ᓄᓇᖃᖅᑳᖅᓯᒪᔪᓄᑦ ᓴᐳᔾᔭᐅᓯᒪᔪᑦ ᐃᓂᐅᔪᑦ ᐊᒻᒪᓗ ᐃᒪᕐᒥᐅᑕᓂᑦ ᐱᐅᖅᓱᐊᕐᓂᕐᒥᑦ

ᑭᓯᐊᓂ, ᑲᓇᑕᒥ ᐅᑭᐅᖅᑕᖅᑐᒥ ᐃᒪᖓᑕ ᐊᕙᑎᖓ ᐊᒃᓱᕈᕐᓇᖅᑐᒃᑰᖅᑐᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐊᒥᓲᓂᖅᓴᓂᑦ ᐅᒥᐊᕐᔪᐊᒃᑰᖅᑎᑦᑎᓂᖅ , ᓂᐅᕐᕈᑎᖃᕐᓂᕐᒧᑦ ᐃᖃᓗᒐᓱᓐᓂᕐᒧᑦ  ᐊᒻᒪᓗ ᐅᖅᓱᐊᓗᖕᓂ ᒑᓯᓂᓪᓗ ᐱᕙᓪᓕᐊᑎᑦᑎᓂᕐᒧᑦ. ᐅᑭᐅᖅᑕᖅᑐᕐᒥᐅᑦ ᐱᕕᖃᖅᑎᑕᐅᓗᐊᖏᒻᒥᒻᒪᑕ ᑮᓇᐅᔾᔭᒃᓴᐅᑎᒃᓴᓂᑦ ᐊᒻᒪ ᐃᓅᓯᕐᒨᖓᔪᓂᒃ ᐊᒃᓱᕉᑎᖃᓲᖑᒻᒪᑕ ᓄᖅᑲᖓᓕᕈᑕᐅᔪᖅ ᐅᑭᐅᖅᑕᖅᑑᑉ ᖃᓄᐃᒋᐊᕈᓐᓇᖅᑕᖏᓐᓂ.

 ᐊᖏᖅᓯᒪᓂᖅ ᐱᐅᖅᓱᐊᓂᕐᒧᑦ

ᐊᑎᓕᐅᖅᑕᐅᓯᒪᔪᖅ ᐱᓕᕆᓂᕐᒧᑦ ᐆᒪᔪᓕᕆᓂᕐᒧᑦ ᐊᔾᔨᒌᙱᑦᑐᓂ, ᑲᓇᑕᒥ ᐊᖏᖅᓯᒪᔪᑦ ᓴᐳᔾᔨᓂᕐᒥᑦ 10 ᐳᓴᓐᑎᒥᑦ ᑕᕆᐅᕐᔪᐊᖁᑎᖏᓐᓂᒃ ᑎᑭᓪᓗᒍ 2020. ᒐᕙᒪᑐᖃᒃᑯᑦ ᐊᖓᔪᖅᑳᖓᑦ ᔭᔅᑎᓐ ᑐᕉᑑ ᐊᒻᒪ ᐊᒥᐊᓕᒐᒥᐅᑦ ᐊᖓᔪᖅᑳᕕᓂᐊ ᐸᕌᒃ ᐅᐹᒪ ᐊᖏᓚᐅᖅᑐᑦ 2016-ᒥ ᑲᑐᔾᔨᖃᑎᒌᓂᒃᑯᑦ ᐅᑭᐅᖅᑕᖅᑑᑉ ᓯᕗᓕᖅᑎᖓᑕ ᐅᖃᐅᓯᒃᓴᖓ ᓴᖅᑮᓂᕐᒧᑦ ᓄᑖᒥ, ᐱᐅᖅᓱᐊᕋᓱᐊᕐᓂᕐᒧᑦ ᑐᕌᒐᒥ ᐅᑭᐅᖅᑕᖅᑐᒧᑦ. ᑖᒃᑯᐊ ᐊᖏᕈᑕᐅᓯᒪᔪᑦ ᐱᐅᔫᑕᐅᒐᓗᐊᖅᑎᓪᓗᒋᑦ, ᑎᑭᐅᒪᓇᓱᓐᓂᖅ ᑲᓇᑕᐅᑉ ᑐᕌᒐᖓ ᐅᑭᐅᖅᑕᖅᑐᒧᑦ ᐊᔪᕐᓇᕐᓂᐊᖅᑐᖅ. ᓄᓇᐅᑉ ᓴᐳᔾᔭᐅᓯᒪᓂᖓ 10.9 ᐳᓴᓐᑎᒦᑦᑐᖅ, ᑲᓇᑕᒥ ᐱᖓᓱᑦ ᑕᕆᐊᕐᔪᐊᑦ ᒫᓐᓇᐅᔪᖅ 7.75 ᐳᓴᓐᑎ ᓴᐳᔾᔭᐅᓯᒪᔪᖅ. ᐅᑭᐅᖅᑕᖅᑐᒥ, 5.5 ᐳᓴᓐᑎ ᑕᕆᐊᕐᔪᐊᖅ ᓴᐳᔾᔭᐅᓯᒪᓛᖅᑐᖅ, ᓂᕆᐅᒋᔭᐅᔪᖅ ᑕᓪᓗᕈᑎᐅᑉ ᐃᒪᖓ (ᑕᓪᓗᕈᑎᐅᑉ ᐃᒪᖓᓐᓄᑦ ᑲᓇᑕᒥ ᑕᕆᐅᕐᒥ ᐱᐅᖅᓱᐊᓂᕐᒧᑦ ᐃᓂᐅᔪᖅ) ᐱᔭᕇᖅᑕᐅᓯᒪᓕᖅᐸ.

ᐱᓕᕆᔾᔪᓯᐅᔪᑦ ᐃᑲᔫᑎᒃᓴᑦ ᐃᒪᕐᒥᐅᑕᓂᑦ ᓴᐳᔾᔨᓯᒪᓂᕐᒧᑦ

ᑲᓇᑕᒥ ᐱᖓᓱᓂᒃ ᒪᓕᒐᖅᑎᒍᑦ ᐃᑲᔫᑎᒃᓴᖃᖅᐳᖅ ᓴᐳᔾᔨᓯᒪᓂᕐᒥᑦ ᐃᒪᕐᒥᐅᑕᓂᑦ, ᒪᓕᒐᖅᑎᒍᑦ ᐃᒪᐃᓕᖓᓪᓗᑎ:

• ᐃᒪᕐᒥᐅᑕᓂ ᓴᐳᔾᔭᐅᓯᒪᓂᐅᔪᓂ ᐃᓂᐅᔪᓂᑦ (MPA): 1996-ᒥ ᑕᕆᐅᕐᔪᐊᕐᒧᑦ ᒪᓕᒐᐅᔪᖅ ᐱᔪᓐᓇᖅᑎᑦᑎᓯᒪᕗᖅ ᐃᖃᓗᓕᕆᔨᒃᑯᑦ ᐊᒻᒪ ᐃᒪᓕᕆᔨᒃᑯᑦ ᑲᓇᑕᒥ ᐱᐅᖅᓱᐊᓂᕐᒧᑦ ᐱᒻᒪᕆᐅᔪᓂᑦ ᐃᒪᕐᒥᐅᑕᓂᑦ ᐆᒪᔪᐃᑦ ᓇᔪᒐᖃᕐᕕᖏᑦ ᖃᓄᐃᙱᑦᑎᐊᕐᓂᖏᓐᓂ ᐊᒻᒪ ᐆᒪᔪᐃᑦ ᐊᔾᔨᒌᖕᓂᖏᓐᓂ ᐅᕝᕙᓘᓐᓃᑦ ᐊᔾᔨᒌᙱᓐᓂᖏᓐᓂ ᐃᒪᕐᒥᐅᑕᓂ ᓴᐳᔾᔭᐅᓯᒪᓂᐅᔪᓂ ᐃᓂᐅᔪᓂᑦ. ᐅᓪᓗᒥ, ᑭᒡᒐᖅᑐᐃᔩᑦ ᑎᒃᑯᐊᖅᓯᒪᔪᑦ ᒪᕐᕉᓐᓂᒃ ᐃᒪᕐᒥᐅᑕᓂ ᓴᐳᔾᔭᐅᓯᒪᓂᐅᔪᓂ ᐃᓂᐅᔪᓂᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ: ᑕᕆᐅᒻ ᓂᕐᔪᑕᐃᑦ ᑖᓐᓇᓗ ᐊᖑᓂᐊᖅᕕᐊ ᓂᕿᖅᔪᐊᒻ, ᑕᒪᒃᑮ ᐅᐊᓕᓂᐅᑉ ᑕᕆᐅᖓᓐᓂᒃᑑᒃ. ᐊᖏᖅᓯᒪᔪᑦ ᐱᕙᓪᓕᐊᑎᑦᑎᓂᕐᒥᑦ ᑲᓇᑕᓕᒫᒧᑦ ᐱᓕᕆᔨᓄᑦ ᑐᓴᐅᒪᖃᑦᑕᐅᑎᒌᒍᑎᓂᑦ ᐃᒪᕐᒥᐅᑕᓂ ᓴᐳᔾᔭᐅᓯᒪᓂᐅᔪᓂ ᐃᓂᐅᔪᓂᑦ ᑐᙵᕕᖃᖅᖢᑎᒃ 13-ᓂᒃ ᐊᔾᔨᐅᙱᑦᑐᓂ ᖃᐅᔨᓴᐃᓂᕐᒧᑦ ᐊᕕᒃᑐᖅᓯᒪᓂᐅᔪᓂ, ᐱᖓᓲᔪᖅᑐᑦ ᐃᓂᖃᖅᑐᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ. ᐋᔩᖃᑎᒌᒍᑎᓪᓚᕆᖕᓂᒃ ᐱᒋᐊᖅᑎᑦᑎᓯᒪᙱᑦᑐᑦ.
• ᑲᓇᑕᒥ ᑕᕆᐅᕐᒥ ᐱᐅᖅᓱᐃᓂᕐᒧᑦ ᐃᓂᐅᔪᑦ (NMCA): ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᐱᔪᓐᓇᐅᑎᖃᖅᑐᑦ ᑎᓕᓯᓂᕐᒥᑦ ᓴᐳᔾᔨᓯᒪᓂᕐᒥᑦ ᐃᒪᕐᒥᐅᑕᓂᑦ ᐆᒪᔪᐃᑦ ᓇᔪᒐᖃᕐᕕᖏᑦ ᖃᓄᐃᙱᑦᑎᐊᕐᓂᖏᓐᓂ ᑕᐃᑰᓇ ᑲᓇᑕᒥ ᑕᕆᐅᕐᒥ ᐱᐅᖅᓱᐃᓂᕐᒧᑦ ᐃᓂᐅᔪᓄᑦ ᐊᑐᐊᒐᕐᒧᑦ (ᐊᑎᓕᖅᑎᑕᐅᓚᐅᖅᑐᖅ 1986-ᒥ, ᓄᑖᙳᕆᐊᖅᑕᐅᓪᓗᓂ 1994-ᒥ) ᑖᓐᓇᓗ ᑲᓇᑕᒥ ᑕᕆᐅᕐᒥ ᐱᐅᖅᓱᐊᓂᕐᒧᑦ ᐃᓂᐅᔪᓄᑦ ᐱᖁᔭᖓᓂ (ᐊᑐᓕᖅᑎᑕᐅᓚᐅᖅᑐᖅ 2002). ᒪᓕᒐᖅ ᓇᓗᓇᐃᕆᕗᖅ ᑲᓇᑕᒥ ᑕᕆᐅᕐᒥ ᐱᐅᖅᓱᐃᓂᕐᒧᑦ ᐃᓂᐅᔪᖅ ᓴᐳᔾᔭᐅᓯᒪᔭᕆᐊᖃᓪᓚᕆᒃᑐᒥ ᑐᙵᕕᖃᖅᐳᖅ ᐊᕙᓗᑕᐅᓯᒪᓪᓗᓂ ᐱᑕᖃᐃᓐᓇᑎᑦᑎᓂᕐᒧᑦ ᐊᐅᓚᑦᑎᓂᕐᒧᑦ ᐊᕕᒃᑐᖅᓯᒪᓂᖓᓂ ᐃᓂᐅᔪᓂ. 2017-ᒥ, ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᓴᖅᑮᓚᐅᖅᑐᑦ ᐊᔪᕐᓇᕋᔭᙱᓐᓂᖓᓂ ᖃᐅᔨᓴᕐᓂᐅᔪᖅ ᑕᓪᓗᕈᑎᐅᑉ ᐃᒪᖓᓐᓄᑦ, ᓂᕆᐅᒋᔭᐅᔪᖅ ᑲᓇᑕᒥ ᑕᕆᐅᕐᒥ ᐱᐅᖅᓱᐃᓂᕐᒧᑦ ᐃᓂᐅᔪᖅ ᑕᓪᓗᕈᑎᐅᑉ ᐃᒪᖓᓐᓂ. ᑕᐃᓐᓇ ᖃᐅᔨᓴᕐᓂᐅᔪᖅ ᓴᖅᑭᓚᐅᖅᑐᖅ ᐊᕐᕌᒍᓴᑦ ᐱᖓᓲᔪᖅᑐᓄᑦ ᐋᔩᖃᑎᖃᓚᐅᖅᑐᑎ ᐃᓄᖕᓂ. ᐊᓯᐊᓂ ᑲᓇᑕᒥ ᑕᕆᐅᕐᒥ ᐱᐅᖅᓱᐊᓂᕐᒧᑦ ᐃᓂᐅᔪᓂᑦ ᐅᑭᐅᖅᑕᖅᑐᒥ ᐱᓕᕆᐊᔪᖃᙱᑦᑐᖅ.
• ᑲᓇᑕᒥ ᐆᒪᔪᓄᑦ ᐃᓂᐅᔪᓂᑦ (NWA): 1994-ᒥ, ᑲᓇᑕᒥ ᐆᒪᔪᓄᑦ ᐃᓂᐅᔪᓂᑦ ᐱᖁᔭᖓ ᐊᓯᔾᔨᖅᑕᐅᔪᔪᖅ ᐊᔪᕈᓐᓃᖅᑎᑦᑎᓂᕐᒥᑦ ᑲᓇᑕᒥ ᐆᒪᔪᓄᑦ ᐱᔨᑦᑎᕋᖅᑏᑦ ᓴᖅᑮᔪᓐᓇᕐᓂᖏᓐᓂᒃ ᓴᐳᔾᔭᐅᓯᒪᔪᓂ ᐃᒪᕐᒥᐅᑕᓂᑦ ᐃᓂᓂ ᐃᓚᒋᔭᐅᓪᓗᑎ ᑲᓇᑕᒥ ᐆᒪᔪᓄᑦ ᐃᓂᐅᔪᓂᑦ. ᑭᒡᒐᖅᑐᐃᔨᒃᑯᑦ ᐋᖅᑭᒃᓱᐃᓯᒪᔪᑦ ᐊᒥᓱᓂᑦ ᑲᓇᑕᒥ ᐆᒪᔪᓄᑦ ᐃᓂᐅᔪᓂᑦ ᓄᓇᕗᒻᒥ ᐃᒪᕐᒥᐅᑕᓂᑦ ᐃᓚᖃᐅᖅᖢᓂ, ᐃᓚᒋᓪᓗᓂᔾᔪᒃ: ᓂᕐᔪᑎᖃᕐᕕᒃ ᑲᓇᑕᒥ ᐆᒪᔪᓄᑦ ᐃᓂᐅᔪᖅ (ᖁᕐᕕᒃ), ᓴᐳᔾᔨᓲᖑᓪᓗᓂ ᓴᕐᕙᖕᒥᑦ ᐅᑭᐅᖅᑕᖅᑑᑉ ᐃᒪᖓᑕ ᐊᑭᐊᓂ; ᐊᖅᐸᐃᑦ ᑲᓇᑕᒥ ᐆᒪᔪᓄᑦ ᐃᓂᐅᔪᒥ, ᑲᖏᖅᑐᐊᓗᖕᒥ ᕿᑭᖅᑖᓗᖕᒥ; ᓂᖏᓂᖓᓂᖅ ᑲᓇᑕᒥ ᐆᒪᔪᓄᑦ ᐃᓂᐅᔪᖅ, ᓴᐳᔾᔨᓲᖅ ᐊᕐᕖᑦ ᓇᔪᖃᑦᑕᖅᑕᖏᓐᓂᒃ ᐃᒐᓕᖅᑑᑉ ᐊᑭᐊᓂ ᑲᖏᖅᑐᒑᐱᐅᑉ ᖃᓂᒋᔭᖓᓂ; ᐊᒻᒪ ᖃᖁᓪᓗᐃᑦ ᑲᓇᑕᒥ ᐆᒪᔪᓄᑦ ᐃᓂᐅᔪᖅ ᑲᖏᖅᑐᐊᓘᑉ ᐅᐊᖕᓇᖓᓂ. ᓄᑖᓂ ᐋᔩᖃᑎᒌᒍᑎᓂ ᑲᓇᑕᒥ ᐆᒪᔪᓄᑦ ᐃᓂᐅᔪᓄᑦ ᐅᖃᐅᓯᐅᓯᒪᔪᖃᙱᓚᖅ.

ᐅᑭᐅᖅᑕᖅᑐᒥ, ᑖᒃᑯᐊ ᑎᒃᑯᐊᖅᑕᐅᓯᒪᓃᑦ ᐱᔪᓐᓇᖅᑎᑕᐅᖕᒪᑕ ᒐᕙᒪᑐᖃᒃᑯᑦ ᑭᒡᒐᖅᑐᐃᔨᖏᑦ ᐋᔩᖃᑎᖃᕈᓐᓇᕐᓂᖏᓐᓂᒃ ᐃᓄᐃᑦ ᓄᓇᓕᖕᓂ ᐊᒻᒪ ᓄᓇᑖᕐᓂᕐᒧᑦ ᑲᑐᔾᔨᖃᑎᒌᖑᔪᓂᒃ. ᐃᓚᖏᓐᓂ, ᑖᒃᑯᐊ ᓄᓇᑖᕐᓂᕐᒧᑦ ᐊᖏᕈᑎᑦ ᓴᙱᔪᓂ ᐱᐅᖅᓱᐊᓂᕐᒧᑦ ᒪᓕᒋᐊᓕᖕᓂᒃ ᐱᑕᖃᖅᑐᑦ ᐃᑲᔪᖃᓯᐅᑎᔪᓂ ᐅᕝᕙᓘᓐᓃᑦ ᖄᖏᐅᑎᔪᓂ ᒐᕙᒪᑐᖃᒃᑯᑦ ᒪᓕᒐᖏᓐᓂᒃ. ᐆᑦᑑᑎᒋᓗᒍ, ᑕᓪᓗᕈᑎᐅᑉ ᐃᒪᖓᓐᓂ, ᑕᓪᓗᕈᑎᐅᑉ ᐃᒪᖓᓐᓄᑦ ᑲᓇᑕᒥ ᑕᕆᐅᕐᒥ ᐱᐅᖅᓱᐊᓂᕐᒧᑦ ᐃᓂᐅᔪᖅ ᑕᑯᔭᐅᔪᓐᓇᖅᑐᖅ ᐃᓚᒋᔭᐅᓪᓗᓂ ᑲᓇᑕᒥ ᑕᕆᐅᕐᒥ ᐱᐅᖅᓱᐊᓂᕐᒧᑦ ᐃᓂᐅᔪᓄᑦ ᐱᖁᔭᕐᒥ ᓴᙱᓂᖅᑖᖅᑎᑦᑎᓪᓗᓂ ᒥᕐᖑᐃᖅᓯᕐᕕᓕᕆᔨᒃᑯᑦ ᑲᓇᑕᒥ ᐊᒻᒪ ᓄᓇᕗᒻᒥ ᓄᓇᑖᓂᕐᒧᑦ ᐊᖏᕈᑎᓂ, ᓴᖅᑭᔮᖅᑎᑦᑎᓪᓚᕆᒃᑐᖅ ᐃᓅᔪᑦ ᐋᔩᖃᑎᖃᖅᑏᑦ ᐱᔪᓐᓇᕐᓂᖃᖅᑎᑕᐅᓂᖏᓐᓂᒃ.

ᐱᓪᓗᐊᑕᕆᔭᐅᔪᑦ ᑮᖏᖅᓯᓂᕐᒥᑦ ᑎᑭᐅᒪᑦᑎᐊᕈᓐᓇᕐᓂᕐᒥᑦ ᑐᕌᒐᕆᔭᐅᔪᓂ ᑲᓇᑕᐅᑉ ᐅᑭᐅᖅᑕᖅᑐᖓᑕ ᑕᕆᐅᕐᔪᐊᖓᓂ ᑕᐃᑯᐊ ᑎᓴᒪᑦ ᐃᓄᐃᑦ ᓄᓇᑖᕐᓂᕐᒧᑦ ᐊᖏᕈᑎᖃᖅᑐᑦ ᐅᑭᐅᖅᑕᖅᑐᓕᒫᒥ. ᐊᑐᐃᓐᓇᐅᑎᑦᑎᓲᑦ ᖄᒃᑲᓐᓂᐊᒍᑦ ᒪᓕᒐᖅᑎᒎᖓᔪᓂᒃ ᐱᒻᒪᕆᐅᔪᓂ ᐃᒪᕐᒥᐅᑕᓂᑦ ᐃᓂᐅᔪᓂ ᐃᓚᐅᑎᑦᑎᕙᒃᖢᑎ ᐃᓄᐃᑦ ᓄᓇᓕᖏᓐᓂ ᓂᕈᐊᒐᒃᓴᐃᓂᕐᒥᑦ, ᓂᕈᐊᖅᓯᓂᕐᒧᑦ, ᑎᒃᑯᐊᖅᓯᓂᕐᒧᑦ ᐊᒻᒪ ᐊᐅᓚᑦᑎᓂᕐᒥᑦ ᑕᕆᐊᕐᔪᐊᕐᒥ ᐱᐅᖅᓱᐊᕐᓂᕐᒧᑦ ᐃᓂᐅᔪᓂ.

ᑕᐃᒪᐃᑦᑐᑦ ᓄᓇᖃᖅᑳᖅᓯᒪᔪᓄᑦ ᐃᒪᕐᒥᐅᑕᓂ ᓴᐳᔾᔭᐅᓯᒪᓂᐅᔪᓂ ᐃᓂᐅᔪᑦ ᑕᐃᒪᐃᖁᔭᐅᓚᐅᖅᓯᒪᔪᑦ 2017-ᒥ ᒥᐊᓕ ᓴᐃᒪᓐᒧᑦ, ᒥᓂᔅᑕᐅᑉ ᑭᒡᒐᖅᑐᐃᔨᖓ ᐅᑭᐅᖅᑕᖅᑐᒥ ᓯᕗᓕᖅᑎᐅᓂᕐᒧᑦ. ᑖᓐᓇ ᑭᖑᓪᓕᖅᐹᒥ ᐅᓂᒃᑳᖓ ᓇᓗᓇᐃᕆᕗᖅ ᓄᓇᖃᖅᑳᖅᓯᒪᔪᑦ ᓴᐳᔾᔭᐅᓯᒪᔪᑦ ᐃᓂᐅᔪᑦ ᐃᒪᐃᓕᖓᓪᓗᑎ:

“…ᑐᙵᕕᖃᕐᓗᑎ ᐃᓱᒪᒋᔭᐅᔪᒥ ᓴᐳᔾᔭᐅᓯᒪᔪᒥ ᐃᓂᐅᔪᒥ ᓴᓇᓯᒪᓗᓂ ᐊᑲᐅᓈᖅᑎᑦᑎᓂᕐᒧᑦ ᐊᒻᒪ ᐃᑲᔪᖅᓱᓂᕐᒧᑦ ᓄᓇᖃᖅᑳᖅᓯᒪᔪᑦ ᑕᐅᑐᙳᐊᖅᑕᒥᓂᒃ ᓄᓇᒥ ᖃᓄᐃᓕᐅᕐᓂᐅᔪᒥᑦ. ᑎᒃᑯᐊᖅᓯᓂᖅ ᑕᐃᒪᐃᑦᑐᒥ ᐊᔪᕈᓐᓃᖅᑎᒃᑎᖕᒪᑦ ᐊᖏᓂᖅᓴᒥ, ᐊᑑᑎᖃᕐᓂᖅᓴᐅᔪᒥ ᐅᑭᐅᖅᑕᖅᑐᒥ ᐃᑲᔫᑎᓂᑦ ᐊᒻᒪ ᑐᑭᑖᖅᑎᑦᑎᓗᓂ ᐃᓱᒪᒋᔭᐅᔪᒥ ᐱᐅᖅᓱᐊᕐᓂᕐᒧᑦ ᑮᓇᐅᔭᓕᐅᕈᑕᐅᓇᓱᒃᑐᒥ. ᐆᑦᑑᑎᒋᓗᒍ, ᓄᓇᖃᖅᑳᖅᓯᒪᔪᓄᑦ ᓴᐳᔾᔭᐅᓯᒪᔪᑦ ᐃᓂᐅᔪᑦ ᑐᙵᕕᒃᓴᐅᔪᓐᓇᖅᑐᑦ ᐱᕙᓪᓕᐊᑎᑦᑎᓂᕐᒥᑦ ᐃᓕᖅᑯᓯᕐᒧᑦ−ᓈᖕᒪᒃᑐᓂ ᐱᓕᕆᐊᒃᓴᓂ ᐊᒻᒪ ᐃᖅᑲᓇᐃᔭᖅᑎᑦᑎᓂᕐᒥᑦ ᓄᓇᖃᖅᑳᖅᓯᒪᔪᓂ ᐊᔾᔨᒌᙱᑦᑐᓄᑦ ᐱᔨᑦᑎᕋᐅᑎᓄᑦ.”

ᐃᓚᓕᐅᑎᓯᒪᓗᓂ ᓱᒃᑲᐃᓐᓂᕆᔭᖓᓂ ᒐᕙᒪᑐᖃᒃᑯᑦ ᐱᐅᖅᓱᐊᓇᓱᓐᓂᖏᓐᓂ, ᓴᐃᒪᓐ ᐅᓂᒃᑳᖓ ᐆᒥᖓ ᖃᐅᔨᓚᐅᖅᑐᖅ ᐊᒃᓱᕉᑕᐅᓂᖅᐹᖑᔪᖅ ᑎᑭᐅᒪᑦᑎᐊᕋᓱᐊᕐᓂᕐᒧᑦ ᐃᒪᕐᒥᐅᑕᓂᑦ ᓴᐳᔾᔨᓂᕐᒧᑦ ᐅᑭᐅᖅᑕᖅᑐᒥ ᑖᒃᑯᐊ ᐱᐅᖅᓱᐊᓂᕐᒧᑦ ᐱᓕᕆᐊᖑᔪᑦ ᑐᕌᖓᖃᓯᐅᑎᖏᒻᒪ ᓄᓇᓕᐅᑉ ᖃᓄᐃᙱᑦᑎᐊᕆᐊᖃᕐᓂᖓᓄᑦ, ᐃᖅᑲᓇᐃᔭᖅᑎᑦᑎᓂᕐᒧᑦ ᐊᒻᒪ ᑲᔪᓯᓂᖃᑦᑎᐊᕈᓐᓇᕐᓂᕐᒥᑦ ᐊᕙᑎᓕᕆᓂᕐᒧᑦ ᓯᕗᓕᖅᑎᐅᓪᓗᑎ.

ᐃᓄᖕᓂ ᐅᖃᖃᑎᖃᖅᑎᓪᓗᒍ, ᓴᐃᒪᓐ ᖃᐅᔨᓚᐅᖅᑐᖅ “ᓂᕆᐅᖕᓂᖅᑕᖃᖅᑐᖅ ᐅᑭᐅᖅᑕᖅᑐᒥ ᐱᐅᖅᓱᐊᓂᕐᒧᑦ ᑐᕌᖓᖃᓯᐅᑎᕗᖅ ᓴᙱᔪᒥ ᓴᓇᓂᕐᒥ ᑲᔪᓯᑦᑎᐊᑎᑦᑎᓂᕐᒥᓪᓗ ᖃᓄᐃᙱᑦᑎᐊᖅᑐᓂ ᓄᓇᓕᖕᓂ.” ᑕᐃᒪᐃᑦᑐᒥ ᑎᑭᐅᒪᔪᒪᓂᕐᒧᑦ, ᓄᓇᖃᖅᑳᖅᓯᒪᔪᓄᑦ ᓴᐳᔾᔭᐅᓯᒪᔪᑦ ᐃᓂᐅᔪᑦ (IPA) ᐊᒻᒪ ᐅᑭᐅᖅᑕᖅᑐᒥ ᓯᒡᔭᖅᐸᓯᖓᓂ ᓇᐅᑦᑎᖅᓱᕐᓂᕐᒧᑦ ᐱᓕᕆᐊᒃᓴᑦ  ᓴᓇᔪᓐᓇᖅᑐᑦ “ᓴᐳᔾᔭᐅᓯᒪᔪᒥ ᐃᓂᐅᔪᒥ(ᓂᒃ) ᓴᓇᓯᒪᓗᓂ ᐊᑲᐅᓈᖅᑎᑦᑎᓂᕐᒧᑦ ᐊᒻᒪ ᐃᑲᔪᖅᓱᓂᕐᒧᑦ ᓄᓇᖃᖅᑳᖅᓯᒪᔪᑦ ᑕᐅᑐᙳᐊᖅᑕᒥᓂᒃ ᓄᓇᒥ ᖃᓄᐃᓕᐅᕐᓂᐅᔪᒥᑦ.”

ᐅᓗᖕᒧ ᐃᖃᓗᓕᕆᔪᖅ.

ᐃᓕᓴᕆᔭᐅᔪᖅ: ᕼᐊᓄᕆ ᕼᐊᓐᑎᖕᑕᓐ

ᐱᕕᖃᖅᑎᑦᑎᓂᖅ

ᑲᓇᑕ ᐱᕕᖃᖅᐳᖅ ᐅᓄᖅᓯᕚᓪᓕᖅᑎᑦᑎᓂᕐᒥᑦ ᓴᐳᔾᔨᓂᕐᒥᑦ ᐃᒪᕐᒥᐅᑕᓂᑦ ᐃᓂᐅᔪᓂ ᐅᑭᐅᖅᑕᖅᑐᒥ. ᑕᕆᐅᕐᔪᐊᓕᕆᔨᒃᑯᑦ ᐅᑭᐅᖅᑕᖅᑐᒥ ᐃᑲᔪᖅᓱᖅᑐᑦ ᑲᓇᑕᐅ ᐱᓕᕆᐊᖃᕈᒪᓂᖓᓂ ᓴᐳᔾᔨᓂᕐᒥᑦ 10 ᐳᓴᓐᑎᒥ ᐃᒪᖁᑎᖏᓐᓂᒃ ᑎᑭᓪᓗᒍ 2020. ᑎᑭᐅᒪᓂᐊᕐᓗᒍ ᑖᓐᓇ ᐱᒻᒪᕆᐅᔪᖅ ᑐᕌᒐᒃᓴᖅ, ᐃᓄᐃᑦ ᐃᓚᐅᑦᑎᐊᕆᐊᓖᑦ ᑕᐃᒪᐃᒋᐊᖃᖅᖢᑎᒡᓗ ᓄᓇᑖᕈᑎᑦ ᐊᖏᕈᑎᖏᑎᒍᑦ. ᑲᓇᑕ ᑲᔪᓯᑦᑐᓐᓇᖅᑐᖅ ᐃᒪᕐᒥᐅᑕᓂᑦ ᐱᐅᖅᓱᐊᓂᕐᒧᑦ ᑐᕌᒐᖏᓐᓂ, ᑲᑐᔾᔨᖃᑎᖃᕐᓗᑎ ᐃᓄᖕᓄᑦ ᓄᓇᒋᔭᐅᔪᑦ ᐊᕙᒃᑐᖅᓯᒪᓂᐅᔪᓂ, ᖁᑦᑎᓂᖅᓴᓂ ᓴᐳᑎᖃᐅᕐᓗᑎ ᓇᓗᓇᐃᖅᑕᐅᓯᒪᔭᕇᖅᑐᓄᑦ ᐃᓂᐅᔪᓂ ᓲᕐᓗ ᑕᓪᓗᕈᑎᐅᑉ ᐃᒪᖓ (ᑕᓪᓗᕈᑎᐅᑉ ᐃᒪᖓ)  ᐊᒻᒪ ᐱᑭᐊᓚᓱᕐᓱᐊᖅ (ᐅᐊᓐᓇᖓᓂ ᐃᒪᕐᒥ ᓴᕐᕙᖅ ). ᑮᖏᓪᓚᕆᓐᓂᐊᕐᓗᒍ ᐊᔪᙱᕈᑕᐅᔪᓐᓇᖅᑐᑦ ᐊᕕᒃᑐᖅᓯᒪᓂᐅᔪᒥ ᐱᐅᖅᓱᐊᓂᕐᒧᑦ ᐊᒻᒪᓗ ᐃᖅᑲᓇᐃᔮᒃᓴᓄᑦ ᐃᓱᒪᒋᔭᐅᓯᒪᔪᑦ ᑎᑎᕋᖅᓯᒪᔪᓪᓗ ᐃᓄᐃᑦ ᓄᓇᑖᓂᕐᒧᑦ ᐊᖏᕈᑎᖏᓐᓂ, ᑲᓇᑕ ᐃᓱᒪᔭᕆᐊᓕᒃ ᓄᑖᒥ ᓄᓇᖃᖅᑳᖅᓯᒪᔪᓄᑦ ᓴᐳᔾᔨᓯᒪᓂᕐᒧᑦ ᐃᓂᐅᔪᓄᑦ ᐊᑐᐊᒐᕐᒥᑦ ᐅᑭᐅᖅᑕᖅᑐᒥ ᐃᒪᕐᒥᐅᑕᓂᑦ ᐃᓂᐅᔪᓂ.