ᐱᕕᖃᖅᑎᑕᐅᓗᐊᖏᒻᒥᒻᒪᑕ ᑮᓇᐅᔾᔭᒃᓴᐅᑎᒃᓴᓂᑦ ᐊᒻᒪ ᐃᓅᓯᕐᒨᖓᔪᓂᒃ ᐊᒃᓱᕉᑎᖃᓲᖑᒻᒪᑕ ᓄᖅᑲᖓᓕᕈᑕᐅᔪᖅ ᐅᑭᐅᖅᑕᖅᑑᑉ ᖃᓄᐃᒋᐊᕈᓐᓇᖅᑕᖏᓐᓂ. ᓴᐳᔾᔨᓂᕐᒥᑦ ᐱᒻᒪᕆᐅᔪᓂ ᐃᒪᕐᒥᐅᑕᓂᑦ ᓇᔪᖅᑕᐅᔪᓄᑦ ᐆᒪᔪᓄᑦ ᓄᓇᓕᐅᔪᑦ 53 ᖃᓂᒋᔭᖓᓃᑦᑐᓂ ᐃᓚᒋᔭᐅᓪᓗᑎ ᐃᓄᐃᑦ ᓄᓇᖓᓂ  ᐃᑲᔪᕐᓂᖃᕐᓂᐊᖅᑐᖅ ᓴᓇᓂᕐᒥᑦ ᐊᓂᒍᐃᔪᓐᓇᖅᑐᒥ ᐅᑭᐅᖅᑕᖅᑐᒥ ᑮᓇᐅᔾᔭᒃᓴᐅᑎᒃᓴᓂᑦ ᐊᔾᔨᐅᖏᓪᓗᓂ ᐊᒻᒪ ᓇᒻᒥᓂᖅᓱᕐᓗᓂ.

ᐃᒪᕐᒥᐅᑕᓂᑦ ᓴᐳᔾᔨᓯᒪᓂᖅ = ᖃᓄᐃᙱᑦᑎᐊᖅᑐᓂ ᓄᓇᓕᖕᓂ

ᐃᓄᐃᑦ ᓂᕆᓲᖑᒻᒪᑕ 50 ᐳᓴᓐᑎᒥ ᓂᕿᖁᑎᒥᓂᒃ, ᐱᒻᒪᕆᐅᔪᓂ ᐃᒪᕐᒥᐅᑕᓂᙶᖅᑐᓂ ᐊᕐᕌᒍᒐᓵᓗᖕᓄᑦ ᑕᐃᒪᐃᓯᒪᓪᓗᑎ. ᑖᒃᑯᐊ ᐅᑭᐅᖅᑕᖅᑐᒥ ᐃᒪᐃᑦ ᓇᔪᖅᑕᐅᔪᓄᑦ ᐆᒪᔪᓄᑦ ᐃᓂᑦᑎᐊᕙᐅᖕᒪᑕ ᑑᒑᓕᖕᓄᑦ, ᐊᕐᕕᓄᑦ, ᓇᑦᑎᓄᑦ, ᐃᖃᓗᖕᓄᑦ ᑕᕆᐅᕐᒥᐅᑕᑦ ᑎᖕᒥᐊᓄᑦ ᓂᕆᔭᒃᓴᑦᑎᐊᕙᐅᓪᓗᑎ ᐅᑭᐅᖅᑕᖅᑐᕐᒥᐅᓄᑦ.

 ᐅᓪᓗᒥᐅᔪᖅ, ᐊᒃᓱᕉᑕᐅᓂᖅᐹᖑᔪᖅ ᑎᑭᐅᒪᑦᑎᐊᕋᓱᐊᕐᓂᕐᒧᑦ ᐃᒪᕐᒥᐅᑕᓂᑦ ᓴᐳᔾᔨᓂᕐᒧᑦ ᐅᑭᐅᖅᑕᖅᑐᒥ ᑖᒃᑯᐊ ᐱᐅᖅᓱᐊᓂᕐᒧᑦ ᐱᓕᕆᐊᖑᔪᑦ ᑐᕌᖓᖃᓯᐅᑎᖏᒻᒪ ᓄᓇᓕᐅᑉ ᖃᓄᐃᙱᑦᑎᐊᕆᐊᖃᕐᓂᖓᓄᑦ, ᐃᖅᑲᓇᐃᔭᖅᑎᑦᑎᓂᕐᒧᑦ ᐊᒻᒪ ᑲᔪᓯᓂᖃᑦᑎᐊᕈᓐᓇᕐᓂᕐᒥᑦ ᐊᕙᑎᓕᕆᓂᕐᒧᑦ ᓯᕗᓕᖅᑎᐅᓪᓗᑎ. ᐃᓅᓪᓗᓂ ᓯᕗᓕᖅᑎ ᒥᐊᓕ ᓴᐃᒪᓐ  , ᒥᓂᔅᑕᐅᑉ ᑭᒡᒐᖅᑐᐃᔨᖓ ᐅᑭᐅᖅᑕᖅᑐᒥ ᓯᕗᓕᖅᑎᐅᓂᕐᒧᑦ, ᑖᔅᓱᒥᖓ ᐱᕐᔪᐊᖑᔪᒥ ᐃᓕᓴᖅᓯᓚᐅᖅᐳᖅ ᐅᓂᒃᑳᖓᓐᓂ ᑭᖑᓪᓕᖅᐹᒥ ᐅᓂᒃᑳᖓ 2017-ᒥ.

ᐃᓄᖕᓂ ᐅᖃᖃᑎᖃᖅᑎᓪᓗᒍ, ᖃᐅᔨᓚᐅᖅᑐᖅ “ᓂᕆᐅᖕᓂᖅᑕᖃᖅᑐᖅ ᐅᑭᐅᖅᑕᖅᑐᒥ ᐱᐅᖅᓱᐊᓂᕐᒧᑦ ᑐᕌᖓᖃᓯᐅᑎᕗᖅ ᓴᙱᔪᒥ ᓴᓇᓂᕐᒥ ᑲᔪᓯᑦᑎᐊᑎᑦᑎᓂᕐᒥᓪᓗ ᖃᓄᐃᙱᑦᑎᐊᖅᑐᓂ ᓄᓇᓕᖕᓂ.” ᑕᐃᒫᑦᑎᐊᖅ ᑎᑭᐅᒪᓂᐊᕐᓗᓂ, ᐊᓯᖏᑦ ᐊᑐᖅᑕᐅᔭᕆᐊᖃᕐᒥᔪᑦ, ᓲᕐᓗ ᓄᓇᖃᖅᑳᖅᓯᒪᔪᓄᑦ ᓴᐳᔾᔭᐅᓯᒪᔪᓂ ᐃᓂᐅᔪᓂ (IPA) ᐊᒻᒪ ᐅᑭᐅᖅᑕᖅᑑᑉ ᓯᒡᔭᖅᐸᓯᖓᓂ ᓇᐅᑦᑎᖅᓱᐃᔨᓄᑦ ᐱᓕᕆᐊᒃᓴᓂᑦ . ᑖᒃᑯᐊ ᓴᐃᒪᓐ ᑐᑭᑖᖅᓯᒪᑎᓚᐅᖅᑕᖏ ᐃᒫ “ᑐᙵᕕᖃᕐᓗᑎ ᐃᓱᒪᒋᔭᐅᔪᒥ ᓴᐳᔾᔭᐅᓯᒪᔪᒥ ᐃᓂᐅᔪᒥ ᓴᓇᓯᒪᓗᓂ ᐊᑲᐅᓈᖅᑎᑦᑎᓂᕐᒧᑦ ᐊᒻᒪ ᐃᑲᔪᖅᓱᓂᕐᒧᑦ ᓄᓇᖃᖅᑳᖅᓯᒪᔪᑦ ᑕᐅᑐᙳᐊᖅᑕᒥᓂᒃ ᓄᓇᒥ ᖃᓄᐃᓕᐅᕐᓂᐅᔪᒥᑦ.”

ᑕᐃᒪᐃᑦᑐᒥ ᐊᑐᓐᓇᓱᓐᓂᐊᖅᑎᓪᓗᒋᑦ ᐱᓕᕆᐊᖃᕐᓂᕐᒧᑦ ᐅᑭᐅᖅᑕᖅᑐᒥ, ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐊᓯᖏᓪᓗ 7-ᖑᔪᑦ ᐊᕙᑎᓕᕆᓂᕐᒧᑦ ᒐᕙᒪᐅᙱᑦᑐᑦ ᑲᑐᔾᔨᖃᑎᒌᑦ ᐅᖃᐅᔾᔨᒋᐊᓚᐅᖅᑐᑦ ᑲᓇᑕᐅᑉ ᒐᕙᒪᖓᓐᓂ 2016-ᒥ ᑎᑎᖅᑲᑎᒍᑦ:

  • ᐊᐅᓚᑦᑎᓂᕐᒥᑦ ᐱᓕᕆᔾᔪᓯᒥ ᐅᑭᐅᖅᑕᖅᑐᒥ ᐃᒪᕐᒥᐅᑕᓂᑦ ᐱᐅᓱᐊᕐᓂᕐᒧᑦ ᐃᓂᐅᔪᓂ ᐃᓄᖕᓄᑦ ᑲᒪᒋᔭᐅᓪᓗᐊᖅᑐᑦ, ᐃᑲᔫᑎᖃᕐᓗᑎ ᐃᓄᐃᑦ ᓄᓇᓕᖕᓄᑦ ᐃᖅᑲᓇᐃᔮᓂ ᓴᖅᑮᓗᑎ ᐊᒻᒪ ᐱᓕᒻᒪᒃᓴᐅᑎᒃᓴᓂᑦ. ᓯᒡᔭᖅᐸᓯᖓᓂ ᓇᐅᑦᑎᖅᓱᓂᕐᒧᑦ ᐱᓕᕆᐊᒃᓴᒥᑦ ᖃᐅᔨᓴᖅᑕᐅᓪᓗᐊᖅᑐᖅ ᐃᓚᓕᐅᔾᔨᔪᓐᓇᕐᓗᓂ ᐊᐅᓚᑦᑎᓂᕐᒥᑦ, ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᖃᓄᐃᑦᑑᓂᖏᓐᓂ ᓇᐅᑦᑎᖅᓱᕐᓂᕐᒥᑦ ᐊᒻᒪ ᐅᒥᐊᕐᔪᐊᕐᓂᑦ ᐊᐅᓚᑦᑎᓂᕐᒥᑦ ᓇᐅᑦᑎᖅᓱᓂᕐᒥᓪᓗ.
  • ᐃᓕᓴᖅᓯᓂᕐᒥᑦ ᐃᓄᐃᑦ ᓇᐅᑦᑎᖅᓱᖅᑎᐅᓂᖏᓐᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᑖᒃᑯᐊᓗ ᐱᐅᖅᓱᐊᕐᓂᕐᒧᑦ ᐃᓂᐅᔪᑦ ᐱᔨᑦᑎᕈᑎᑦᑎᐊᕙᐅᓪᓗᑎ ᑲᓇᑕᒧᑦ (ᓯᓚᕐᔪᐊᒧᓪᓗ), ᒐᕙᒪᒃᑯᑦ ᐃᓕᓯᔭᕆᐊᓖᑦ ᐊᒻᒪ ᑲᔪᓯᑎᑦᑎᓗᑎ ᐅᖓᓯᒃᑯᒨᖓᔪᓂ ᐊᖏᖅᓯᒪᓪᓚᕆᓪᓗᑎ ᑮᓇᐅᔭᕐᓄᑦ ᐊᐅᓚᑦᑎᓂᖏᓐᓄᑦ.

ᓄᑖᖑᔪᑦ ᐃᒪᕐᒥᐅᑕᓂᑦ ᐱᐅᖅᓱᐊᕐᓂᕐᒧᑦ ᐃᓂᐅᔪᑦ ᐅᑭᐅᖅᑕᖅᑐᒥ ᓴᖅᑮᔪᒫᖅᑐᑦ ᐊᐅᓚᑦᑎᔨᐅᓂᕐᒧᑦ ᐃᖅᑲᓇᐃᔮᒃᓴᓂᑦ ᑐᕌᖓᑦᑎᐊᖅᑐᑦ ᐃᓄᖕᓄᑦ ᖃᐅᔨᒪᔨᑕᕐᓄᑦ. ᐃᓚᒃᑲᓐᓂᕐᓗᒍ, ᑖᒃᑯᐊ ᐱᐅᖅᓱᐊᓂᕐᒧᑦ ᐃᓂᐅᔪᑦ ᑐᙵᕕᑦᑎᐊᕙᐅᒐᔭᖅᑐᖅ ᖃᐅᔨᓴᐃᓐᓇᖃᑦᑕᕐᓂᕐᒧᑦ ᐱᓕᕆᐊᒃᓴᓄᑦ. ᐱᓕᕆᐊᒃᓴᐅᔪᑦ ᓇᐅᑦᑎᖅᓱᕈᓐᓇᖅᑐᑦ ᖃᐅᔨᓴᕐᓗᑎᓗ ᓴᖅᑭᔮᕙᒌᖅᑐᓂ ᐆᒪᔪᐃᑦ ᓇᔪᒐᖃᕐᕕᖏᑦ ᖃᓄᐃᙱᑦᑎᐊᕐᓂᖏᓐᓄᑦ ᓈᓴᐅᑎᖏᓐᓂ ᐊᒻᒪ ᐃᓄᖕᓄᑦ ᐊᑐᖅᑕᐅᕙᓐᓂᖏᑦ ᑖᒃᑯᐊ ᐃᓂᐅᔪᑦ, ᖃᐅᔨᓴᕐᓗᑎᓗ ᐊᓯᔾᔨᕐᓂᐅᔪᓂ ᓂᕆᐅᓐᓇᙱᑦᑐᒃᑯᑦ ᐆᓇᖅᓯᓕᕐᓂᖓᓄᑦ.

ᐱᓕᒻᒪᒃᓴᐅᑎᒃᓴᑦ ᐱᒻᒪᕆᐅᔪᑦ ᐃᓅᔪᑦ ᖃᐅᔨᒪᔨᑕᑦ ᑎᑭᐅᒪᑦᑎᐊᕐᓂᐊᕐᒪᑕ ᐊᔪᙱᑦᑕᕆᐊᓕᖏᓐᓂᒃ ᑖᒃᑯᓄᖓ ᐃᖅᑲᓇᐃᔮᒃᓴᓄᑦ. ᐅᓄᖅᓱᐃᖅᓱᖅᖢᑎᒃ, ᑖᒃᑯᐊ ᐱᓕᒻᒪᒃᓴᐅᑎᒃᓴᑦ ᓴᓇᔭᐅᔭᕆᐊᓖᑦ ᐊᑐᓕᖅᑎᑕᐅᓗᑎᓗ ᐃᖅᑲᓇᐃᔮᑦ ᓴᖅᑭᑕᐅᒃᐸᑕ ᐊᑕᐅᑦᑎᒃᑯᑦ ᓄᓇᓕᐅᔪᑦ ᖃᓂᒋᔭᖓᓂ ᐃᓚᐅᑦᑎᐊᕈᓐᓇᖁᓪᓗᒋᑦ. ᐅᓄᖅᑐᑦ ᓇᓗᓇᐃᒃᑯᑕᖅᑖᕆᔭᐅᓯᒪᔭᕆᐊᓖᑦ ᑖᒃᑯᓄᖓ ᐱᐅᖅᓱᐊᓕᕆᔨᐅᔪᓄᑦ ᑐᕌᖓᖃᓯᐅᑎᖕᒥᔪᑦ ᐃᖅᑲᓇᐃᔮᒃᓴᓄᑦ ᓴᓇᔭᐅᓯᒪᔪᓄᑦ, ᒐᕙᒪᓕᕆᖤᕐᒧᑦ ᐊᒻᒪ ᑐᓴᐅᒪᔪᓕᕆᓂᕐᒧᑦ.

ᓄᑖᖑᔪᖅ ᐱᓕᕆᔾᔪᓯᖅ ᐱᐅᖅᓱᐊᓂᕐᒧᑦ

ᐱᐅᖅᓱᐊᕐᓂᖅ ᑐᙵᕕᖃᕆᐊᖃᙱᓚᖅ ᐃᓄᐃᑦ ᐃᓅᕕᒋᔭᖏᓐᓂᒃ, ᐊᖑᓇᓱᒡᕕᒋᔭᖏᓐᓂᒃ ᐊᒻᒪ ᐊᐅᓪᓚᕐᕕᒋᕙᒃᑕᖏᓐᓂᒃ. ᖃᓄᖅᑑᕈᑎᒃᓴᑦ ᓴᐳᔾᔨᓂᕐᒧᑦ ᐃᒪᕐᒥᐅᑕᓂᑦ ᐊᕙᑎᖓᓂ ᐱᐅᓯᕚᓪᓕᖅᑎᑦᑎᓪᓗᐊᖅᑐᖅ ᐃᓄᖕᓄᑦ ᐊᒻᒪ ᐆᒪᔪᑦ ᓇᔪᒐᖏᑕ ᓯᓚᑎᖏᑕᓗ ᖃᓄᐃᑦᑑᓂᖏᓐᓂ ᐊᑲᐅᒍᓐᓃᑎᑕᐅᙱᖔᕐᓗᑎ.

ᑭᓱᑐᐃᓐᓇᖅ ᑎᑭᒐᒃᓴᐅᙱᓚᖅ ᐊᕙᓗᔭᐅᓯᒪᑎᓪᓗᒍ ᐊᔪᖅᓴᕐᓂᕐᒥᑦ. ᑲᓇᑕᒥ ᐅᓄᖅᓯᕚᓪᓕᖁᓪᓗᒋᑦ ᖃᔅᓯᐅᓂᖏᑦ ᓴᐳᔾᔭᐅᓯᒪᔪᑦ ᐃᒪᕐᒥᐅᑕᓂᑦ ᐃᓂᐅᔪᓂᑦ ᐅᑭᐅᖅᑕᖅᑐᒥ, ᐊᑕᐅᑦᑎᒃᑯᑦ ᑲᒪᒋᔭᖃᕆᐊᓕᒃ ᐃᖅᑲᓇᐃᔮᖃᙱᑦᑐᓂ, ᐃᓕᓐᓂᐊᑦᑎᐊᖅᓯᒪᙱᑦᑐᓂ ᐊᒻᒪ ᐱᓕᒻᒪᒃᓴᕐᓂᕐᒧᑦ ᐱᕕᖃᖅᑎᑕᐅᑦᑎᐊᖃᑦᑕᖏᓐᓂᖏᓐᓄᑦ.

ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐊᖏᖅᓯᒪᔪᑦ ᐃᑲᔪᖅᓱᓂᕐᒥᑦ ᐱᐅᖅᓱᐊᓂᕐᒧᑦ ᐱᓕᕆᐊᒃᓴᓂᑦ ᐃᓚᓕᐅᑎᓯᒪᔪᓂ ᐱᓕᒻᒪᒃᓴᐅᑎᒃᓴᓂ ᐊᒻᒪ ᐃᖅᑲᓇᐃᔮᓂᒃ ᓴᖅᑮᓂᕐᒥᑦ.  ᐊᕐᕌᒍᓂ ᐊᓱᓲᖅᓂ, ᒪᑯᓂᖓ ᐃᓚᖃᖅᑐᖅ:

  • ᐃᑲᔪᓚᐅᖅᑐᑦ ᓴᖅᑮᓂᕐᒥᑦ ᐃᓄᕕᐊᓗᐃᑦ ᐊᖏᖃᑎᒌᒍᑎᑖᕐᓂᕐᒧᑦ ᐊᕕᒃᑐᖅᓯᒪᔪᓄᑦ − ᓄᓇᓕᖕᓂ−ᑐᙵᕕᖃᖅᖢᑎᒃ ᖃᐅᔨᓴᐃᓐᓇᖃᑦᑕᕐᓂᕐᒥᑦ ᐱᓕᕆᐊᒃᓴᖅ (ISR-CBMP)
  • ᐃᑲᔪᖅᓱᓂᕐᒥᑦ ᐃᒪᕐᒥᐅᑕᓂᑦ ᐸᕐᓇᐃᓂᕐᒧᑦ, ᓯᒡᔭᖅᐸᓯᖓᓂ ᓇᐅᑦᑎᖅᓱᓂᕐᒧᑦ ᐊᒻᒪ ᐱᓕᒻᒪᒃᓴᖅᑎᑕᐅᓂᕐᒥᑦ ᓄᓇᑦᓯᐊᕗᖕᒥᑦ
  • ᐃᑲᔪᖅᓱᓂᕐᒧᑦ ᐃᒪᕐᒥᐅᑕᓂᑦ ᓇᐅᑦᑎᖅᓱᓂᕐᒧᑦ ᐆᑦᑐᕋᐅᑎᒥ ᐱᓕᕆᐊᒥᑦ ᓄᓇᕗᒻᒥ
  • ᓴᖅᑮᓂᕐᒥᑦ ᓄᓇᓕᖕᓄᑦ−ᐊᐅᓚᑕᐅᔪᓂ ᐃᒪᕐᒥᐅᑕᓂᑦ ᐳᐃᔨᓂ ᐊᒻᒪ ᓯᑯᒥ ᓇᐅᑦᑎᖅᓱᓂᕐᒧᑦ ᐱᓕᕆᐊᒃᓴᓂᑦ ᑕᓪᓗᕈᑎᐅᑉ ᐃᒪᖓᓂ
  • ᐱᔭᕆᐊᖃᓪᓚᕆᓐᓂᖏᓐᓂᒃ ᓯᓚᑦᑐᖅᓯᕐᕕᒡᔪᐊᒥ ᑲᓇᑕᐅᑉ ᐅᑭᐅᖅᑕᖅᑐᖓᓂ