ᑲᓇᖕᓇᒥ ᐃᓯᕐᓇᖅᑐᖅ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᓄᑦ, ᐆᒪᔪᖃᐅᑦᑎᐊᖅᑐᑦ ᐃᒪᖏᑦ ᓴᓐᓂᓕᕈᑎᐅᑉ ᐃᒪᖓᓐᓂ ᐊᒻᒪ ᑕᓪᓗᕈᑎᐅᑉ ᐃᒪᖓᓐᓂ ᐃᑲᔪᖅᓱᖅᓯᒪᕗᑦ ᓄᓇᖃᖅᑳᖅᓯᒪᔪᓂᑦ ᐊᕐᕌᒍᒐᓵᓗᖕᓄᑦ. ᑕᐃᑲᓃᑦᑐᖅ ᑲᓇᑕᐅᑉ ᐊᒻᒪ ᑲᓛᖦᓖᑦ ᓄᓈᑦ ᐊᑯᓐᓂᖓᓂ, ᑖᒃᑯᐊ ᐃᒪᐃᑦ ᑲᓲᒪᑎᑦᑎᕗᖅ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᓐᓂ ᐊᒻᒪ ᐊᑦᓛᓐᑎᒃᒥ ᐅᖓᓯᖕᓂᖃᖅᖢᓂ 1.1 ᒥᓕᔭᓐ ᑭᑉᐹᕆᒃᑐᓂ ᑭᓛᒥᑕᓂᒃ.

ᓴᙱᔪᒥ ᐃᖏᕐᕋᓂᐅᔪᒥ ᑲᓛᖦᓖᑦ ᓄᓈᓐᓂ ᑕᐅᓄᖓ ᕿᑭᖅᑖᓘᑉ ᓯᒡᔭᖅᐸᓯᖓᓂ ᓂᒡᓕᓇᖅᑐᒥ ᐃᒥᕐᒥ ᐊᒻᒪ ᓯᑯᓂ ᓂᒋᐊᓅᖅᑎᑦᑎᓲᖑᒻᒪᑕ, ᐅᑭᐅᖅᑕᖅᑐᒥ ᓯᓚᓕᐅᕈᑕᐅᓕᓲᖅ ᓂᒋᐊᓂ ᑕᐅᓇᓂ ᓛᐸᑐᐊᒥ ᐊᒻᒪ ᓂᐅᕙᓐᓛᓐᒥ. ᓯᑯᓕᒻᒪᕆᐅᔪᒧᑦ ᓇᔪᖅᑕᐅᔪᓄᑦ ᐆᒪᔪᓄᑦ, ᐃᒪᕐᒥᐅᑕᑦ ᐆᒪᑦᑎᐊᓲᑦ, ᐊᖏᕐᕋᑦᑎᐊᕙᐅᓪᓗᓂ ᑑᒑᓕᖕᓄᑦ, ᐊᕐᕕᖕᓄᑦ, ᕿᓚᓗᒐᕐᓄᑦ, ᐃᖃᓗᖕᓄᑦ, ᑕᕆᐅᕐᒥᐅᑕᑦ ᑎᖕᒥᐊᓄᑦ ᐊᒻᒪ ᓂᒡᓕᓇᖅᑐᒥ ᐃᒪᕐᒥᐅᑕᓂᑦ ᑯᒪᐅᔭᐃᑦ ᑲᑎᓯᒪᔪᓄᑦ.

ᐅᓂᒃᑳᑐᖃᐃᑦ ᓯᓚᑖᓂᙶᖅᑐᓂᒃ ᑎᑭᑉᐸᓚᐅᖅᑐᓂ

ᐊᖏᕐᕋᕆᔭᐅᓪᓗᓂ ᓯᒡᔭᖅᐸᓯᖓᓂᕐᒥᐅᑕᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᑕᐃᓴᓐᑎ ᐅᑭᐅᓄᑦ, ᑕᒪᓐᓇ ᓄᓇᐅᔪᖅ ᑕᑯᕐᖓᐅᑎᓚᐅᖅᓯᒪᔪᖅ ᓯᕗᓪᓕᖅᐹᒥ ᔫᕋᑉᒥᐅᑕᐅᔪᒥ ᓄᐊᕇᔭᓐ ᕙᐃᑭᖕ−ᖑᓂᕋᖅᑕᐅᔪᖅ ᐊᑎᖃᖅᑐᖅ ᐃᐅᕆᒃ ᐊᐅᐸᖅᑐᖅ ᑎᑭᑦᑎᓪᓗᒍ ᔩᓱᓯ ᐃᓅᓯᒪᓕᖅᑎᓪᓗᒍ 985. ᑭᖑᕚᖏᑦ ᐊᖑᓇᓱᓚᐅᖅᑐᑦ ᓴᓐᓂᓕᕈᑎᐅᑉ ᐃᒪᖓᑕ ᐊᐃᕕᖏᓐᓂᒃ ᐊᒻᒪ ᓇᑦᑎᖏᓐᓂᒃ ᓂᕿᒃᓴᒧᑦ ᐊᒻᒪ ᑑᒑᖏᓐᓄᑦ ᐊᕐᕌᒍᐃᑦ 400 ᐅᖓᑖᓄᑦ. ᕙᐃᑭᖕ ᓄᓇᓕᕋᓛᖏᑦ ᐊᓯᓲᓗᐊᕈᓐᓃᖅᑎᓪᓗᒋᑦ, ᑕᑦᔅ ᐊᒻᒪ ᖃᓪᓗᓈᑦ ᐊᐃᕝᕙᕋᓱᐊᖅᑏᑦ ᑎᑭᓚᐅᖅᑐᑦ 1700−ᖏᓐᓂ ᕿᓂᕆᐊᖅᖢᑎᒃ ᐊᕐᕖᑦ ᐅᖅᓱᖓᓐᓂ; 1800−ᓂ ᐊᕐᕕᐅᑉ ᐅᖅᓱᖓᓐᓂ ᐱᓇᓱᒃᑐᒻᒪᕆᐅᓕᓚᐅᖅᑐᑦ.

ᔫᕋᑉᒥᐅᑕᑦ ᐅᖅᓱᓕᕆᒡᕖᑦ ᓇᒥᑐᐃᓐᓈᓕᖅᑎᓪᓗᒋᑦ 1800 ᕿᑎᕈᔪᖏᓐᓂᒃ, ᐃᖃᓗᒐᓱᒡᕕᑕᖃᓚᐅᙱᑦᑐᖅ ᓯᓚᕐᔪᐊᕐᒥ ᐅᓇᑕᕕᔾᔪᐊᓚᐅᖅᑎᓪᓗᒋᑦ II ᑭᓯᐊᓂ ᐊᓂᒍᖅᓯᒪᓕᖅᑎᓪᓗᒍ. ᓲᕕᐊᑦᒥᐅᑦ ᐃᖃᓗᒐᓱᒃᑎᖏᑦ, ᑕᐃᒃᑯᐊᓗ ᐴᓚᓐᑎᐅᑦ ᐊᒻᒪ ᔫᒪᓂᐅᑉ ᑲᓇᖕᓇᖓᓂᕐᒥᐅᑦ, ᓯᓚᕐᔪᐊᕐᒥ ᖃᐅᔨᔭᐅᓕᖅᑎᓪᓗᒋᑦ ᓴᖅᑭᕐᖓᐅᑕᐅᓪᓗᓂ ᓯᕗᓪᓕᖅᐹᒥ ᓴᓇᕕᒡᔪᐊᖕᒧᑦ ᖁᐊᖃᐅᓕᖕᒥᑦ ᐅᒥᐊᕐᔪᐊᕐᒥᑦ. ᓯᓚᑖᓃᙶᖅᑐᑦ ᐃᖃᓗᒐᓱᒃᑏᑦ ᕿᓂᓚᐅᙱᑦᑐᑦ ᑲᓛᖦᓕᑦ ᓄᓈᓐᓂ ᓇᑖᕐᓇᕐᓂᒃ (ᖃᓕᕋᓕᖕᓂ), ᐅᓪᓗᒥᐅᔪᖅ ᐅᖃᓗᒃᑕᐅᓇᓱᖕᓂᖅᐹᖑᔪᑦ ᐊᕕᒃᑐᖅᓯᒪᓂᐅᔪᒥᑦ. ᓂᐊᖁᖅᑯᖅᑐᔪᓂ ᐃᖃᓗᒐᓱᒃᐸᓚᐅᖅᑐᑦ ᐊᒻᒪ ᐊᐅᐸᖅᑐᓂ ᐃᖃᓗᖕᓂ, ᐃᖃᓗᒐᓱᓐᓃᑦ ᑲᑕᓚᐅᖅᑐᑦ 1970-ᖏᓐᓂ ᒪᑭᒃᑲᓐᓂᓚᐅᖅᓯᒪᓇᓂᓗ. ᑕᐃᒪᐃᓚᐅᖅᑎᓪᓗᒋᑦ, ᓲᕕᔭᑦᑯᑦ ᓂᐅᕐᕈᑎᖃᕐᓂᕐᒧᑦ ᑲᓛᖦᓕᑦ ᓄᓈᓐᓂ ᓇᑖᕐᓇᕐᓂᒃ ᐃᖃᓗᒐᓱᖕᓂᕐᒥᑦ ᐱᒋᐊᖅᑎᑦᑎᓚᐅᖅᑐᑦ. ᓱᐊᖁᖅᑯᖅᑐᔪᓂ ᐃᖃᓗᒐᓱᖕᓂᖅ ᐊᒻᒪ ᐊᐅᐸᖅᑐᓂ ᐃᖃᓗᒐᓱᖕᓂᐅᓚᐅᖅᑐᖅ ᑲᑕᒃᑎᓪᓗᒋᑦ, ᓂᐅᕐᕈᑎᖃᕐᓂᕐᒧᑦ ᐊᕐᕕᖕᓂ ᐊᒻᒪ ᓇᑦᑎᕋᓱᐊᕐᓂᕐᒧᑦ ᐊᖑᓇᓱᖕᓃᑦ ᐅᓄᕈᓐᓃᓚᐅᕐᒥᔪᑦ. ᐊᑦᓛᓐᑎᒃᒥᐅᑕᐃ ᑲᓇᑕᒥ ᐃᖃᓗᒐᓱᒃᑏᑦ ᑭᖑᒃᐸᕋᓱᐊᖃᑦᑕᓕᓚᐅᖅᑐᑦ ᓴᓐᓂᓕᕈᑎᐅᑉ ᐃᒪᖓᓐᓂ ᐊᒻᒪ ᑕᓪᓗᕈᑎᐅᑉ ᐃᒪᖓᓐᓂ. ᑭᖑᒃᐸᕋᓱᐊᕐᓂᖅ ᐱᒻᒪᕆᐅᓕᒃᑲᓐᓂᓚᐅᖅᑐᖅ 1990 ᐱᒋᐊᓕᓵᕐᓂᖏᓐᓂᒃ ᓲᖃᐃᒻᒪ ᐆᒐᐃᑦ ᐅᓄᕈᓐᓃᓚᐅᖅᑐᑦ ᐊᑦᓛᓐᑎᒃ ᑳᓇᑕᒥ.

ᐱᒻᒪᕆᐅᓂᖓ ᓈᖕᒪᒃᑐᓂᑦ ᐃᖃᓗᒐᓱᖕᓂᕐᒥᑦ

ᐃᓄᐃᓪᓗ ᓯᕗᓕᖏᓪᓗ ᐊᖑᓇᓱᖃᑦᑕᖅᓯᒪᑎᓪᓗᒋᑦ ᑕᒡᕙᓂ ᐃᓂᐅᔪᒥ ᑕᐅᓴᓐᑎ ᐅᑭᐅᑦ ᐅᖓᑖᓄᑦ, ᓂᕆᔭᒃᓴᓂᓲᖑᒻᒪᑕ ᓯᒡᔭᖅᐸᓯᖓᓂ ᐃᖃᓗᖕᓂ, ᐊᒻᒨᒪᔪᕈᔪᖕᓂ ᐊᒻᒪ ᐃᒪᕐᒥᐅᑕᓂᑦ ᐳᐃᔨᓂ. ᓂᐅᕐᕈᑎᖃᕐᓂᕐᒧᑦ ᓯᑯᖃᙱᑦᑐᒥ ᐃᖃᓗᒐᓱᖕᓂᖅ ᓄᑖᐸᓘᔪᖅ.

ᐃᖃᓗᐃᑦ ᐊᒻᒪ ᑭᖑᒃᐸᐃᑦ ᐲᔭᖅᑕᐅᔪᑦ ᐊᒃᑐᐃᓂᖃᓲᑦ ᓂᕆᔭᒃᓴᕆᔭᐅᔪᓂᒃ ᕿᓚᓗᒐᕐᓄᑦ ᓴᓐᓂᓕᕈᑎᐅᑉ ᐃᒪᖓᓐᓂ. ᑐᙵᕕᒋᓗᒋᑦ ᐊᕿᐊᕈᕐᒥᐅᑕᖏᑦ ᖃᐅᔨᔭᐅᓂᑰᔪᑦ ᑑᒑᓕᖕᓂᒃ, ᐊᕝᕙᓪᓕᐊᖏᑕ ᓂᕆᕙᒃᑕᖏᑦ ᐅᑭᐅᒃᑯᑦ ᑖᒃᑯᐊᖑᔪᑦ ᑎᕿᓐᓂᖅᓴᑦ ᑲᓛᖦᓕᑦ ᓄᓈᓐᓂ ᓇᑖᕐᓇᕐᓂᒃ.

ᑲᓛᖦᓕᑦ ᓄᓈᓐᓂ ᓇᑖᕐᓇᕐᓂᒃ ᐱᖓᓐᓇᒃᐸᓯᖓᓐᓄᑦ ᐊᑦᓛᓐᑎᒃᒥ ᐅᑎᖅᑕᖅᐸᒃᑐᒻᒪᕆᐅᕗᑦ, ᑭᓯᐊᓂ ᓴᓐᓂᓕᕈᑎᐅᑉ ᐃᒪᖓ ᐊᒻᒪᓗ ᑕᓪᓗᕈᑎᐅᑉ ᐃᒪᖓᑕ ᐃᒃᑲᓐᓂᖏᓐᓄᑦ ᐱᕈᕐᕕᐅᕙᖕᒪᑦ ᑖᒃᑯᓄᖓ ᐆᒪᔪᓄᑦ. ᓇᑖᕐᓇᖅᑕᐅᔪᑦ ᐅᒥᐊᕐᔪᐊᕐᓄᑦ ᐃᒥᐅᔪᓂ ᐊᒃᑑᖏᑦᑐᑦ ᐊᒻᒪ ᕿᑐᕐᖏᐅᖅᓯᒪᙱᑦᑐᑦ ᓱᓕ.

ᐅᓪᓗᒥᐅᔪᖅ, ᐃᖅᑲᖓᓃᑦᑐᓂ ᐃᖃᓗᒐᓱᓐᓃᑦ ᑭᖑᒃᐸᖕᓄᑦ ᐊᒻᒪ ᑲᓛᖦᓕᑦ ᓄᓈᓐᓂ ᓇᑖᕐᓇᕐᓂᒃ ᑕᐃᑲᓂ ᓴᓐᓂᓕᕈᑎᐅᑉ ᐃᒪᖓᓐᓂ ᑲᓇᑕᒥ ᐅᑭᐅᖅᑕᖅᑐᒥ ᐃᖃᓗᒐᓱᓐᓂᑐᐊᖑᔪᑦ ᑖᒃᑯᐊᓗ ᐃᖃᓗᓕᕆᔩᑦ ᐊᔾᔨᐅᙱᑦᑐᑦ ᓲᖃᐃᒻᒪ ᓇᑖᕐᓇᐃᑦ, ᐆᒪᔪᐃᑦ ᐊᔾᔨᒌᖕᓂᖏᑦ ᐊᒻᒪ ᐃᖃᓗᒃᑕᐅᔪᓐᓇᑐᑦ ᖃᔅᓯᐅᓂᖏᑦ ᐊᑐᖅᑕᐅᕙᖕᒪᑦ ᑲᓇᑕᒧᑦ ᐊᒻᒪ ᑲᓛᖦᓖᑦ ᓄᓈᓂ. ᑲᓇᑕᒥ, ᑲᑐᔾᔨᖃᑎᒋᔭᐅᔪᑦ ᒐᕙᒪᑐᖃᒃᑯᓐᓄᑦ, ᓄᓇᕗᑦ ᒐᕙᒪᒃᑯᑦ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᓴᓇᔭᐅᓯᒪᔪᓄᓪᓗ. ᐃᓄᖕᓄᑦ ᓇᖕᒥᓂᕆᔭᐅᔪᑦ ᓴᓐᓂᓕᕈᑎᐅᑉ ᐃᒪᖓᓐᓂ ᒫᓐᓇᒫᖑᓚᐅᖅᑐᖅ ᐅᖃᐅᓯᖃᖅᓯᒪᔪᑦ ᐊᔾᔨᒌᙱᓐᓂᐅᔪᓂᒃ ᓴᓂᕐᕙᐃᑎᓪᓗᒋᑦ ᐃᖃᓗᒐᓱᒍᓐᓇᕐᓂᖏᓐᓂᒃ ᓯᔾᔭᖁᑎᖏᓐᓂ. ᑐᑭᓯᓇᑦᑎᐊᖅᑐᕐᓕ ᓇᑖᕐᓇᐃᑦ ᐊᒻᒪ ᑭᖑᒃᐸᖕᓄᑦ ᑯᐊᑕᒋᔭᐅᔪᑦ ᐅᓄᖅᓯᕚᓪᓕᖅᓯᒪᔪᑦ ᐅᑭᐅᓂ ᖁᓕᓂ ᖁᑦᑎᓂᖅᐹᖓᓄᑦ ᓈᒻᒪᒃᑐᓂ ᐃᖃᓗᒐᓱᖕᓂᕐᒥᑦ.

ᖃᕐᒪᕕᓂᖅ, ᐅᕝᕙᓘᓐᓃᑦ ᐊᕐᕕᓂᐊᖅᑎᐅᑉ ᐊᖏᕐᕋᖓ, ᕿᑭᖅᑕᓐ ᒥᕐᖑᐃᖅᓯᕐᕕᖕᒥ, ᐊᕐᕕᓂᐊᕐᕕᒥᓂᖅ ᑎᓄᔾᔨᕕᖕᒥ, ᓄᓇᕗᑦ.