ᑖᓐᓇ ᐅᐊᖕᓇᖓᓂᑦ ᑕᕆᐅᒥᑦ ᐊᐅᒃᑲᕐᓂᖅ, ᑕᐃᔭᐅᔪᖅ ᓴᕐᕙᕐᔪᐊᖅ ᐃᓄᒃᑎᑯᑦ ᐊᒻᒪᓗ ᐱᑭᐊᓗᓱᕐᓱᐊᖅ ᐊᑯᑭᑦᑐᓂᑦ, ᓄᓇᕐᔪᐊᒥᑦ ᐃᕐᓂᐅᕐᕕᐅᓂᖅᐹᖑᓪᓗᓂ ᑕᕆᐅᒥᑦ ᐆᒪᔪᑦ ᓇᔪᒐᖓᑦ. ᓯᑯᓱᐃᑦᑐᖅ ᐃᓂᖓᑕ ᐃᓚᖓᓂ ᐊᕙᓗᑕᐅᓯᒪᓪᓗᓂ ᓯᑯᒧᑦ ᓴᓐᓂᓕᕈᑎᐅᑉ ᐃᒪᖓᑕ ᐅᐊᖕᓇᖓᓂ, ᐃᑲᔪᖅᓱᓲᖅ ᐊᒥᓱᓂᑦ ᐃᒪᕐᒥᐅᑕᓂᑦ ᐳᐃᔨᓂ, ᐃᓚᒋᓪᓗᓂᒋᑦ ᑑᒑᓖᑦ, ᐊᐃᕖᑦ, ᓇᑦᑏᑦ ᓇᓄᐃᓪᓗ, ᑕᕆᐅᕐᒥᐅᑕᑦ ᑎᖕᒥᐊᓂᒡᓗ ᐊᔾᔩᒌᙱᑦᑐᓂᒡᓗ ᐃᖃᓗᖕᓂ. 85,000 ᑭᑉᐹᕆᒃᑐᓂ ᑭᓛᒥᑕᓂ ᐊᖏᓂᖃᖅᑐᓂ, ᐅᑭᐅᖅᑕᖅᑑᑉ ᐊᖏᓂᖅᐹᖓᑦ ᓴᕐᕙᒃ ᓇᔪᖅᑕᐅᔪᓄᑦ ᐆᒪᔪᓄᑦ ᐃᓂᒋᔭᐅᓲᖅ ᐊᕐᕌᒍᑕᒫᑦ ᐃᖏᕐᕋᓂᕆᕙᒃᑕᖏᓐᓄᑦ.

ᓂᒡᓕᓇᖅᑐᖅ ᐃᒪᖅ ᖄᖓᓅᕐᓂᖓ

ᐅᐱᕐᖓᒃᓵᑕᒫᑦ, ᓄᑖᒥ ᐃᓅᓯᕐᒥ ᓴᕐᕙᕐᔪᐊᖅ/ᐱᑭᐊᓚᓱᕐᓱᐊᕐᒥ (ᑐᑭᖃᖅᑐᖅ “ᓂᒡᓕᓇᖅᑐᖅ ᐃᒪᖅ ᖄᖓᓅᕐᓂᖓ”) ᐃᑲᔪᖅᓱᓲᖅ ᐆᒪᓂᖃᑦᑎᐊᖅᑐᒥ ᐅᑭᐅᖅᑕᖅᑑᑉ ᐊᓯᐊᑕ ᐃᓂᖏᓐᓂ. ᐆᒐᐃᑦ, ᑕᕆᐅᕐᒥᐅᑕᑦ ᑎᖕᒥᐊᑦ ᐊᒻᒪ ᐃᒪᕐᒥᐅᑕᓂᑦ ᐳᐃᔨᓂ ᐃᖏᕐᕋᔪᖃᓲᖅ ᓴᕐᕙᖓᓂ ᕿᒧᔅᓯᕌᖅᓱᐊᕐᒧᑦ ᐊᒻᒪ ᑕᓪᓗᕈᑎᐅᑉ ᐃᒪᖓᓐᓄᑦ, ᑲᓇᖕᓇᒥ ᐊᖅᑯᑎᐅᔪᖅ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓄᑦ, ᐅᖓᑖᓄᓗ.

ᓴᕐᕙᖅ ᑭᓲᖕᒪ?

ᓴᕐᕙᖅ ᐃᓂᒋᕙᐅᔪᖅ ᐊᕐᕌᒍᓕᒫᒥ ᓯᑯᓱᐃᖅᑐᖅ ᐊᕙᓗᑕᐅᓯᒪᓪᓗᓂ ᐅᖁᒪᐃᓐᓂᖅᓴᒧᑦ, ᐃᔾᔪᓂᖅᓴᒧᑦ ᓯᑯᓄᑦ. ᓴᕐᕙᐃᑦ ᐃᒪᕐᒥᐅᑕᓂᑦ ᐱᐅᔪᕐᔪᐊᕌᓗᐃᑦ ᐅᑭᐅᖅᑕᖅᑐᒥ, ᑎᒥᒧᑦ−ᐊᑑᑎᖃᑦᑎᐊᖅᑐᓂ ᐃᒪᖏᑦ ᓂᕆᕕᑦᑎᐊᕙᐅᔪᑦ, ᓄᓕᐊᕐᕕᑦᑎᐊᕙᑦ ᐊᒻᒪ ᐅᑭᐅᒃᑯᑦ ᐃᓂᒃᓴᑦᑎᐊᕙᑦ ᐊᔾᔨᒌᙱᑦᑐᓄᑦ ᐆᒪᔪᐃᑦ ᐊᔾᔨᒌᖕᓂᖏᓐᓄᑦ.

ᐅᐊᓐᓇᖓᓂ ᐃᒪᕐᒥ ᓴᕐᕙᖅ ᐃᒪᑦᑎᐊᕙᖕᒧᑦ ᑯᕕᕕᐅᓲᖅ ᐊᐅᑉᐸᓪᓕᐊᔪᓂ ᓯᕐᒥᓂ ᑲᓛᖦᓖᑦ ᓄᓈᓐᓂ ᐊᒻᒪ ᑲᓇᑕᒥ ᑲᑎᖃᑎᖃᓲᑦ ᐸᓯᕕᒃ ᐃᒪᖓᓂ ᑕᐃᑰᓈᓲᖑᓪᓗᑎ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓄᑦ ᐊᒻᒪ ᑕᓪᓗᕈᑎᐅᑉ ᐃᒪᖓᓐᓄᑦ. ᑖᒃᑯᐊ ᓂᒡᓕᓇᖅᑐᑦ ᐃᒪᐃᑦ ᑲᑎᖃᑎᖃᓲᑦ ᐆᓇᔪᓐᓂᖅᓴᓂ ᐊᑦᓛᓐᑎᒃᒥ ᐃᖏᕐᕋᓂᐅᔪᓂ ᑲᓛᖦᓖᑦ ᓄᓈᑦ ᓯᒡᔭᖅᐸᓯᖓᓂ.

ᓴᖅᑭᔮᕐᓂᖓ ᐅᐊᓐᓇᖓᓂ ᐃᒪᕐᒥ ᓴᕐᕙᖅ ᑕᐃᒪᐃᑦᑐᖅ ᓂᒡᓕᓇᖅᑐᒧᑦ, ᐅᑭᐅᖃᑦᑕᖅᑐᒥ ᓯᑯᖃᑦᑕᖅᑐᒥ ᑲᓇᑕᐅᑉ ᐅᒥᖕᒪᑦ ᓄᓈᓐᓂ ᐊᒻᒪ ᑲᓛᖦᓖᑦ ᓄᓈᓐᓂ. ᑖᓐᓇ ᓯᑰᓪᓗᓂ ᐃᑳᕈᑎ ᓄᖅᑲᖓᑎᑦᑎᔪᖅ ᐃᔾᔪᔪᓂ ᓯᑯᓂ ᐃᓯᕐᓂᕐᒥᑦ ᓴᕐᕙᖕᒧᑦ. ᐅᐊᖕᓇᔮᖅᑐᑦ ᐊᓄᕆᑦ ᑎᒃᑕᐅᑎᑦᑎᓲᑦ ᓯᑯᕙᓪᓕᐊᔪᓂ ᓴᕐᕙᖕᒥᑦ ᑕᐅᓄᖓ ᓂᒋᑉᐸᓯᐊᓄᑦ ᓯᑯᖃᖅᑎᑦᑎᖃᑦᑕᖏᑦᑐᖅ.

ᓯᕿᓐᓂᓕᒃᑲᓐᓂᓕᕋᐃᒻᒪ ᖁᑦᑎᒃᑐᒥ ᐅᑭᐅ ᐃᓱᐸᓗᐊᓂ, ᐆᒪᓂᖃᑦᑎᐊᓕᓲᖅ ᐅᐊᖕᓇᐅᑉ ᐃᒪᖓᓂ. ᑲᑎᖃᑎᒌᓂᖏᑦ ᓯᕿᓂᕐᓗ ᐊᒻᒪ ᓯᑯᖃᙱᑦᑐᖅ ᐃᒪᖅ − ᐱᐅᔪᒻᒪᕆᐅᔪᑦ ᓯᑯᓯᒪᕙᒃᑐᒥ ᑕᕆᐅᕐᔪᐊᕐᒥ − ᑐᑭᖃᖅᐳᖅ ᓯᕐᓂᕐᒥᙶᖅᑐᖅ ᐃᔅᓴᕈᑕᐅᓲᖅ ᐃᓯᖅᐸᓪᓕᐊᓲᖑᓪᓗᓂᓗ. ᑕᒪᓐᓇ ᓴᖅᑮᓲᖑᕗᖅ ᐊᕐᕌᒍᑕᒫᑦ ᐅᓄᖅᑐᐊᓗᖕᓂᒃ ᐃᒪᕐᒥᐅᑕᓂᒃ ᓅᑦᑐᓐᓇᙱᑦᑐᓂ ᐃᒻᒥᓂᒃ. ᐃᒪᕐᒥᐅᑕᐃᑦ ᐱᕈᖅᑐᑦ ᐊᑦᑕᑎᖃᙱᑦᑐᑦ ᓯᕿᓂᕐᒥᙶᖅᑐᒥ ᓂᕿᓕᐅᓲᖑᒻᒪᑕ ᐆᒪᔪᐃᑦ ᐊᔾᔨᒌᖕᓂᖏᑦ ᖁᑦᑎᓂᖅᓴᒦᑦᑐᓂ ᓂᕆᖃᑦᑕᐅᑎᓲᓂ. ᐃᖃᓗᐃᑦ, ᑕᕆᐅᕐᒥᐅᑕᑦ ᑎᖕᒥᐊᑦ ᐊᒻᒪ ᐃᒪᕐᒥᐅᑕᓂᑦ ᐳᐃᔩᑦ ᐅᑕᖅᑭᐅᖅᑐᐃᓐᓇᐅᓲᑦ ᐅᐱᕐᖓᒃᓵᒃᑯᑦ ᐃᒪᕐᒥᐅᑕᖅ ᓅᑦᑐᓐᓇᙱᑦᑐᖅ ᐃᒻᒥᓂᒃ ᐆᒻᒪᓯᒋᐊᕐᓂᖏᓐᓂ.

ᐃᓄᐃᑦ ᐅᑭᐅᖅᑕᖅᑑᑉ ᐃᒪᖓᓂᕐᒥᐅᑦ

ᓯᑯᓯᒪᔪᖅ ᐃᑳᕈᑎ ᐅᒥᖕᒪᑦ ᓄᓈᓐᓂ ᐊᒻᒪ ᐱᖓᓐᓇᒃᐸᓯᖓᓐᓄᑦ ᑲᓛᖦᓖᑦ ᓄᓈᓐᓂ ᐃᑲᔪᓚᐅᖅᑐᑦ ᓴᖅᑮᓂᕐᒥᑦ ᐅᐊᓐᓇᖓᓂ ᐃᒪᕐᒥ ᓴᕐᕙᖕᒥᑦ ᐃᓄᖕᓄᑦ ᐃᖏᕐᕋᕈᑕᐅᖃᑦᑕᑯᑖᖅᓯᒪᔪᖅ ᕼᐊᓇᓚᒐᓴᖕᓄᑦ ᐅᑭᐅᓄᑦ. ᕿᓪᓚᖅᓱᐊᖅ, 19-ᓴᓐᑐᕆᒥ ᐊᖓᒃᑰᓚᐅᖅᑐᖅ ᐊᒻᒪ ᐃᓄᖕᓄᑦ ᓯᕗᓕᖅᑎᐅᓪᓗᓂ, ᐊᐅᓪᓚᖅᐸᓚᐅᕐᒪᑦ ᒪᓕᒃᑎᖏᓪᓗ ᑖᕗᖓ ᓄᓇᕘᓂᕋᖅᑕᐅᓕᖅᑐᒧᑦ ᓯᑯᒃᑯᑦ ᐃᑳᕈᑎᒃᑯᑦ ᖄᓇᕐᒧᑦ ᑲᓛᖦᓖᑦ ᓄᓈᓐᓂ. ᐃᓕᓴᕆᔭᐅᓯᒪᕗᖅ ᓴᖅᑮᓂᕐᒥᑦ ᐊᓯᐅᔨᔭᐅᓯᒪᔪᓂ ᐊᑐᖅᑕᐅᓲᓂᒃ, ᐃᓚᒋᓪᓗᓂᐅᒃ ᖃᔭᖅ (ᑲᔭᒃ) ᐃᓄᖕᓄᑦ ᑕᐅᕙᓃᑦᑐᓂ.

ᐃᓄᐃᑦ ᓄᓇᓕᖏᑦ ᐃᒡᓗᒃᑐ ᐃᓂᐅᔪᓂ ᓴᓐᓂᓕᕈᑎᐅᑉ ᐃᒪᖓᓐᓂ  ᑐᙵᕕᖃᓲᖑᒻᒪᑕ ᐅᐊᓐᓇᖓᓂ ᐃᒪᕐᒥ ᓴᕐᕙᖓᓂ ᑭᓱᖃᐅᑦᑎᐊᕐᓂᖓᓄᑦ, ᐊᖑᓇᓱᓐᓂᕐᒧᑦ ᐆᒪᔪᓂ ᐃᖃᓗᒐᓱᓐᓂᕐᒥᓪᓗ. ᓄᓇᓕᐅᔪᑦ ᓴᕐᕙᐅᑉ ᖃᓂᒋᔮᓂ, ᓲᕐᓗ ᐊᐅᓱᐃᑦᑐᖅ ᐊᒻᒪ ᖄᓈᖅ, ᓄᓇᓕᕋᓛᓪᓗ ᕼᐊᓐᓇᓚᒐᓴᖕᓂ ᑕᐅᓴᓐᑎᒐᓴᖕᓂᒡᓗ ᐅᖓᓯᖕᓂᓖᑦ ᑮᓚᒥᑕᓂ, ᐃᑲᔪᖅᑕᐅᓲᑦ ᐆᒪᔪᐃᑦ ᐊᔾᔨᒌᖕᓂᖏᑦ ᑕᐃᑰᓇ ᐃᖏᕐᕋᕙᒃᑐᓂ. ᐊᑐᖃᑎᒌᓲᖑᓐᓂᖏᓐᓂ ᐅᑭᐅᖅᑕᖅᑑᑉ ᐃᒪᖓᓂ ᐱᒻᒪᕆᐅᔪᒥ ᓴᖅᑮᓯᒪᕗᖅ ᑲᓲᒪᖃᑎᒌᓂᕐᒥᑦ ᐃᓕᖅᑯᓯᖏᓐᓄᑦ ᓄᓇᕗᒻᒥ ᑲᓛᖦᓖᑦ ᓄᓈᓐᓂᓪᓗ.

ᐊᓯᔾᔨᐸᓪᓕᐊᓂᖏᑦ ᓯᑯᖏᑦ ᖃᓄᐃᓐᓂᕆᔭᖏᑦ

ᐅᐊᓐᓇᖓᓂ ᐅᑭᐅᒃᑯᑦᐃᒪᐅᖏᓐᓇᖅᑐᖅ ᑐᙵᕕᖃᓲᖅ ᓯᑰᑉ ᑕᐃᒫᔅᓴᐃᓐᓇᖅᐸᓐᓂᖓᓂ. ᐊᒥᓱᐊᖅᑎᒐᓚᖅᑐᓕ ᐊᒥᓱᓚᓐᓂᑦ ᖁᓕᒡᒍᑎᓂᑦ ᐊᕐᕌᒍᓂᑦ, ᓯᑯᒃᑯᑦ ᐃᑳᕐᕕᒃ ᓂᐅᔅ ᑕᕆᐅᖓ ᓯᑯᓯᒪᖏᑦᑐᖅ ᐅᑭᐅᒃᑯᑦ, ᓯᑯᓂᑦ ᖁᑦᑎᑦᑐᒦᖔᖅᑐᓂᑦ ᓂᒋᕐᒨᑎᑦᑎᕙᑦᑐᑦ ᐊᒻᒪ ᐃᓗᓪᓖᓗᑎ ᐃᒪᐅᖏᓐᓇᖅᑐᓂᑦ. ᐅᑭᐅᑕᖅᑐᖅ ᐅᖅᑰᓯᕙᓪᓕᐊᑎᓪᓗᒍ ᓯᓚᐅᑉ ᐊᓯᔾᔨᕐᓂᖓᓄᑦ, ᓯᑯ ᓵᓐᓂᖅᓴᐅᓕᖅᑐᖅ ᐊᒻᒪ ᐊᔾᔨᒌᖃᑦᑕᖏᓐᓂᖅᓴᐅᓕᖅᑐᑎᑦ, ᐊᒻᒪ ᓯᕗᓂᔅᓴᒥ ᓯᑯᒃᑯᑦ ᐃᑳᕐᕕᒃ ᓇᓗᓇᕈᑕᐅᔪᖅ. ᑖᒃᑯᐊ ᐊᓯᔾᔨᖅᑐᑦ ᖃᓄᐃᓐᓂᖃᖅᑎᑦᑎᔪᑦ ᐱᕈᖅᑐᓂᑦ ᐊᒻᒪ ᐆᒪᔪᓂᑦᑐᓐᖓᕕᖃᖅᑐᑦ ᐃᒪᐅᖏᓐᓇᖅᑐᒥᑦ, ᐊᒻᒪᓗᑦᑕᐅᖅ ᐃᓄᖏᓐᓄᑦ ᓴᕐᕙᕐᔪᐊᖅ/ᐱᑭᐊᓚᓱᐊᕐᓱᐊᖅ ᑐᓐᖓᕕᒋᔭᖏᑦ ᐆᒪᔪᓕᖁᖃᑦᑕᕐᓂᖏᓐᓄᑦ.

ᐱᐅᓛᖑᔪᖅ ᑐᑭᓯᓗᒋᑦ ᑖᒃᑯᐊ ᐊᓯᔾᔨᐸᓪᓕᐊᓂᖏᑦ ᓯᑯᖏᑦ ᖃᓄᐃᓐᓂᕆᔭᖏᑦ ᖃᐅᔨᓴᕐᓗᒋᑦ ᐊᓯᔾᔨᖃᑦᑕᖅᑐᑦ ᐊᑯᓂᐅᔪᒧᑦ. ᖁᒻᒧᐊᑦᑎᑕᐅᓯᒪᔪᒃᑯᑦ ᐊᔾᔨᓐᖑᐊᑦ ᖁᓛᓂ, ᐱᑕᖃᖅᑎᑕᐅᔪᑦ ᐳᕆᐊᒪᓐ ᓯᓚᑦᑐᓴᕐᕕᒃᔪᐊᖅ ᔮᒪᓂᒃᑯᑦ ᑕᑯᔅᓴᐅᑎᑦᑎᔪᑦ ᐱᓇᓱᐊᕈᓯᑕᒫᑦ ᑕᑯᔅᓴᐅᓂᖏᑦ ᐅᑭᐅᑕᖅᑐᒥ ᐃᒪᐊᓂ ᐃᒪᐅᖏᓐᓇᖅᑐᒥᑦ. ᑖᒃᑯᐊ ᐊᔾᔨᓐᖑᐊᑦ ᐊᔾᔨᒌᓐᖑᐊᖅᑎᑕᐅᔪᓐᓇᖅᑐᑦ ᐱᓇᓱᐊᕈᓯᐅᓯᒪᔪᓂᑦᓴ ᐅᕝᕙᓘᓐᓃᑦ ᐊᕐᕌᒎᓯᒪᔪᓂᑦ ᓯᑯᖃᑦᑕᕐᓂᖓ ᐃᒪᐅᖏᓐᓇᖅᑐᖅ ᓯᑯᒃᑯᑦ ᐃᑳᕐᕕᖓ ᐅᑭᐅᑕᒫᑦ ᐊᒻᒪ ᖃᓄᖅ ᓯᑯᐃᔭᖅᐸᒻᒪᖔᖅ ᐊᐅᔭᐅᓕᕋᐃᒻᒪᑦ. ᑖᓐᓇ ᐊᑐᖅᑐᒍ ᐊᑐᖅᑕᐅᓂᖓ, ᖃᐅᔨᓴᖅᑏᑦ ᓴᖅᑭᑎᑦᑎᓯᒪᔪᑦ ᐊᒥᓲᓂᖏᓐᓂᑦ ᐅᓪᓗᐃᑦ ᓯᑯᒃᑯᑦ ᐃᑳᕐᕕᒃ ᐱᑕᖃᖃᑦᑕᕐᓂᖓ ᐊᑦᑎᓪᓕᒋᐊᖅᓯᒪᔪᖅ ᖃᓂᒋᔭᐸᓗᐊᓂ 2.1 ᐅᓪᓗᐃᑦ ᐊᕐᕌᒍᑕᒫᑦ 40−ᓂᑦ ᐊᕐᕌᒎᓕᖅᑐᓂᑦ − ᐅᕝᕙᓘᓐᓃᑦ 84 ᐅᓪᓗᐃᑦ ᑲᑎᑦᑐᒋᑦ − ᐊᖏᔪᑲᓪᓚᒻᒥᑦ ᐊᔾᔨᒌᖏᓐᓂᖃᖃᑦᑕᖅᑐᑎᑦ ᐊᑯᓐᓂᖏᓐᓂ ᐊᕐᕌᒍᓂᑦ.

ᒪᕐᕉᒃ ᓱᒃᑲᓕᑎᖅᓯᒪᔪᒃ ᑕᕐᕆᔮᒃᓴᒃ ᑕᐅᓇᓃᑦᑐᒃ ᐅᖃᐅᓯᖃᓗᐊᙳᐊᕐᒪᑎᒃ ᐊᒃᓱᐋᓗᒃ ᐊᔾᔨᒌᒍᓐᓃᕐᓂᖏᓐᓂᑦ ᐅᑯᓇᓂ ᓇᒥᐅᓚᐅᕐᒪᖔᑦ, ᐊᒻᒪᓗ ᖃᓄᑎᒋ ᐊᑯᓂᐅᓂᖃᕐᓗᑎᒃ, ᓯᑯ ᐃᑳᖅᓯᒪᓂᖓ ᓴᖅᑭᓯᒪᓕᕐᒪᑦ ᑕᒫᓂ ᐊᐅᓱᐃᑦᑐᑉ ᕿᑭᖅᑕᖓᓂ ᖃᓛᖠᑦ ᐃᑭᕋᓴᖓᓂ ᐅᑭᐅᖑᑎᓪᓗᒍ ᓇᓪᓕᕉᑎᓂᕐᒥ. ᑭᒡᓕᖓ ᓯᑰᑉ ᑕᑯᔭᐅᓪᓗᐊᑕᓱᖑᕗᖅ ᐅᖅᑯᖔᖓᑕ ᐃᓚᖓᓂ ᑕᒫᓂ ᐊᐅᓱᐃᑦᑐᑉ ᕿᑭᖅᑕᖓᓂ ᖃᓛᖠᑦ ᐃᑭᕋᓴᖓᑕ (ᑐᑭᓕᐅᑎᓗᒍ ᓱᒃᑲᓕᑎᖅᓯᒪᔪᓗᓂ 2015-2016), ᐊᒻᒪᓗ ᑭᖑᓪᓕᖅᐹᖏᓐᓂ ᑕᐃᒪᖑᒐᔪᓱᖑᒻᒪᑦ ᐅᑯᓇᓂ 141.7 ᐅᓪᓗᓂ. ᐃᓛᓐᓂᒃᑯᑦ ᐅᓇ ᓂᓚᒃ ᐃᑳᕐᕕᐅᕙᒃᑐᖅ ᐅᕙᓂ ᓂᐅᔅ ᑕᕆᐅᖓ ᐋᖅᑭᐊᓂᒍᓐᓇᙱᒻᒪᑦ. 2007 ᐅᑭᐅᖓ ᑕᐃᒪᐃᓚᐅᕐᓯᒪᖕᒪᑦ, ᓇᓗᓇᐃᒃᑯᑎᒋᓪᓗᒍ. ᐊᒻᒪᓗ 2018-2019 ᐅᑭᐅᖓᓂ, ᑖᓐᓇ ᐃᑳᕐᕕᒃ ᐋᖅᑭᒃᓯᒪᓚᐅᑲᓚᐅᕐᓯᒪᔪᖅ ᑭᓯᐊᓂᓕ ᐊᑖᒍᑦ ᓯᑯᒐᓚᖕᓂ ᐃᖏᕐᕋᑎᑦᑎᑲᑕᓚᐅᕐᑐᖅ ᓂᒋᕐᒧᑦ.

ᐱᑭᐊᓚᓱᕐᓱᐊᖅ ᑲᑎᒪᔨᖏᑦ

2013-ᒥ, ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᐅᔪᑦ ᑲᑎᓚᐅᖅᑐᑦ ᓅᒃ, ᑲᓛᖦᓖᑦ ᓄᓈᓐᓂ, ᓄᓇᓕᖕᒥᐅᑕᓂᑦ ᑖᕙᓂᕐᒥᐅᑕᖅᐸᓯᖕᓂ ᐱᑭᐊᓚᓱᕐᓱᐊᕐᒥ ᐃᓱᒫᓘᑎᒋᔭᒥᓂᒃ ᓯᕗᓂᒃᓴᒥ ᑕᐃᑲᓂ ᐃᓂᐅᔪᒥ ᐅᖃᐅᓯᖃᕆᐊᖅᑐᖅᖢᑎ. ᑕᐃᒪᐃᓐᓂᖓᓄᑦ, ᑖᓐᓇ ᐱᑭᐊᓚᓱᕐᓱᐊᖅ ᑲᑎᒪᔨᖏᑦ  ᓴᖅᑭᑕᐅᓚᐅᖅᑐᑦ 2016-ᒥ. ᐱᓕᕆᐊᒃᓴᕆᓚᐅᖅᑕᖏᑦ ᑲᔪᓯᑎᑦᑎᓂᕐᒥᑦ ᓄᓇᓕᖕᓂ ᐊᒻᒪ ᐊᕕᒃᑐᖅᓯᒪᓂᐅᔪᓂ ᐅᖃᐅᓯᐅᔪᓂ, ᐃᓚᓕᐅᔾᔨᓂᕐᒥᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᓐᓂ ᐊᒻᒪ ᐊᑐᓕᖁᔨᓂᕐᒥᑦ ᐸᕐᓇᐅᑎᓂᑦ ᐊᑦᑕᓇᔾᔭᐃᖅᓯᓂᕐᒥᑦ ᓇᐅᑦᑎᖅᓱᕐᓂᕐᒥᓪᓗ ᖃᓄᐃᙱᑦᑎᐊᕐᓂᕆᔭᖏᓐᓂᒃ ᐱᑭᐊᓚᓱᕐᓱᐊᕐᒥᑦ ᓯᕗᓂᒃᓴᒥ ᑭᖓᕚᒃᓴᕆᔭᐅᔪᓄᑦ.

ᐱᖓᓱᓂ ᑲᒥᓴᓇᓂ ᑎᒃᑯᐊᖅᓯᓚᐅᖅᑐᑦ: ᓯᓚᕐᔪᐊᓕᒫᒥ ᑭᒡᒐᖅᑐᐃᔨᒥ, ᐊᑕᐅᓯᕐᒥ ᑲᓇᑕᒥᙶᖅᑐᒥ ᐊᒻᒪ ᐊᑕᐅᓯᕐᒥ ᑲᓛᖦᓖᑦ ᓄᓈᓐᓂᙶᖅᑐᒥ:

  • ᐅᑲᓕᖅ ᐃᔨᑦᓯᐊᖅ, ᐃᒃᓯᕙᐅᑕᖅ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᐅᔪᓄᑦ
  • ᐄᕙ ᐋᕆᐊᒃ, ᓯᕗᓕᖅᑎᒥᓂᖅ ᓄᓇᕗᒻᒥ
  • ᑰᐱᒃ ᑲᓚᐃᔅᑎ, ᓯᕗᓕᖅᑎᒥᓂᖅ ᑲᓛᖦᓖᑦ ᓄᓈᓐᓂ

ᓯᕗᓂᒃᓴᖃᖃᑎᒌᓐᓂᖅ

ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐃᑲᔪᖅᓱᓚᐅᖅᑐᑦ ᓴᖅᑮᓂᕐᒥᑦ ᐱᑭᐊᓚᓱᕐᓱᐊᖅ ᑲᑎᒪᔨᖏᓐᓂᒃ ᐊᒻᒪ ᐃᑲᔪᓚᐅᖅᑐᑦ ᐅᖃᖃᑎᒌᒃᑎᓪᓗᒋᑦ ᓄᓇᕗᒻᒥ ᑲᓛᖦᓖᑦ ᓄᓈᓐᓂᒡᓗ. ᑲᑎᒪᓂᖃᖅᑎᓪᓗᒋᑦ, ᐃᓄᐃᑦ ᐃᒡᓗᒃᑐᕐᒥᐅᑕᑦ ᓴᓐᓂᓕᕈᑎᐅᑉ ᐃᒪᖓᓐᓂ ᓴᖅᑮᖁᔨᓚᐅᖅᑐᑦ ᑲᑐᔾᔨᖃᑎᒌᓂᒃᑯᑦ ᑲᒪᒋᔭᖃᕐᓂᕐᒥᑦ ᑎᒥᐅᔪᒥ ᐱᑭᐊᓚᓱᕐᓱᐊᕐᒥ, ᓄᓇᓕᖕᒥᐅᑕᐅᔪᓄᑦ. ᑲᑎᒪᔩᑦ ᖃᐅᔨᓇᓱᓚᐅᖅᑐᑦ ᖃᓄᖅ ᐃᓄᐃᑦ ᐃᒡᓗᒃᑐᕐᒥᐅᑕᑦ ᓄᓇᓕᕐᔪᐊᓂ ᐱᓕᕆᖃᑎᒌᔪᓐᓇᕐᒪᖔᑦ ᓇᐅᑦᑎᖅᓱᕐᓂᕐᒥᑦ ᐊᐅᒪᑦᑎᓂᕐᒥᓪᓗ ᐆᒪᔪᐃᑦ ᓇᔪᒐᖃᕐᕕᖏᑦ ᖃᓄᐃᙱᑦᑎᐊᕐᓂᖏᓐᓄᑦ ᑭᓱᖃᐅᑦᑎᐊᖅᑐᒥ ᐊᒻᒪ ᓴᖅᑮᓚᐅᖅᑐᑦ ᐅᓂᒃᑳᒥ ᐊᑐᓕᖁᔭᐅᓯᒪᔪᓂ 2017-ᒥ.

ᑎᓯᐱᕆᒥ 2018, ᐱᑭᐊᓚᓱᐊᕐᓱᐊᖅ ᑲᑎᒪᔩᑦ ᐱᔭᕇᖅᓯᓚᐅᖅᑐᑦ ᐃᖅᑲᓇᐃᔮᖓᓂ ᐊᒻᒪ ᑭᖑᕐᕕᖅᑕᐅᓪᓗᑎ ᐱᑭᐊᓚᓱᐊᕐᓱᐊᖅ ᐊᑐᓕᖅᑎᑦᑎᓂᕐᒧᑦ ᑲᑎᒪᔨᕋᓛᑦ (PIC). ᐱᔾᔪᑎᒋᔭᖓ ᐱᑭᐊᓚᓱᐊᕐᓱᐊᖅ ᐊᑐᓕᖅᑎᑦᑎᓂᕐᒧᑦ ᑲᑎᒪᔨᕋᓛᑦ ᐊᑐᓕᖅᑎᑦᑎᓗᑎ ᑲᓴᒪᔩᑦ ᐊᑐᓕᖁᔨᔭᖏᓐᓂᑦ, ᐃᑲᔪᕐᓗᓂ ᐱᕙᓪᓕᐊᑎᑦᑎᓂᕐᒧᑦ ᐃᓄᓐᓄᑦ− ᑐᑭᒧᐊᖅᑎᑕᐅᔪᑦ ᐊᐅᓚᑦᑎᓂᕐᒧᑦ ᑎᒥᐅᔪᑦ ᑕᒫᓂ ᐊᕕᑦᑐᖅᓯᒪᔪᒥᑦ ᐊᒻᒪ ᐃᑲᔪᕐᓗᓂ ᐋᔩᖃᑎᒌᓐᓂᐅᔪᑦ ᖁᑯᓂᖓ ᐊᕕᑦᑐᖅᓯᒪᔪᓂᑦ ᐊᒻᒪ ᑲᓇᑕᒥ ᒐᕙᒪᐃᑦ.

ᑲᓇᑕᒥ, ᐅᐊᓐᓇᖓᓂ ᐃᒪᕐᒥ ᓴᕐᕙᖅ ᓇᓗᓇᐃᖅᑕᐅᓯᒪᔪᖅ ᓯᕗᓕᖅᑎᓄᑦ ᐃᓚᖏᓐᓄᑦ ᐊᒻᒪ ᓄᓇᓕᖕᒥᐅᓄᑦ ᐃᓂᒋᔭᐅᑕᐅᓐᓇᕆᐊᓕᒃ ᓄᓇᖃᖅᑳᖅᓯᒪᔪᓄᑦ ᓴᐳᔾᔭᐅᓯᒪᓗᓂ ᐃᓂᐅᔪᖅ. ᑲᓛᖦᓖᑦ ᓄᓈᑦ ᓇᖕᒥᓂᖅᓱᖅᑐᑦ−ᒐᕙᒪᐅᓪᓗᑎ ᓄᓇᓕᕐᔪᐊᖅ ᑕᓐᒫᒃ ᐃᓚᒋᓪᓗᓂᐅᒃ ᐱᓯᒪᑦᑎᓲᑦ ᑕᒪᕐᒥᑲᓴᖕᓂᒃ ᐃᓱᒪᓕᐅᖅᑕᐅᔪᓂ ᑐᕌᖓᔪᓂ ᐃᒪᖁᑎᖏᓐᓂ. ᑲᓇᑕᒥ−ᑲᓛᖦᓖᑦ ᓄᓈᓐᓂᒡᓗ ᑎᒥᖁᑎᐅᔪᖅ ᐅᐊᓐᓇᖓᓂ ᐃᒪᕐᒥ ᓴᕐᕙᖕᒧᑦ, ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐃᑲᔪᖅᓱᖅᑕᖓ, ᖁᑦᑎᓂᖅᓴᒨᖅᑎᑦᑎᑐᐃᓐᓇᕆᐊᓕᒃ ᑕᓐᒫᒃ ᐊᒻᒪ ᑲᓛᖦᓖᑦ ᓄᓈᑦ ᑐᕌᒐᕆᔭᖓ ᖃᐅᔨᓴᕐᓂᕐᒥᑦ ᓇᖕᒥᓂᖅᓱᓂᕐᒥᑦ−ᒐᕙᒪᓕᕆᖤᕐᒧᑦ ᐊᒻᒪ ᐊᖏᒡᓕᑎᕆᓂᕐᒥᑦ ᑲᓛᖦᓖᑦ ᓄᓈᑦ ᐊᐅᓚᓂᕆᔭᖓᓂ ᓄᓇᒥᙶᖅᑐᓂ ᐃᑲᔪᕈᑎᒃᓴᐅᔪᓂᑦ.

ᐊᑐᖅᑕᐅᔪᓐᓇᖅᑐᑦ ᐃᓚᒋᔭᐅᔪᑦ

People of the Ice Bridge The Future of the Pikialasorsuaq

Pikialasorsuaq is the largest Arctic polynya and most biologically productive region north of the Arctic Circle. The Pikialasorsuaq Commission, made up of representatives from both sides of Baffin Bay, issued this report in 2017 with major recommendations for the conservation and management of the polynya.