖃᐃᕈᓖᑦ ᐊᒻᒪ ᐅᒡᔪᐃᑦ ᐊᒻᒪ 85 ᐳᓴᓐᑎᒥᑦ ᓯᓚᕐᔪᐊᑉ ᑑᒑᓕᖁᑎᖏᑦ ᐊᐅᔭᒃᑯᑦ ᑕᓪᓗᕈᑎᐅᑉ ᐃᒪᖓᓃᖃᑦᑕᖅᑐᑦ ᑖᕙᓂ ᓂᕆᕙᒃᖢᑎ, ᕿᑐᕐᖏᐅᖅᐸᒃᖢᑎ ᑕᖃᐃᖅᓯᕙᒃᖢᑎᒡᓗ. ᐅᓄᖅᑐᐊᓗᐃᑦ ᐊᒃᐸᓕᐊᕐᔪᐃᑦ, ᑲᓇᑕᐅᑉ ᐊᒃᐸᖏᑦ, ᑎᕋᑎᕌᑦ, ᐱᑦᑎᐅᓛᑦ, ᑕᕆᐅᕐᒥᐅᑕᑦ ᒥᑏᑦ ᐊᒻᒪ ᐅᑭᐅᖅᑕᖅᑐᕐᒥᐅᑦ ᖃᖁᓪᓗᐃᑦ ᓂᕆᕙᖕᒥᔪᑦ ᐃᕙᕙᒃᖢᑎᓗ ᑕᒫᓂ ᐃᓂᐅᔪᒥ.
ᐊᖅᑯᑎᒃᓴᖅ ᓴᐳᔾᔨᓯᒪᓂᕐᒧᑦ
ᐊᕐᕌᒍᑦ ᐊᕙᑎᐸᓗᖕᓄᑦ, ᓂᐅᕐᕈᑎᖃᕈᒪᔪᑦ ᑐᓗᖃᑦᑕᖅᓯᒪᔪᑦ ᑕᐃᒃᑯᓄᖓ ᓴᐳᔾᔨᔪᒪᔪᓂ ᑕᓪᓗᕈᑎᐅᑉ ᐃᒪᖓᓂ. 1960 ᐃᓱᕈᔪᖏᓐᓂ, ᑲᓇᑕᐅᑉ ᒐᕙᒪᑐᖃᒃᑯᖏᑦ ᐊᖏᓚᐅᖅᑐᑦ ᐅᖅᓱᐊᓗᖕᒧᑦ ᕿᓂᕐᓂᕐᒧᑦ ᐸᐃᐹᑦ ᐱᓕᕆᒋᐊᕈᓐᓇᐅᑎᓂᒃ 14 ᒥᓕᔭᓐᓂᒃ ᓯᒡᔭᒃᐸᓯᖕᒦᖏᑦᑐᓂ ᐊᐃᑲᓄᑦ ᑕᓪᓗᕈᑎᐅᑉ ᐃᒪᖓᑕ ᐃᓯᕆᐊᕐᕕᖓᓂ 12ᓄᑦ ᐅᖅᓱᐊᓗᓕᕆᔨᓄᑦ ᓇᖕᒥᓂᕆᔭᐅᔪᓄᑦ. ᒐᕙᒪᒃᑯᑦ ᑕᐃᒪᐃᓕᐅᓚᐅᖅᑐᑦ ᐅᖃᖃᑎᖃᕋᑎ ᐃᓄᐃᑦ ᓄᓇᓕᖏᓐᓂᒃ. 1974-ᒥ, ᓯᕗᓪᓕᖅᐹᖅ ᖃᐅᔨᓴᕐᓂᕐᒧᑦ ᐅᖅᓱᐊᓗᖕᒧᑦ ᓂᐅᖅᑐᖅᑕᐅᓚᐅᖅᑐᖅ 914 ᐆᒃᑑᑎᓄᑦ, ᐃᑎᓂᖓ ᑎᑭᑕᐅᓚᐅᖅᓯᒪᙱᑦᑐᖅ ᐅᑭᐅᖅᑕᖅᑐᒥ.
ᐃᓄᐃᑦ ᓄᓇᓕᖏᑦ ᐊᑭᕋᖅᑐᖅᑐᒻᒪᕆᐅᓚᐅᖅᑎᓪᓗᒋᑦ, ᒐᕙᒪᒃᑯᑦ ᐅᖃᖃᑎᖃᓚᐅᖅᑐᑦ ᓄᓇᓖᑦ ᓯᕗᓕᖅᑎᖏᓐᓂᒃ ᐊᒻᒪ ᐊᖏᓂᖅᓴᒥ ᐊᕕᒃᑐᖅᓯᒪᓂᐅᔪᓂ ᖃᐅᔨᓴᓕᓚᐅᖅᑐᑦ. 1987-ᒥ, ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᓴᖅᑮᖁᔨᓚᐅᖅᐳᑦ ᑲᓇᑕᒥ ᑕᕆᐅᕐᒥ ᐱᐅᖅᓱᐊᓂᕐᒧᑦ ᐃᓂᐅᔪᒥ ᑕᓪᓗᕈᑎᐅᑉ ᐃᒪᖓᓐᓂ ᐊᒻᒪ ᐊᔪᕐᓇᕋᔭᙱᓐᓂᖓᓂ ᖃᐅᔨᓴᓯᒋᐊᓚᐅᖅᑐᑦ. ᐊᑎᓕᐅᖅᓯᒪᓕᖅᑎᓪᓗᒋᑦ ᑖᔅᓱᒥᖓ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥ 1993-ᒥ, ᐅᖃᖃᑎᖃᕐᓂᖅ ᐃᓄᐃᑦ ᓄᓇᓕᖏᓐᓂ ᖃᐅᔨᓚᐅᖅᐳᑦ ᐃᑲᔪᖅᓱᖅᑐᒻᒪᕆᐅᓂᖏᓐᓂᒃ ᑕᓪᓗᕈᑎᐅᑉ ᐃᒪᖓᓐᓂ ᐅᓗᕆᐊᓇᖅᑐᓄᑦ ᐅᖅᓱᐊᓗᖕᒧᑦ ᒑᓯᒥᓪᓗ ᖃᓄᐃᓕᐅᕈᑕᐅᔪᓂ.
2009-ᒥ, ᒐᕙᒪᑐᖃᒃᑯᑦ ᓇᓗᓇᐃᖅᓯᓚᐅᖅᑐᑦ ᑲᓇᑕᐅᒥ$5 ᒥᓕᔭᓐᓂᒃ ᐊᔪᕐᓇᕋᔭᙱᓐᓂᖓᓂ ᖃᐅᔨᓴᕐᓂᕐᒥᑦ ᑲᓇᑕᒥ ᐃᒪᕐᒥᐅᑕᓂᑦ ᒥᕐᖑᐃᖅᓯᕐᕕᖕᒧᑦ. ᐊᕐᕌᒍ ᐊᓂᒍᖕᒪ, ᐊᑭᐅᖅᑎᑦᑎᓂᒃᑯᑦ ᖃᐅᔨᓴᕐᓂᕐᒧᑦ ᐅᖅᓱᐊᓗᒃᓴᓂ ᐊᒻᒪ ᒑᓯᓂᒃ ᐱᔾᔪᑎᒃᓴᓂᑦ ᑲᔪᓯᑎᑕᐅᓂᐊᓚᐅᖅᑐᖅ ᑕᓪᓗᕈᑎᐅᑉ ᐃᒪᖓᓂ. ᐃᓄᐃᑦ ᓄᓇᓕᖏᑦ ᖃᓂᑦᑐᒦᑦᑐᑦ ᐊᑭᕋᖅᑐᓚᐅᖅᑐᑦ ᖃᐅᔨᓴᕐᓂᐅᔪᒥᑦ ᐊᒻᒪ ᐃᖅᑲᖅᑐᐃᕕᑎᒍᑦ ᐊᔪᖏᔾᔪᑎᒥ ᐱᓚᐅᖅᑐᑦ ᐋᒍᔅᑎ 2010-ᒥ ᓄᖅᑲᑎᑦᑎᓂᕐᒧᑦ ᖃᐅᔨᓴᕐᓂᐅᔪᓂᑦ. ᑎᓯᐱᕆᒥ ᑕᐃᑲᓂ ᐊᕐᕌᒍᒥ, ᒐᕙᒪᑐᖃᒃᑯᑦ ᑭᒡᓕᐅᔪᓂᒃ ᓇᓗᓇᐃᖅᓯᓚᐅᖅᑐᑦ ᑲᓇᑕᒥ ᑕᕆᐅᕐᒥ ᐱᐅᖅᓱᐃᓂᕐᒧᑦ ᐃᓂᐅᔪᒧᑦ ᐋᔩᖃᑎᖃᓕᖅᖢᑎᒡᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂ.
2015-ᒥ, ᕈᐃᔪᓪ ᑕᑦᔅ ᓯᐊᓪ ᓄᖅᑲᖅᑎᑦᑎᓚᐅᖅᑐᑦ ᐅᖅᓱᐊᓗᖕᒧᑦ ᐊᑐᖅᑐᐊᖅᑕᒥᓂ ᑕᓪᓗᕈᑎᐅᑉ ᐃᒪᖓᑕ ᑲᓇᖕᓇᒃᐸᓯᐊᓂ, ᓴᐳᔾᔭᐅᓯᒪᔪᖅ ᐃᓂᐅᔪᖅ ᐊᖏᒡᓕᒋᐊᖅᑕᓪᓗᓂ 41,000 ᑭᑉᐸᕆᒃᑐᑦ ᑭᓛᒥᑕᓂᒃ 109,000 ᑭᑉᐹᕆᒃᑐᓂ ᑭᓛᒥᑕᓄᑦ.
ᑕᓪᓗᕈᑎᐅᑉ ᐃᒪᖓᑕ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᖃᓄᐃᑦᑑᓂᖏᓐᓂ ᐱᒻᒪᕆᐅᓂᖓ ᓯᓚᕐᔪᐊᓕᒫᒥ ᐃᓕᓴᕆᔭᐅᔪᑦ, ᓴᐳᔾᔨᔪᒪᓪᓗᑎ ᐃᓂᐅᔪᒥ ᓯᓚᕐᔪᐊᓕᒫᒥᑦ ᐆᒪᔪᖃᕐᕕᐅᓗᓂ ᐊᒻᒪ ᓯᓚᕐᔪᐊᕐᒥᐅᑦ ᑲᑐᔾᔨᖃᑎᒌᒃᑯᖏᓐᓄᑦ ᐱᖅᑯᓯᑐᖃᕐᕕᐅᓗᓂ. ᐅᑭᐅᖓᓂ 2019, ᐃᓄᐃᑦ ᐊᒻᒪᓗ ᖃᓇᑕ ᐊᑎᓕᐅᓚᐅᖅᑐᑦ ᐊᓐᖏᕈᑎᒥᑦ ᓴᑭᑎᑦᑎᔾᔪᑎ ᐅᑯᓄᖓ ᑕᓪᓗᕈᑎᐅᑉ ᐃᒪᖓ ᑲᓇᑕᒥ ᑕᕆᐅᕐᒥ ᐱᐅᖅᓱᐃᓂᕐᒧᑦ ᐃᓂᐅᔪᖅ ᐃᒪᓐᓇᓗ ᓴᐳᒻᒥᓂᐊᖅᑐᑦ ᑕᒪᑦᓱᒧᖓ ᐊᒃᖢᐃᖁᔨᕐᓂᕐᒥᑦ ᐳᐃᔨᖃᕐᓂᕐᒥᑦ ᐱᕈᖅᐸᓪᓕᐊᖃᑦᑕᖅᑐᓄᓪᓗ ᐊᒻᒪᓗ ᐃᑲᔪᕈᑕᐅᓗᓂ ᐅᓗᕆᐊᓇᖅᑎᑦᑎᑦᑕᐃᓕᐃᓂᕐᒥᑦ ᓯᓚᑦ ᐊᓯᔾᓕᖅᐸᓪᓕᐊᓂᐊᓄᑦ.
ᐱᕕᖃᖅᑎᑦᑎᓂᖅ
ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐃᑲᔪᖅᓱᖅᑐᑦ ᒪᕐᕉᓪᓗᐊᑕᕐᓂᒃ ᐊᒃᓱᕈᕈᑕᐅᔪᓂᒃ ᐃᒪᕐᒥᐅᑕᓂᑦ ᐊᒻᒪ ᓄᓇᓕᖕᓂ ᓴᐳᔾᔨᓯᒪᓂᕐᒧᑦ ᑕᒡᕙᓂ ᐃᓂᐅᔪᒥ:
- ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐃᑲᔪᖅᓱᖅᐳᑦ ᐊᒃᓱᕈᕈᑕᐅᔪᓂ ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ ᐊᑐᓕᖅᑎᑦᑎᓂᕐᒥᑦ ᑕᓪᓗᕈᑎᐅᑉ ᐃᒪᖓ (ᑕᓪᓗᕈᑎᐅᑉ ᐃᒪᖓ) ᐆᒃᑑᑎᐅᓗᓂ ᑲᓇᑕᒥ ᑕᕆᐅᕐᒥ ᐱᐅᖅᓱᐃᓂᕐᒧᑦ ᐃᓂᐅᔪᖅ ᐊᑐᓕᖃᓯᐅᑎᔪᒥ ᐃᓄᐃᑦ ᖃᐅᔨᒪᔭᖏᓐᓂᒃ ᐊᔪᙱᑕᖏᓐᓂᒡᓗ.
- ᐊᑕᐅᑦᑎᒃᑯᑦ, ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐃᑲᔪᖅᓱᖅᑐᖅ ᐅᒥᐊᕐᔪᐊᒃᑰᖅᑎᑦᑎᓂᕐᒧᑦ ᐱᐅᓯᕆᔭᐅᔪᓂ ᑕᐃᑲᓂ ᓄᓘᔮᑦ ᐅᔭᕋᖅᑕᕆᐊᕐᕕᖓᓐᓂ ᐊᒃᑐᐃᓂᖃᕈᓐᓇᙱᑦᑐᖅ ᐊᖑᓇᓱᒃᑕᐅᕙᒃᑐᑐᖃᕐᓂᒃ ᐃᒪᕐᒥᐅᑕᓂᑦ ᐳᐃᔨᓂ ᐊᒻᒪ ᑎᖕᒥᐊᓂ ᑲᑎᙵᐅᖅᑐᓂ ᐅᕝᕙᓘᓐᓃᑦ ᐱᐅᔪᓐᓃᖅᑎᑦᑎᔪᓐᓇᙱᑦᑐᖅ ᑕᕆᐅᑉ ᓯᑯᖓᓐᓂ ᓄᓇᓕᖕᒥᐅᑦ ᐊᖅᑯᑎᒋᕙᒃᑕᖏᓐᓂ.
ᐊᑐᖅᑕᐅᔪᓐᓇᖅᑐᑦ ᐃᓚᒋᔭᐅᔪᑦ
Tallurutiup Imanga
Poetry and images explain why Lancaster Sound, known now as Tallurutiup Imanga, needs to be protected.
Video © The Pew Charitable Trusts and Ducks Unlimited.