Inuktitut
ᐃᒪᕕᓕᕆᔩᑦ ᑕᕆᐅᕐᒥᒃ ᐅᑭᐅᖅᑕᖅᑐᒥ ᑲᓇᑕᒥ
ᐅᑭᐅᖅᑕᖅᑐᒥ ᓯᒡᔭᐃᑦ ᓯᓈᖅᐹᓯᑦᑐᑦ ᓯᓚᕐᔪᐊᓕᒫᒥ ᐸᕝᕕᓴᑦᑕᐅᓗᐊᕋᑎᒃ ᐃᒪᕐᒥᐅᑕᓄᑦ ᐆᒪᔪᓐᓇᖅᑐᓕᒫᓄᑦ ᐃᓂᒋᔭᐃᑦ, ᐊᑑᑎᖃᓪᓚᕆᑉᐳᑦ ᑕᒪᒃᑯᐊ ᓯᓚᐅᑉ ᓱᕐᕋᑦᑕᐅᕙᓪᓕᐊᓂᖓᓂᒃ ᐃᑯᓪᓚᐅᒥᑎᑦᓯᓯᒪᒻᒪᑕ ᐃᓂᒋᔭᐅᓪᓗᓂᓗ ᓂᕐᔪᑎᓄᑦ, ᐃᖃᓗᓐᓄᑦ ᓴᖅᐱᓕᓐᓄᑦ ᐃᒪᕐᒥᐅᑕᓄᓪᓗ. ᓂᕐᔪᑎᑕᖃᕐᓂᖓ ᐅᑭᐅᖅᑕᖅᑐᒥ ᓂᕆᕙᑦᑐᓄᑦ ᓂᕐᔪᑎᓂᒃ ᑎᒥᒧᑦ ᐊᓂᕐᓂᒧᓪᓗ ᐊᑐᐃᓐᓇᐅᕕᐅᒻᒪᑦ ᓄᓇᖃᖅᑳᖅᓯᒪᔪᓄᑦ ᐆᒻᒪᕆᑦᑐᒥᒃ ᓄᓇᓕᓐᓄᑦ ᐅᑭᐅᖅᑕᖅᑐᒥ.
ᒫᓐᓇᐅᓕᖅᑐᖅ ᐅᑭᐅᖅᑕᖅᑐᖅ ᐃᓄᖏᓪᓗ ᐊᖏᔪᐊᓗᖕᓂᒃ ᓵᙵᕕᖃᕆᐊᖃᓕᕐᒪᑕ. ᓯᓚᐅᑉ ᐊᓯᔾᔨᐸᓪᓕᐊᓂᖓ ᐊᐅᑎᑦᓯᓕᕐᒪᑦ ᓯᕐᒥᓂᒃ ᐊᒃᑐᐊᔪᓂᒃ ᓯᓚᒧᑦ ᑕᕆᐅᕐᔪᐊᓪᓗ ᐃᖏᕐᕋᓂᐅᓂᖏᓐᓄᑦ. ᓯᓴᐃᖅᐸᓪᓕᐊᔪᖅ ᑕᕆᐅᖅ ᐊᓯᔾᔩᕙᓪᓕᐊᒻᒪᑦ ᐅᑭᐅᖅᑕᖅᑑᑉ ᐃᒪᕐᒥᐅᑕᖏᓐᓂᒃ ᖃᐅᔨᔭᐅᓚᐅᖅᓯᒪᙱᑦᑐᒥᒃ ᐃᓄᖕᓄᑦ. ᑕᒪᓐᓇᐅᑎᓪᓗᒍ ᐊᑑᑎᖃᓯᐅᑎᒋᓪᓗᓂᓗ, ᓯᑯᖃᕈᓐᓃᖅᐸᓪᓕᐊᓂᖅ ᐊᖅᑯᑎᐅᓕᕈᓐᓇᕐᒪᑦ ᓴᓇᒍᒪᔪᓄᑦ ᑮᓇᔭᓕᐅᕈᑕᐅᓗᑎᒃ.
ᐅᑭᐅᖅᑕᖅᑐᖅ ᐱᒻᒪᕆᐅᒻᒪᑦ ᑲᓇᑕᒧᑦ, 68-ᐳᓴᖓ ᓯᒡᔭᐅᓪᓗᓂ ᐅᑭᐅᖅᑕᖅᑑᒍᑎᒋᓪᓗᓂᐅᓪᓗ. ᑲᓇᑕᐅᑉ ᐅᐊᖕᓂᖓ 165-ᑕᐅᓴᓂᒃ ᑭᓛᒥᑕᓂᒃ ᑕᑭᓂᖃᕐᒪᑦ (99-ᑕᐅᓴ ᒪᐃᓖᑦ) ᕿᑭᖅᑖᓘᑉ ᑲᓇᖕᓇᖓᓂ, ᐃᑳᖅᓱᒍ ᖁᑦᓯᑦᑐᖅ ᐅᑭᐅᖅᑕᖅᑐᖅ ᕿᑭᖅᑕᖏᑦ ᒪᑭᐊᓐᓯᐅᑉ ᑰᖓ ᔫᑳᓐᓗ ᐅᐊᓕᓂᕐᒥ.
ᑕᐃᒫᑦᑕᐅᖅ, ᑲᓇᑕ ᐱᒻᒪᕆᐅᒋᕗᖅ ᐅᑭᐅᖅᑕᖅᑐᒧᑦ. ᐃᓄᐃᑦ ᒐᕙᒪᓂᓪᓗ ᓯᕗᓕᖅᑏᑦ ᑲᓇᑕᒥᐅᑦ ᐱᔭᕆᐊᖃᓪᓚᕆᑦᑐᑎᒍᑦ ᐱᖃᑕᐅᖃᑦᑕᖅᓯᒪᓕᖅᑐᑦ ᓯᓚᕐᔪᐊᓕᒫᒥ ᑲᑐᔾᔨᖃᑎᒌᓐᓂᒃᑯᑦ ᐅᑭᐅᖅᑕᖅᑐᒧᑦ ᑲᑎᒪᔨᓄᑦ, ᐋᔩᖃᖅᑎᒌᓐᓂᖏᑎᒍᑦ ᓄᓇᕐᔪᐊᓕᒫᒥ ᐊᖏᖃᑎᒌᒍᑎᒃᑯᑦ ᓱᕈᕐᓇᖅᑐᑦ ᒥᒃᓵᓄᑦ ᖃᐅᔨᒪᔭᐅᑎᓕᖅᓱᒋᓪᓗ ᓄᓇᕐᔪᐊᒥᐅᓄᑦ ᐊᒃᑐᖅᑕᐅᓂᖓᓂᒃ ᓯᓚᐅᑉ ᐊᓯᔾᔨᕐᓂᖓᓄᑦ.
ᓯᕗᓂᑦᑎᓐᓂ ᑕᒪᒃᑯᐊ ᐊᒃᓱᕈᕐᓇᖅᓯᕙᓪᓕᐊᔪᑦ, ᑲᓇᑕ ᐃᓄᖏᓪᓗ ᐱᖃᑕᐅᒋᐊᖃᕐᓂᐊᖅᑐᑦ ᐋᖅᑭᑦᓱᐃᕙᓪᓕᐊᑎᓪᓗᒋᑦ ᐅᑭᐅᖅᑕᖅᑐᒥ ᐊᑐᖅᑕᐅᒍᓐᓇᕋᔭᖅᑐᓂ ᐊᒻᒪ ᓂᓪᓕᐊᒍᑎᖃᓗᑎᓪᓗ ᐃᑲᔪᖅᑐᐃᓂᕐᒥᓐᓂᒃ ᐃᓅᓇᓱᐊᕐᓂᕐᒥᒃ ᐅᑭᐅᖅᑕᖅᑐᒥ.
ᒫᓐᓇᒧᑦ, ᐃᒪᕕᓕᕆᔩᑦ ᑕᕆᐅᕐᒥᒃ ᐅᑭᐅᖅᑕᖅᑐᒥ ᑲᓇᑕᒥ ᑲᔪᙱᖅᓴᐃᒍᑎᖃᖅᐳᑦ ᑭᓪᓕᓯᓂᐊᕐᓂᕐᒥᒃ - ᓄᓇᓕᒻᒧᓪᓗ ᑐᕌᖓᔪᓂᒃ ᓴᐳᔾᔨᒋᐊᖃᕐᓂᕐᒥᒃ ᑲᓇᑕᒥ ᐅᑭᐅᖅᑕᖅᑐᒥᒃ ᑕᕆᐅᕐᔪᐊᓂᒃ ᖃᓄᐃᙱᑦᓯᐊᖁᓪᓗᒋᓪᓗ ᓄᓇᖃᖅᑳᖅᓯᒪᔪᑦ ᓯᓚᒥᒃ ᓂᕐᔪᑎᖏᓐᓂᓪᓗ ᐃᓅᔾᔪᑎᖃᖅᑐᑦ. ᐅᑯᓇᖓᑦ ᐃᖅᑲᓇᐃᔮᖃᖅᐸᑦᑐᒍᑦ:
- ᓴᖅᑭᑎᑦᓯᓂᖅ ᐊᖏᔪᒥᒃ ᑲᓇᑕᓕᒫᒥ ᐃᒪᕐᒥᐅᑕᓄᑦ ᓴᐳᔾᔭᐅᒍᑎᒋᓂᐊᖅᑕᖓᓂᒃ ᑕᓪᓗᕈᑎᐅᑉ ᐃᒪᖓᓂᒃ ᐊᑐᕐᓗᒍ ᓄᓇᕘᒥᒃ ᓄᓇᑖᕈᑕᐅᓯᒪᔪᖅ ᐊᖏᖃᑎᒌᒍᑦ: ᑕᓪᓗᕈᑎᐅᑉ ᐃᒪᖓ ᖃᐅᔨᒪᔭᐅᒻᒪᑦ ᐆᒪᔪᖃᐅᑦᓯᐊᕆᐊᖓᓂᒃ ᓇᔪᖓᐅᓪᓗᓂᓗ ᐆᒪᔪᓄᑦ, ᐃᒪᕐᒥᐅᑕᖅᑕᖃᐅᑦᓯᐊᖅᓱᓂ ᑎᖕᒥᐊᓂᓪᓗ, ᐆᒻᒪᕆᑎᑕᐅᓪᓗᓂᓗ ᐃᓕᖅᑯᓯᖅ ᐊᑐᖅᑕᐅᕙᑦᑐᒥᓃᓪᓗ ᑭᖑᕚᖑᔪᓄᑦ ᖃᐅᔨᒪᔭᐅᑦᓯᐊᖅᓱᑎᒃ ᓇᓗᓇᐃᖅᑕᐅᓯᒪᓕᕇᖅᓱᓂᓗ ᑲᓇᑕᒥ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᐃᓄᓐᓄᓪᓗ ᓯᕗᓕᖅᑎᓄᑦ ᑕᒪᑐᒧᖓᓕᖓᔪᓂᒃ ᓴᓇᔪᖃᕈᓂ ᐊᖏᔪᒥᒃ ᑲᓇᑕᓕᒫᒥ ᐃᒪᕐᒥᐅᑕᓄᑦ ᓴᐳᔾᔭᐅᒍᑕᐅᓂᐊᖅᑐᒥᒃ ᐊᑐᐃᓐᓇᐅᑎᑦᓯᕕᐅᔪᓐᓇᕋᔭᕐᒪᑦ ᐱᖅᑯᓯᕐᒧᑦ ᐊᕙᑎᒧᓪᓗ ᓴᐳᑎᔭᐅᓂᕐᒥᒃ ᓯᕗᕐᖓᒍᑦ ᓴᓇᕕᐅᕙᓪᓕᐊᖏᓐᓂᖓᓂ ᑮᓇᐅᔭᓕᐅᕈᑎᑦᓴᓄᑦ ᓲᕐᓗ ᐃᖃᓗᓕᕆᓂᒃᑯᑦ, ᐅᖅᓱᐊᓗᓐᓂᐊᓂᒃᑯᑦ ᐅᖅᓱᖅᑎᕈᑎᓐᓂᐊᓂᒃᑯᑦ ᐃᒪᕐᒥᐅᑕᓂᓪᓗ ᓂᐅᕐᕈᑎᖃᕐᓂᒃᑯᑦ.
- ᐃᖃᓗᓕᕆᓂᕐᒥᒃ ᐊᐅᓚᑦᓯᒍᓐᓇᓂᕐᒥᒃ ᐸᕐᓇᐅᑎᖃᕐᓂᖅ ᑲᓇᑕᐅᑉ ᐃᓚᖓᓃᑦᑐᑦ ᑐᒃᑑᔮᖅᑑᑉ/ᐅᐊᓕᓂᐅᑉ ᑕᕆᐅᖓᓂ: ᑖᓐᓇ ᐸᕐᓇᐅᑦ ᒪᑐᒪᑎᑦᓯᒐᔭᖅᑐᖅ ᐃᖃᓗᒐᓱᐊᕐᓂᕐᒥᒃ ᑮᓇᐅᔭᓕᐅᕈᑎᒋᓂᐊᕐᓗᒍ ᑭᓪᓕᓯᓂᐊᖅᑏᑦ ᐃᓄᕕᐊᓗᖕᒥᐅᓪᓗ ᖃᐅᔨᒐᓱᐊᕐᓂᖏᓐᓂ ᖃᓄᖅ ᐃᖃᓗᓕᕆᓂᖅ ᑮᓇᐅᔭᓕᐅᕈᑎᒋᓂᐊᕐᓗᒍ ᓴᖅᑭᕈᓐᓇᕐᒪᖔᖅ ᑕᒪᓐᓇ ᓱᕐᕋᑦᑕᐅᑦᑕᐃᓕᓗᓂ ᐊᓯᔾᔨᐸᓪᓕᐊᔪᒧᑦ ᐅᑭᐅᖅᑕᖅᑐᒥ ᐆᒪᔪᐃᑦ ᐃᕐᓂᐅᕐᕕᖓ ᐅᕝᕙᓘᓐᓃᑦ ᐃᓄᕕᐊᓗᐃᑦ ᓄᓇᑖᕈᑎᒋᓯᒪᔭᖓᑕ ᐱᔪᓐᓇᐅᑎᖏᑦ.
- ᐆᒪᔪᐃᑦ ᐃᕐᓂᐅᕐᕕᖏᓐᓂᒃ ᖃᐅᔨᓴᐅᑎᒥᓂᖅ ᓴᓐᓂᕈᑎᐅᑉ ᐃᒪᖓᓂ ᐃᕿᕐᒥᒃ ᑕᓯᐅᔭᕐᒥᒃ ᑐᕌᖅᑐᒥᒃ ᓴᐳᑎᔭᐅᓗᓂ ᐃᖃᓗᓕᕆᓂᕐᒥᒃ ᐸᕐᓇᓐᓂᖅ: ᑭᓪᓕᖃᖅᑎᑕᐅᓂᖓ ᑮᓇᐅᔭᓕᐅᕈᑕᐅᓂᐊᖅᐸᑦ ᐃᖃᓗᓕᕆᓂᖅ ᐊᑐᖅᑕᐅᓕᕇᖅᑐᖅ ᓴᓐᓂᕈᑎᐅᑉ ᐃᒪᖓᓂ ᑭᓯᐊᓂ ᐸᕐᓇᐅᑎᑕᖃᙱᒻᒪᑦ ᓱᕈᖅᑕᐅᔾᔭᐃᒃᑯᑎᒋᓂᐊᖅᑕᖓᓂᒃ ᐃᑲᓗᓕᕆᓂᖅ ᐊᑐᖅᑕᐅᑎᓪᓗᒍ. ᑖᓐᓇ ᐸᕐᓇᐅᑦ ᐃᖅᑲᒋᔭᖃᕐᓂᐊᖅᑐᖅ ᐃᓄᐃᑦ ᐊᑐᖅᐸᑦᑕᑐᖃᖏᓐᓂᒃ ᓴᐳᔾᔨᓂᕐᒥᓪᓗ ᐃᒪᕐᒥᐅᑕᓂᒃ, ᓂᓪᓕᓇᖅᑐᒥᐅᑕᕐᓂᒃ ᐆᒪᔪᓚᐅᑎᓂᒃ ᓇᔪᖅᐸᑦᑕᖏᓐᓂᓪᓗ ᐃᖅᑲᓇᐅᔮᒃᓴᖃᐅᖅᑎᑦᓯᓗᑎᒃ ᐃᖃᓗᓕᕆᓂᒃᑯᓪᓗ ᑮᓇᐅᔭᓕᐅᕈᑎᖃᕐᓗᑎᒃ ᓯᕕᑐᓈᖅᑐᒥᒃ.
Can't see Inuktitut?
Is your browser having trouble displaying Inuktitut? Click here to view the language properly.
